Read Biatah Bidayuh 1 RAJA 7 Bible Online

1 RAJA 7 - Biatah Bidayuh bible

1 RAJA 7

¹Solomon pijog gŭh Istana yŭn adŭp-i; sitian simŭng taruh sawa ayŭh pijog Istana anŭ.

²Birit-bās Tuān Lebanon[15] inŭh 44 mita ambu-i, 22 mita buka-i, ka 13.5 mita bigatung. Ayŭh biyŭn taruh[16] baris uros sedar, simŭng rimŭh di barang jari, ngga parang kayuh sedar bisangan dieh. Dek dog ndai so kayuh sedar, nyirungan birit pinyirikŭn, adi dog nugu uros anŭ.

⁴Darŭm barang duwŭh parad sindung agi taruh baris pinjan.

⁵Sibukah tiban ngga pinjan[17] inŭh nganjong, ka taruh baris pinjan di barang sindung anŭ nura baris parad mandi.

⁶Birit Tiang bās anŭ inŭh 22 mita ambu-i ka 13.5 mita buka-i. Awah-i dog nutu, dog nugu ngga tiang bās.

⁷Birit Takta, inŭh dog kadŭn Birit-bās Bisara, di yŭn Solomon matŭd itong, biyŭn sindung dog nurap ngga kiping papan sedar so yŭn bidigang ndŭg kasu kasu.[18]

⁸ Ramin adŭp Solomon, di badag anŭ ndi di punok Birit-bās Bisara, dog ndai brimun ngga anŭ. Ayŭh pijog gŭh yŭn sawŭn-i ramin mun anŭ gŭh, adi anak raja Egypt.

⁹Sopŭrŭg ramin anŭ samŭn badag-i adi bayah anŭ dog ndai so batuh batuh ramus so pinagap-rasan ndŭg tŭbŭn tanja. Batuh batuh anŭ dog ndai di kwari, adi dog kapŭg nanyam besan-i. Ka punda ngga tunduh-i dog pijarŭh ngga grigaji.

¹⁰Pinagap pinagap-rasan ramin anŭ dog ndai so panggar panggar batuh adi dog sidia di kwari, agi adi 3.5 mita ambu-i ka adi bŭkŭn 4 mita ambu-i.

¹¹Di tunduh-i inŭh batuh adi bŭkŭn, adi ko dog ngŭkŭd, samŭn parang kayuh sedar.

¹²Badag istana, badag Ramin TUHAN adi tura ka darŭm, ngga birit-mŭrŭt Ramin TUHAN biyŭn sindung adi agi ndi turap parang parang kayuh sedar di tunduh barang taruh sandug batuh.

¹³Raja Solomon bada daya bagan ndi naan daya dŭn Huram, tukang timaga adi rŭŭ di kupo Tyre.

¹⁴Sama-i, adi mbŭh tui mating, inŭh so Tyre, ka mbŭh tukang timaga gŭh adi mbŭh sukup pandai. Sindŭ-i so tibaran-asar Naphtali. Huram inŭh daya adi pitar buang tukang timaga adi mbŭh tui ka pandai. Ayŭh trima pimite Raja Solomon adi bada ayŭh jadi tukang ngatur sopŭrŭg kraja timaga.

¹⁵Huram ndai duwŭh tiang bās so timaga, soduwŭh-i 8 mita bigatung ka 5.3 mita pinyidakŭp-i[19] ka pijog soduwŭh-i di tiban Ramin TUHAN.

¹⁶Ayŭh ndai gŭh duwŭh ubak tiang so timaga, soduwŭh-i 2.2 mita bigatung, adi re dog na di tibung tiang bās anŭ.

¹⁷Tibung so-duwŭh tiang bās anŭ dog ngabuh ngga butik adi birasŭk rasŭk mun parik basi,[20]

¹⁸ka duwŭh baris buwa delima adi dog ndai so timaga.

¹⁹Duwŭh ubak anŭ dog ndai mun bunga lili, 1.8 mita bigatung,

²⁰ka dog na di tunduh kŭt adi bŭrŭng adi di tunduh butik adi mun parik basi. Agi 200 buwa delima di duwŭh baris di barang ubak tiang.[21]

²¹Huram pijog duwŭh tiang bās anŭ di jawin tiban Ramin TUHAN: anŭ adi tura ka siratan dog kadŭn Jachin,[22] ka anŭ ndi adi tura ka utara dog kadŭn Boaz.[23]

²²Ubak tiang adi mun lili anŭ inŭh di tibung tiang tiang bās anŭ. Ngga simŭnŭ meh kraja pingandai di tiang tiang bās anŭ mbŭh kamas.

²³Huram ndai ndi tong adi bŭrŭng so timaga, 2,2 mita tŭrŭp-i, 4.4 mita pimutas baba-i, ka 13.2 mita pinyidakŭp-i.

²⁴Maning sapa bibis tong anŭ[24] inŭh duwŭh baris buwa rigo timaga, adi dog ndai sinyadi ngga tong anŭ.

²⁵Tong anŭ dog sangan di tunduh simŭng duwŭh dari sapi timaga adi jawin-i nura sapa, taruh nura ka utara, taruh nura ka barat, taruh nura ka siratan, taruh nura ka timor.

²⁶Bŭngŭn tong anŭ inŭh 75 milimita tabar-i. Bibis-i mun bibis saker, mirimbeh ka sapa mun dawŭn rarak bunga lili. Isi tong anŭ na ka 40,000 lita.

