Read Biatah Bidayuh 2 RAJA 1 Bible Online

2 RAJA 1 - Biatah Bidayuh bible

2 RAJA 1

¹Ripas Ahab adi Raja Israel mbŭh kabŭs, rais Moab rawan Israel.

²Raja Ahaziah di Israel rabu so awah di sambu istana-i di Samaria ka mbŭh bana biragan. Ayŭh pait kada pinyisung bada di bisiken ngga Baalzebub, tapa di kupo Philistine di Ekron, an puan re bua kah dŭh ayŭh.

³Pak malaikat TUHAN pesan Elijah, nabi di Tishbe, bada di bidapŭd ngga bara pinyisung Raja Ahaziah ka siken ngara, “Mani angān an di bisiken ngga Baalzebub, tapa di Ekron? Angān pikir Tapa mating di Israel kah?

⁴Kidaan di raja kayuh adi TUHAN nang, ‘Kuu dŭh re bua so andam mu anŭ; kuu re kabŭs!’ ” Elijah ndai nanyam ka pesan TUHAN,

⁵ka bara pinyisung anŭ pari ka yŭn raja. “Mani angān pari?” ayŭh siken.

⁶Ngara nam, “Kieh bidapŭd ngga ndi naan daya adi bada kieh pari ka kidaan di kaam kayuh adi TUHAN nang, ‘Mani kuu pait pinyisung bada di bisiken ngga Baalzebub, tapa di Ekron? Angān pikir Tapa mating di Israel kah? Kuu dŭh re bua so andam mu anŭ; kuu re kabŭs!’ ”

⁷“Munki daya anŭ?” raja siken.

⁸ “Ayŭh nēn jipo adi dog ndai so kurit dāng, dog ngabŭt ngga[1] abŭt birurang,” ngara nam. “Elijah anŭ!” raja nang.

⁹Komŭnŭ ayŭh pait ndi naan pingubak soldadu ngga 50 naan daya bada di tambit Elijah. Pingubak anŭ dapŭd ayŭh guru di ndi sandah ka nang di ayŭh, “Daya Tapa, raja bada kaam mūn.”

¹⁰ “Kambŭi aku ati daya Tapa,” Elijah nam, “Isa-i apui mūn so shorga ka siŭ kuu ngga bara daya mu!” Nganŭ gŭh apui mūn so rangit ka siŭ pingubak anŭ ngga bara daya-i.

¹¹Raja pait ndi naan dinge pingubak ngga 50 naan daya, adi maad sandah anŭ ka nang di Elijah, “Daya Tapa, raja bada kaam mūn so nŭ madin!”

¹²“Kambŭi aku ati daya Tapa,” Elijah nam, “Isa-i apui mūn so shorga ka siŭ kuu ngga bara daya mu!” Nganŭ apui Tapa mūn so rangit ka siŭ pingubak anŭ ngga bara daya-i.

¹³Raja rasu pait ndi naan pingubak ngga 50 naan daya. Ayŭh maad sandah anŭ, sagan karŭb-i di sirung jawin Elijah ka bandar mite, “Daya Tapa, masi di aku ka di bara daya ku. Dŭhnyah siŭ kieh!

¹⁴Pingubak adi duwŭh anŭ ngga bara daya ngara dog siŭ apui so rangit; pak turung masi di aku!”

¹⁵Malaikat TUHAN nang di Elijah, “Mūn ngga ayŭh, ka dŭhnyah taru.” Jadi Elijah di ka yŭn raja ayō pingubak anŭ

¹⁶ka-i nang di ayŭh, “Ati inŭh kayuh adi TUHAN nang: ‘Sabab kuu pait pinyisung bada di siken Baalzebub, tapa di Ekron -- mun adi mating Tapa di Israel yŭn bisiken -- kuu dŭh re bua; kuu re kabŭs!’ ”

¹⁷Ahaziah kabŭs, sak adi TUHAN muko kidaan so Elijah. Ahaziah dŭh biyŭn anak dari, jadi jurud dari-i[2] Joram gati ayŭh jadi raja di sawa adi duwŭh darŭm pinyipritah Jehoram anak Jehoshaphat, raja di Judah.

¹⁸Sopŭrŭg kayuh adi bŭkŭn adi Raja Ahaziah mbŭh ndai dog nuris darŭm Surat Dundan bara Raja Israel.