Read Biatah Bidayuh 1 RAJA 8 Bible Online

1 RAJA 8 - Biatah Bidayuh bible

1 RAJA 8

¹ Komŭnŭ Raja Solomon bagan sopŭrŭg pinguru tibaran-asar ngga manak manak Israel bada mandŭg ka yŭn adŭp-i di Jerusalem siŭn tambit Pati Simanya so Zion, Kupo David, ka taban-i ka Ramin TUHAN.

² Sopŭrŭg ngara tikuruk di tika Gawai Bari-Dawŭn darŭm buran adi ju, darŭm buran Ethanim.

³Kan sopŭrŭg pinguru mbŭh tikuruk, bara imam pakat Pati Simanya

⁴ka taban-i ka Ramin TUHAN. Bara daya Levi ngga bara imam mindah gŭh Bari TUHAN ngga sopŭrŭg pingakas-i ka Ramin TUHAN.

⁵Raja Solomon ngga sopŭrŭg daya Israel tikuruk di jawin Pati Simanya ka nyadis dudu dudu biri ngga sapi -- raru bagŭ ka dŭh batah dog mirang.

⁶Komŭnŭ bara imam taban Pati Simanya ka darŭm Ramin TUHAN ka na-i di Yŭn adi Siabo Kudus, di ribo patong cherubim.

⁷Urad cherubim anŭ tiburai nutu pati ngga pinawid-i.

⁸Tŭbŭn tŭbŭn pinawid dapŭd dog kiris daya adi mijog di jawin Yŭn adi Siabo Kudus, pak dŭh so parad bŭkŭn. (Pinawid anŭ babŭ diginŭ ndŭg andu ati.)

⁹ Mating kayuh di darŭm Pati Simanya anŭ adŭ-i duwŭh kiping batuh adi Moses muko na darŭm-i andu-i di Darŭd Sinai, di yŭn TUHAN ndai simanya ngga daya Israel darŭm ngara ruah so Egypt.

¹⁰ Darŭm bara imam ruah so darŭm Ramin TUHAN, Ramin anŭ rasu dog ngisi ngga abun

¹¹nyirinyak ngga sekar jawa bragah TUHAN, ka ngara dŭh dapŭd pari mŭrŭt ka darŭm-i di ndai kraja ngara.

¹² Komŭnŭ Solomon bidua: “Kaam, TUHAN, mbŭh na batŭh andu di rangit,[25] pak Kaam mbŭh raan dŭ rŭŭ darŭm abun adi karŭm.

¹³Madin aku mbŭh pijog ramin adi grua yŭn Mai, tarun yŭn Mai rŭŭ ndŭg situi tui.”

¹⁴Buang daya mijog diginŭ, Raja Solomon bigiring ka nura ngara, ka ayŭh mite Tapa nyiberkat ngara.

¹⁵Ayŭh nang, “Puji ka TUHAN adi Tapa Israel! Ayŭh mbŭh ingat janji adi-I ndai ngga sama ku David, kan-I nang,

¹⁶ ‘So andu adi ngga Aku taban daya Ku ruah so Egypt, Aku gibayuh mien kupo di ndi tarun tana Israel adi yŭn ramin patut dog pijog adi yŭn Aku patut dog nyambah. Pak aku mien kuu, David, bada mritah daya Ku.’ ”

¹⁷ Solomon pijuu minyu, “Sama ku David taŭn muko bisatur raan pijog ramin yŭn nyambah TUHAN adi Tapa Israel,

¹⁸pak TUHAN nang di ayŭh, ‘Mbŭh raru kana kuu biyŭn pinyiraan an pijog ramin yŭn Ku,

¹⁹ pak kuu taŭn re dŭh pijog-i. Anak mu, anak adŭp mu, adi re pijog ramin Ku.’

²⁰“Ka madin TUHAN mbŭh ingat janji-I. Aku mbŭh gati sama ku jadi raja Israel, ka aku mbŭh pijog ramin yŭn nyambah TUHAN adi Tapa Israel.

²¹Aku gŭh mbŭh ndai di Ramin TUHAN tarun yŭn na Pati Simanya adi brisi ngga kiping kiping batuh simanya adi TUHAN mbŭh ndai ngga tayung tayung-babuk ta di andu Ayŭh taban ngara ngga ruah so Egypt.”

²²Komŭnŭ di sirung jawin daya, Solomon di ka mijog di jawin mija-sambah, di yŭn-i pakat soduwŭh tangan-i

²³ka bidua, “TUHAN adi Tapa Israel, mating tapa bŭkŭn mun Kaam di rangit puan kah di ong! Kaam sita simanya Mai ngga daya Mai ka kiren di ngara pinyirindu Mai kan ngara nundok di Kaam ngga siabo atin ngara.

²⁴Kaam ingat janji adi Kaam mbŭh ndai ngga sama ku David; andu ati sopŭrŭg bang piminyu Mai mbŭh jadi bitŭtŭk.

