Read Biatah Bidayuh 2 RAJA 10 Bible Online

2 RAJA 10 - Biatah Bidayuh bible

2 RAJA 10

¹Bara sesang Raja Ahab agi 70 naan rŭŭ di kupo Samaria. Jehu nuris surat ka pait-i ka bara pinguasa di kupo,[19] ka bara pingibās, ka bara adi kingat jaga bara sesang Ahab. Sakati pinganang darŭm surat anŭ:

²“Angān adi kingat bara sesang raja ka angān biyŭn dudu krita kuda ngga dudu kuda, dudu sinyata, ka kupo kupo adi bikuta. Jadi meh, kan angān mbŭh trima surat ati,

³angān an mien ndi naan so dudu sesang raja adi situgu ka patut, ka bada-i jadi raja. Angān an birawan ngibān ayŭh.”

⁴Bara pimritah Samaria mbŭh raru taru. “Simuki ata re tungang rawan Jehu, sadang gŭh Raja Joram ngga Raja Ahaziah dŭh gŭh tungang?”

⁵Jadi sianŭ adi tukang kingat kayuh di istana ngga pinurung adi tukang ngatur kupo, samah ngga bara pingibās ngga bara adi tukang kingat jaga bara sesang Ahab, pait pinganang ati ka Jehu: “Kieh ati urun mai ka kieh mbŭh sidia an ndai nanyam pinyiraan mai. Pak kieh dŭh re tijuan asi asi jadi raja; ndai adŭ anŭ adi kaam pikir patut.”

⁶Jehu nuris dinge surat ka ngara: “Kambŭi angān parad ka aku, ka mbŭh sidia an tunda pingatur ku, taban ka yŭn ku di Jezreel dudu ubak bara sesang Ahab jam ati andu sipagi.” 70 puru naan sesang Raja Ahab mbŭh di ribo pinyijaga bara pingibās Samaria, adi nyiran ngara.

⁷Kan surat Jehu mbŭh dog trima, bara pinguru Samaria siŭ sopŭrŭg sesang Ahab adi 70 naan anŭ, na ubak ngara darŭm bakur, ka pait-i ka yŭn Jehu di Jezreel.

⁸Kan Jehu dog kidaan nang ubak ubak sesang Ahab mbŭh dog taban, ayŭh mritah bada sopŭrŭg-i dog nugung duwŭh tugung di tiban-bās kupo ka dog tandah diginŭ ndŭg isan isan andu jawa ndi.

⁹Ngga isan isan andu jawa ndi anŭ, Jehu di ka tiban-bās kupo anŭ, ka nang di dudu daya adi agi diginŭ, “Aku inŭh adi bipekat rawan Raja Joram ka siŭ ayŭh; angān dŭh dapu tanggong di kayuh anŭ. Pak asi siŭ sopŭrŭg ngara ati?

¹⁰Ati mbŭh kiren nang sopŭrŭg adi TUHAN mbŭh nang pasar bara sesang Ahab dŭh re dŭh jadi bitŭtŭk. TUHAN mbŭh ndai kayuh adi-I mbŭh bijanji so baba nabi Elijah.”

¹¹ Komŭnŭ Jehu siŭ sopŭrŭg madis Ahab adi rŭŭ di Jezreel, ka sopŭrŭg pingubak di ribo-i, bara dingan-i, ka bara imam-i. Ndi naan mating gŭh ngara dŭm.

¹²Jehu bu so Jezreel, di ka Samaria. Di aran, di tarun yŭn adi dog kadŭn “Bari Pingingat-biri,”

¹³ayŭh dapŭd kudu kudu naan madis Ahaziah raja Judah, ka siken ngara, “Asi angān?” “Bara madis Ahaziah,” ngara nam. “Kieh re di ka Jezreel di nggen tabi di bara anak Rani Jezreel ngga bara rawang raja adi bŭkŭn.”

¹⁴Jehu mritah bara daya-i, “Nakap ngara ka dŭhnyah diŭ siŭ!” Bara daya Jehu nakap ngara, ka ayŭh bada ngara dog siŭ sindŭk ndi rubang di arong anŭ. Ngara anŭ agi 42 naan, ka ndi naan mating gŭh ngara dŭm.

¹⁵Jehu matak dinge, ka di aran ayŭh bidapŭd ngga Jonadab anak Rechab. Jehu tabi ayŭh ka nang, “Ata duwŭh samah pikir-kira. An kuu batu aku?” “Aku an,” Jonadab nam. “Ton tangan mu ka aku garang,” Jehu nam. Ngara duwŭh bidigŭng tangan, ka Jehu turung tarik ayŭh ka darŭm krita kuda-i,

¹⁶buang nang, “Tunda aku ka tingga ngga batŭh adŭp mu munki masam tŭtŭd aku di TUHAN.” Ka ngara samah pakai krita kuda anŭ di ka Samaria.