²⁷Huram agi gŭh ndai simŭng krita timaga; barang krita timaga anŭ agi 1.8 mita ambu-i, 1.8 mita buka-i, ka 1.3 mita bigatung-i.

²⁸Sopŭrŭg-i dog ndai so kiping papan adi misagi ka dog ngatŭp ngga sibukah,

²⁹ngga gayŭn singah, gayŭn dari sapi, ngga gayŭn cherubim di tunduh atŭp; ka di tunduh sibukah, nyirungan ka di ribo singah ngga dari sapi, agi gayŭn kayuh bikaring dog mŭŭt.

³⁰Barang krita anŭ biyŭn pat kaja timaga adi bisa bipusing ka parang-i timaga gŭh. Di so-pat sikuh-i agi bangan timaga yŭn na sambong; bangan anŭ dog ngabuh ngga gayŭn kayuh bikaring adi dog mŭŭt.

³¹Agi gŭh sibukah adi bŭrŭng di tibung yŭn piguru sambong anŭ. Sibukah anŭ mininggir 45 sentimita so tunduh krita anŭ, ka 18 sentimita mūn sibukah anŭ. Agi gŭh abuh adi dog mŭŭt maning-i.

³²Kaja krita anŭ inŭh 66 sentimita bigatung-i; kaja krita anŭ inŭh di punda tain krita anŭ. Ka parang kaja-i sinyadi ngga adŭp krita anŭ.

³³Kaja krita anŭ mun kaja krita kuda perang. Parang-i, turang kaja, spok, ngga pasid kaja mbŭh sopŭrŭg-i dog ndai so timaga.

³⁴Agi pat tangan di sagān sikuh barang krita, adi mbŭh sinyadi ngga krita anŭ.

³⁵Maning tibung barang krita anŭ agi pingŭnggŭng adi 22 sentimita ramba-i; bangan-i ka atŭp-i dog ndai sinyadi ngga krita anŭ.

³⁶Bangan ka atŭp dog ngabuh ngga gayŭn cherubim, singah, tŭngŭn kurma, di tadŭ yŭn adi agi yŭn na-i, ngga gayŭn kayuh bikaring dog mŭŭt maning-i.

³⁷Simŭnŭ inŭh dudu krita anŭ dog ndai; sopŭrŭg-i brimun ka nyimati.

³⁸ Huram agi gŭh ndai simŭng sambong, yŭn barang krita anŭ. Barang sambong anŭ agi 1.8 mita pimutas baba-i, ka dapŭd ngisi kurang rabis 800 lita.

³⁹Ayŭh na rimŭh krita anŭ di tura ka siratan Ramin TUHAN, ka rimŭh adi bŭkŭn di tura ka utara; tong anŭ ayŭh na di sikuh tura ka siratan-timor Ramin TUHAN.

⁴⁰Huram agi gŭh ndai dudu priok, sanduk, ka makuk. Ayŭh kubo ndai kraja-i yŭn Raja Solomon yŭn Ramin TUHAN. Jadi ati inŭh kayuh adi muko-i ndai: Duwŭh tiang bās Duwŭh ubak tiang adi mun makuk di tibung tiang tiang bās Butik adi birasŭk rasŭk mun parik basi di ubak ubak soduwŭh tiang bās anŭ 400 buwa delima timaga, di duwŭh baris, siratus darŭm ndi baris, kirurung butik di barang ubak tiang tiang bās Simŭng krita timaga Simŭng tibande sambong Ndi tong Simŭng duwŭh dari sapi timaga adi yŭn sangan tong anŭ Dudu priok, sanduk, ka makuk Sopŭrŭg pingakas anŭ yŭn Ramin TUHAN, adi Huram ndai yŭn Raja Solomon, mbŭh timaga adi muko nakit dog pijarŭh.

⁴¹

⁴²

⁴³

⁴⁴

⁴⁵

⁴⁶Raja bada sopŭrŭg-i dog ndai di tunduh tana-riyat di asah Sukkoth ngga Zarethan, di rubān Jordan.

⁴⁷Solomon dŭh nimbang sopŭrŭg kayuh anŭ adi dog ndai so timaga, amai-i mbŭh raru bagŭ, ka simŭnŭ inŭh timbang-i bŭn dog puan.

⁴⁸ Solomon agi gŭh ndai pingakas mas yŭn Ramin TUHAN: mija-sambah, mija adi yŭn na ruti adi dog jugan ka Tapa.

⁴⁹ Simŭng rika prita adi dog pijog di jawin Yŭn adi Siabo Kudus, rimŭh tura ka siratan ka rimŭh tura ka utara; dudu bunga, prita, ngga satip;

⁵⁰saker, pimura prita, makuk, pinggen adi yŭn na kimanyan, ka tipaku adi dog pakai ngga taban bam apui; ka tieng tiban Yŭn adi Siabo Kudus ka tiban parad ka sapa Ramin TUHAN. Sopŭrŭg pingakas anŭ dog ndai so mas.

⁵¹ Kan Raja Solomon mbŭh ngamas ndai sopŭrŭg kraja di Ramin TUHAN, ayŭh na di birit pinyirikŭn Ramin TUHAN sopŭrŭg kayuh anŭ adi sama-i David mbŭh nitah ka TUHAN -- mun pirak, mas, ka kayuh kayuh adi bŭkŭn.