²⁵ Ka madin, TUHAN adi Tapa Israel, aku bidua mite Kaam ingat gŭh janji Mai adi bŭkŭn adi Kaam mbŭh ndai ngga sama ku di andu Kaam kidaan nang taŭn re ari agi ndi naan so sesang-i re jadi raja ka mritah Israel, atas ngara nakit tunda pinganang Mai nimun adŭp-i.

²⁶Jadi madin, O Tapa Israel, bada jadi bitŭtŭk kayuh adi Kaam mbŭh bijanji di sama ku David, adi urun Mai.

²⁷ “Pak dapŭd kah Kaam, O Tapa, sawŭ rŭŭ di ong? Rangit dŭh sadang bayah yŭn Mai, jadi simuki Ramin adi aku mbŭh pijog re sadang yŭn Mai?

²⁸TUHAN adi Tapa ku, aku ati urun Mai. Dingah dua ku, ka nggen pimite ku andu ati.

²⁹ Grindung Ramin ati sandu ngga singarŭm, tarun yŭn adi Kaam mbŭh mien yŭn Kaam dog nyambah.

³⁰Dingah dua ku ngga dua daya Mai kan ngara nura tarun ati buang simayang. So ramin Mai di shorga dingah kieh ka apun kieh.

³¹“Kan daya dog nyarah amai ndai sarah di daya bŭkŭn ka dog taban ka mija-sambah Mai di Ramin ati ka bipayu ayŭh dŭh sarah,

³²o TUHAN, dingah so shorga ka natu sawŭ ngga dŭh urun Mai anŭ sarah. Ngukum sianŭ adi sawŭ sarah nimun patut, ka pirupas sianŭ adi dŭh sarah.

³³“Kan daya Mai Israel dog ngarah bara pinganyu ngara sabab ngara mbŭh bidosa rawan Kaam, ka komŭnŭ kan ngara pari ka Kaam ka mandŭg ka Ramin ati ngga atin rapat-i bidua mite apun so Kaam,

³⁴dingah ngara so shorga. Apun dosa daya Mai, ka taban ngara pari ka tarun tana adi Kaam mbŭh nggen di tayung-babuk ngara.

³⁵“Kan Kaam bitan ujen amai daya Mai mbŭh bidosa rawan Kaam, ka komŭnŭ kan ngara marik pimudip ngara pari ka Kaam di Ramin ati, ngga atin rapat bidua ka Kaam,

³⁶dingah ngara so shorga. Apun dosa raja ka dosa daya Israel. Ngajar ngara bada ndai kayuh di batur. Komŭnŭ, O TUHAN, pait ujen di tarun tana Mai ati, adi Kaam mbŭh nggen di daya Mai ndu bisaka.

³⁷“Kan agi apag di tarun tana puan kah sesak-andam, puan kah pimuruh dog pirusak sabak adi paras, puan kah kadis, puan kah kan daya Mai dog nyerang pinganyu, puan kah kan agi andam di ruang ngara,

³⁸dingah dua ngara. Kambŭi agi so daya Mai Israel, adi mbŭh ndŭg atin ngara bana susah payah, pakat tangan-i nura Ramin ati,

³⁹dingah dua ngara. Dingah ngara so yŭn pinyirŭŭ Mai di shorga, apun ngara, ka turung ngara. Kaam sadi adŭ adi puan pikir-kira atin manusia. Ndai di barang naan ngara nanyam patut ayŭh trima,

⁴⁰isa daya Mai nundok di Kaam sitŭkŭd ngara rŭŭ di tarun tana adi Kaam mbŭh nggen di tayung-babuk ami.

⁴¹“Kan daya tami adi rŭŭ di tarun tana adi mua juan-i dingah pasar bās Mai ngga pasar barang masam kayuh bās adi Kaam mbŭh ndai yŭn daya Mai, ka mandŭg di nyambah Kaam ka bidua di Ramin ati,

⁴²

⁴³dingah dua-i. So shorga, di yŭn Mai rŭŭ, dingah ka ndai yŭn-i kayuh adi ayŭh mite Kaam ndai, isa sopŭrŭg daya di ong bisa puan Kaam ka nundok di Kaam, nimun daya Mai Israel nundok di Kaam. Ka ngara re puan nang Ramin ati adi aku mbŭh pijog inŭh tarun yŭn Kaam dog nyambah.

⁴⁴“Kan Kaam mritah daya Mai bada di biperang rawan pinganyu ngara ka ngara bidua ka Kaam, di tadŭ yŭn ngara, nura kupo ati adi Kaam mbŭh mien ngga Ramin ati adi aku mbŭh pijog yŭn Mai,

⁴⁵dingah dua ngara. Dingah ngara so shorga, ka nggen di ngara pimanang.

