Read Biatah Bidayuh 1 RAJA 9 Bible Online

1 RAJA 9 - Biatah Bidayuh bible

1 RAJA 9

¹Ripas Raja Solomon muko pijog Ramin TUHAN ngga istana ka sopŭrŭg kayuh bŭkŭn adi ayŭh raan ndai,

² TUHAN nandŭng dinge di ayŭh, mun adi mbŭh di Gibeon.

³TUHAN nang di ayŭh, “Aku dingah dua mu. Aku nyiberkat Ramin adi kuu mbŭh pijog ndu tarun yŭn Aku dog nyambah adu adu. Aku re nguan-i ka ari grindung-i.

⁴Kambŭi kuu bituan di Aku ngga atin-tŭnggŭn ka ngga pinyitŭnggŭn, nimun sama mu, ka kambŭi kuu tunda ukum ukum-adat Ku ka ndai sopŭrŭg kayuh adi Aku mbŭh pesan bada kuu ndai,

⁵ Aku re ingat janji adi aku mbŭh ndai di sama mu di andu Aku kidaan di ayŭh nang Israel re ari dog mritah sesang sesang-i.

⁶Pak kambŭi kuu puan kah sesang sesang mu dŭh tia tunda Aku, kambŭi kuu nyibireu ukum-adat ngga pesan adi Aku mbŭh nggen di kuu, ka nyambah tapa tapa bŭkŭn,

⁷Aku re kadi daya Ku Israel so tarun tana adi Aku mbŭh nggen di ngara. Aku re tagan gŭh Ramin ati adi Aku mbŭh nyiberkat ndu tarun yŭn Aku dog nyambah. Daya di barang yŭn re tawŭh ka ngamun Israel.

⁸ Ramin ati re jadi tugung rakang tibawang,[27] ka barang naan daya adi murah re gŭgŭh buang nginga. ‘Mani TUHAN ndai simŭnŭ di tarun tana ngga di Ramin ati?’ ngara re siken.

⁹Daya re nam, ‘Ayŭh simŭnŭ amai ngara tagan TUHAN adi Tapa ngara, adi ko taban tayung-babuk ngara ngga ruah so Egypt. Ngara tunda tapa tapa bŭkŭn ka nyambah-i. Anŭ inŭh sabab TUHAN mbŭh taban pinyirusag ati ka ngara.’ ”

¹⁰Solomon pijog Ramin TUHAN ngga Istana-i ju sawa.

¹¹Raja Hiram so Tyre muko nggen di ayŭh sopŭrŭg kayuh sedar ngga kayuh sipres ka sopŭrŭg mas adi ayŭh raan yŭn kraja anŭ. Ripas-i mbŭh kamas, Raja Solomon nggen di Hiram duwŭh puru kupo di gadung tarun tana Galilee.

¹²Hiram di tingga kupo kupo anŭ, ka dŭh munos asŭng-i kiris.

¹³Jadi ayŭh nang di Solomon, “Ati kah kupo kupo adi kuu nggen di aku!” Sabab anŭ meh tarun tana anŭ babŭ dog kadŭn Cabul.[28]

¹⁴Hiram muko pait rabis so 4,000 kilogram mas ka Solomon.

¹⁵Raja Solomon pakai kraja takan ngga pijog Ramin TUHAN ka istana, ka ngisi tana di parad tura ka timor kupo, ka pijog sindung kupo. Ayŭh pakai kraja takan gŭh ngga pijog kupo Hazor, Megiddo, ka Gezer.

¹⁶(Raja Egypt muko nyerang Gezer ka sirabut-i, siŭ sopŭrŭg daya-i ka sigot-i. Komŭnŭ ayŭh nggen-i ndu pinganggen sawan di anak dayung-i di andu-i banan ngga Solomon.

¹⁷Solomon pari pijog-i.) Pakai kraja takan, Solomon pijog gŭh Beth Horon Saba,

¹⁸Baalath, Tamar di tarun tana-pajam Judah,

¹⁹kupo kupo di yŭn nyikŭn biranja man, kupo kupo yŭn nyikŭn dudu kuda ngga krita kuda, ka barang masam kayuh bŭkŭn adi raan-i pijog di Jerusalem, di Lebanon, ka di tarun yŭn adi bŭkŭn adi di ribo pritah-i.

²⁰Yŭn kraja takan Solomon pakai bara sesang daya Canaan adi daya Israel dŭh siŭ di andu ngara tambit tana ngara. Nambah ngara inŭh daya Amor, daya Hitti, daya Periz, daya Hivi, ngga daya Jebus. Sesang sesang ngara anŭ babŭ jadi urun ndŭg andu ati.

²²Solomon dŭh piurun daya Israel; ngara jadi soldadu-i, pingubak soldadu, pingibās soldadu, pinguru krita kuda, ka bara soldadu pinunggang kuda.

²³Agi 550 naan pinurung adi tukang ngatur kraja takan adi ndai barang mun kraja piramin yŭn Solomon.

²⁴Solomon ngisi tana di parad tura ka timor kupo, ripas sawŭn-i, adi anak raja Egypt, mbŭh bipindah so Kupo David di ka istana adi Solomon mbŭh pijog yŭn-i.

²⁵ Taruh kari darŭm ndi sawa Solomon jugan sadis badang ngga sadis bidingan di tunduh mija-sambah adi ayŭh mbŭh pijog yŭn TUHAN. Ayŭh badang kimanyan[29] yŭn TUHAN. Simŭnŭ Solomon ngamas kraja-i pijog Ramin TUHAN.

²⁶Raja Solomon ndai gŭh dudu kapar di Eziongeber, adi sindŭk Elath, di tabing Tanjung Aqaba, di tarun tana Edom.

²⁷Raja Hiram pait kudu kudu naan daya adi kanyet buang pandai nyiraja di kapar bada nyiraja ayō daya Solomon.

²⁸Ngara birayar ka tarun tana Ophir, ka taban mari rabis so 14,000 kilogram mas yŭn Solomon.