¹⁷Kan ngara mbŭh ndŭg nŭ, Jehu siŭ sopŭrŭg madis Ahab, ndi naan mating gŭh dog kidŭm. Anŭ inŭh kayuh adi TUHAN mbŭh kidaan di Elijah nang re jadi.

¹⁸Jehu bagan sopŭrŭg daya Samaria bada mandŭg tikuruk ka nang, “Raja Ahab dŭh bandar bituan di tapa Baal, pak aku re rabis bandar bituan di ayŭh.

¹⁹Bagan bada tikuruk sopŭrŭg nabi Baal, sopŭrŭg adi nyambah ayŭh, ka sopŭrŭg imam-i. Sopŭrŭg dŭh siŭn dŭh mandŭg. Aku re jugan sadis bās ka Baal, ka asi asi adi dŭh mandŭg re dog siŭ.” (Ati inŭh akar Jehu ngga-i re siŭ sopŭrŭg adi nyambah Baal.)

²⁰Komŭnŭ Jehu nang, “Piagah ka miratak andu ngga nyambah Baal!” Ka-i sawŭ dog ndai simŭnŭ,

²¹ka Jehu pait pinganang di ndi tarun tana Israel. Sopŭrŭg adi nyambah Baal mandŭg; ndi naan mating gŭh dŭh mandŭg. Sopŭrŭg ngara mŭrŭt bari-sambah Baal, ka-i mbŭh brisi ndŭg barang parad.

²²Komŭnŭ Jehu mritah imam adi tukang jaga jipo-ambu bada taban jipo jipo-ambu ngga ruah ka nggen di ngara.

²³Ripas anŭ, adŭp Jehu mŭrŭt bari-sambah ngga Jonadab anak Rechab ka nang di bara daya adi agi diginŭ, “Ingat, kaŭs daya adi nyambah Baal adŭ bisa mŭrŭt, ka daya adi nyambah TUHAN dŭh siŭn.”

²⁴Komŭnŭ ayŭh ngga Jonadab mŭrŭt di jugan sadis sadis ngga sadis badang ka Baal. Ayŭh muko bada 80 puru naan daya-i sidia di sapa bari-sambah ka mbŭh kidaan di ngara nang: “Angān siŭ sopŭrŭg ngara anŭ; asi asi so angān adi bada ndi naan so ngara rupas re bayar ngga asŭng adŭp-i!”

²⁵Kan Jehu muko jugan sadis sadis anŭ, ayŭh nang di bara daya-i anŭ, “Di mŭrŭt ka siŭ sopŭrŭg ngara; dŭhnyah bada asi asi so ngara rupas!” Ngara nyitak pedang ngara ka rasu mŭrŭt, siŭ sopŭrŭg ngara, ka tarik tadang ngara ka sapa. Komŭnŭ ngara mŭrŭt ka darŭm birit adi tura ka darŭm bari-sambah anŭ,

²⁶taban ngga ruah uros pirapu' adi agi diginŭ, ka badang-i.

²⁷Jadi ngara pirusak uros pirapu' samŭn bari-sambah anŭ, ka bada-i jadi bandong -- adi babŭ ndŭg andu ati.

²⁸Simŭnŭ inŭh Jehu pirarap sambah Baal di Israel.

²⁹ Pak ayŭh bidosa mun Raja Jeroboam, adi taban Israel bidosa nyambah anak anak dari sapi mas adi-i pijog di Bethel ngga Dan.

³⁰TUHAN nang di Jehu, “Kuu mbŭh ndai di tunduh Ahab sopŭrŭg kayuh adi Aku bada kuu ndai. Jadi Aku bijanji ngga kuu nang sesang mu ndŭg turap pat re jadi raja Israel.”

³¹Pak Jehu dŭh tunda ngga siabo asŭng-i ukum-adat TUHAN, adi Tapa Israel. Tibarik ayŭh tunda urah Jeroboam, adi taban Israel bidosa.

³²Di tipuh anŭ TUHAN piguru bada sŭ tarun tana Israel. Raja Hazael so Syria ngarah sopŭrŭg tarun tana daya Israel

³³adi tura ka timor Yang Jordan, jeh ndŭg kupo Aroer di Yang Arnon -- samŭn tarun tana Gilead ngga Bashan, di yŭn tibaran-asar Gad, Reuben, ngga tibaran-asar Manasseh Timor rŭŭ.

³⁴Sopŭrŭg pingandai Jehu adi bŭkŭn, samŭn kraja pingandai pagan-i, agi dog nuris darŭm Surat Dundan bara Raja Israel.

³⁵Ayŭh kabŭs ka dog kubur di Samaria, ka anak-i Jehoahaz gati ayŭh jadi raja.

³⁶Jehu mritah Samaria darŭm-i jadi raja Israel sitŭkŭd 28 sawa.