⁴⁶“Kan daya Mai bidosa rawan Kaam -- ka mating daya dŭh bidosa -- ka darŭm baji Mai Kaam bada pinganyu ngara ngarah ngara ka taban ngara jadi daya-takap di ka tarun tana bŭkŭn, sunggu tarun tana anŭ jo bait kani,

⁴⁷dingah dua daya Mai. Kambŭi diginŭ di tarun tana anŭ ngara marik pimudip ngara pari ka Kaam ka bidua ka Kaam, ngaku munki masam bidosa buang ginaka ngara, dingah dua ngara, O TUHAN.

⁴⁸Kambŭi di tarun tana anŭ ngara sawŭ ka ngga siabo atin marik pimudip ngara pari ka Kaam, ka bidua ka Kaam buang ngara nura tarun tana ati adi Kaam mbŭh nggen di tayung-babuk ami, kupo ati adi Kaam mbŭh mien, ka Ramin ati adi aku mbŭh pijog yŭn Mai,

⁴⁹dingah dua ngara. So yŭn pinyirŭŭ Mai di shorga dingah ngara ka masi di ngara.

⁵⁰Apun sopŭrŭg dosa ngara ka atin ngara adi raan birawan rawan Kaam, ka bada pinganyu ngara mandis ngga ngara.

⁵¹Ngara inŭh daya Mai, adi Kaam mbŭh taban ruah so Egypt, buwang rubang apui adi bijagu anŭ.

⁵²“TUHAN Raja, isa-i Kaam ari tingga ngga masi daya Mai Israel ngga raja ngara, ka dingah dua ngara di tadŭ nga ngara bagan mite turung so Kaam.

⁵³Kaam mbŭh mien ngara so dupan dudu daya bada jadi daya Mai, sak adi nang Mai so baba Moses adi urun Mai di andu Kaam taban tayung-babuk ami ruah so Egypt.”

⁵⁴Kan Solomon muko bidua ka TUHAN, ayŭh mijog di jawin mija-sambah, di yŭn-i sidikang buang pakat tangan-i.

⁵⁵Ngga sirŭŭn bana ayŭh mite Tapa nyiberkat sopŭrŭg daya adi tikuruk diginŭ. Ayŭh nang,

⁵⁶ “Puji ka TUHAN adi mbŭh nggen di daya-I damai, nimun adi ko-I janji. Sopŭrŭg kayuh kana adi-I bijanji so Moses mbŭh jadi bitŭtŭk.

⁵⁷Isa-i TUHAN adi Tapa ta agi ngga ata, nimun Ayŭh muko agi ngga tayung-babuk ta; isa-i Ayŭh dŭh tingge ata, bait tagan ata;

⁵⁸isa-i Ayŭh bada ata nundok di adŭp-I, isa ata ari udip nanyam ka pinyiraan-I, ka sita sopŭrŭg ukum ukum-adat ngga pesan adi-I muko nggen di tayung-babuk ta.

⁵⁹Isa-i TUHAN adi Tapa ta ingat di tadŭ nga-i dua ngga pimite ati adi aku mbŭh ndai di sirung jawin-I. Isa-i Ayŭh ari masi di daya Israel ngga di raja ngara, nanyam ka pingandai ngara barang andu.

⁶⁰Jadi sopŭrŭg bangsa di ong re puan nang TUHAN sadi inŭh Tapa -- mating adi bŭkŭn.

⁶¹Isa-i angān, daya-I, ari tŭtŭd di TUHAN adi Tapa ta, sita sopŭrŭg ukum-adat ngga pinyipesan-I, nimun adi angān ndai andu ati.”

⁶²Komŭnŭ Raja Solomon ngga sopŭrŭg daya diginŭ jugan sadis ka TUHAN.

⁶³Ayŭh nyadis 22, 000 pŭrŭng sapi ka 120,000 pŭrŭng biri ndu sadis bidingan. Jadi raja ngga sopŭrŭg daya nyikudus Ramin TUHAN.

⁶⁴Di andu anŭ gŭh ayŭh nyiberkat yun badag, tarun yŭn di jawin Ramin TUHAN, ka komŭnŭ diginŭ ayŭh jugan sadis adi mŭrŭng dog badang, sadis tibaduk, ngga ramak dāng dāng sadis bidingan. Ayŭh ndai simŭnŭ sabab mija-sambah timaga mbŭh raru sŭ yŭn sopŭrŭg sadis anŭ.

⁶⁵Diginŭ di Ramin TUHAN, Solomon ngga sopŭrŭg daya Israel bigawai man siramat Bari-Dawŭn ju[26] andu. Daya mbŭh raru bagŭ so barang ka yŭn jeh so Ateng Hamath di utara ngga so baat Egypt di siratan.

⁶⁶Di andu adi mai Solomon bada daya maad. Ngara muji ayŭh ka mari gaŭn sabab sopŭrŭg berkat adi TUHAN mbŭh nggen di urun-I David ngga di daya-I Israel.