Read Biatah Bidayuh 2 RAJA 12 Bible Online

2 RAJA 12 - Biatah Bidayuh bible

2 RAJA 12

¹Di sawa adi ju darŭm pinyipritah Jehu adi raja Israel, Joash jadi raja Judah. Ayŭh mritah di Jerusalem 40 puru sawa. Sindŭ-i Zibiah, so kupo Beersheba.

²Sitŭkŭd umbur-i ayŭh ndai kayuh adi pimunos asŭng TUHAN, sabab Jehoiada adi imam mbŭh ngajar ayŭh.

³Pak, tarun yŭn bisambah adat karŭm gibayuh dog nyirubuh, ka bara daya gibabŭ jugan sadis ka badang kimanyan diginŭ.

⁴ Joash bagan bara imam ka mritah ngara bada nguruk duit adi dog bayar ngga bisadis di Ramin TUHAN, samŭn duit suke adi dog bayar ngga ndai sadis adi barang andu, ngga duit adi dog nggen braŭn.

⁵Barang naan imam dapu tanggong yŭn duit adi daya adŭp-i bayar, ka duit anŭ dŭh siŭn dŭh dog pakai ngga nyurat Ramin TUHAN, nimun patut.

⁶Pak ndŭg sawa adi 23 darŭm pinyipritah Joash bara imam anŭ gibayuh nyurat Ramin TUHAN.

⁷Jadi Joash bagan Jehoiada ngga bara imam adi bŭkŭn ka siken ngara, “Mani angān dŭh nyurat Ramin TUHAN? So madin angān dŭh siŭn nyikŭn duit adi angān trima anŭ; angān dŭh siŭn dŭh nyerah-i, isa Ramin TUHAN dapŭd dog nyurat.”

⁸Bara imam situju di pingatur anŭ, ka situju gŭh adŭp ngara dŭhsah nyurat Ramin TUHAN.

⁹Komŭnŭ Jehoiada tambit ndi pati, ndai rubang di tŭtŭp-i, ka na-i sindŭk mija-sambah, tura ka tauh adi so daya mŭrŭt Ramin TUHAN. Bara imam adi jaga di tiban na darŭm-i sopŭrŭg duit adi dog nggen daya.

¹⁰Kan duit mbŭh raru bagŭ darŭm pati anŭ, tukang pinuris yŭn raja ngga Imam Bās mandŭg, piriris pirak anŭ, ka nimbang-i.[22]

¹¹Ripas nuris kiang-i adi mbŭh batur, ngara nggen pirak anŭ ka sianŭ adi nguasa kraja nyurat Ramin TUHAN. Ngara anŭ inŭh adi bayar gaji tukang kayuh, gaji ngara adi tukang pijog,

¹²gaji ngara adi tukang batuh, adi tukang mŭŭt, adi tukang miris betang kayuh ngga batuh adi ngga nyurat, ka bayar gŭh sopŭrŭg kayuh adi bŭkŭn.

¹³Duit anŭ dŭh dog pakai ngga bayar kraja ndai saker pirak, makuk, trompet, puan kah pingakas adi ngga sita prita, puan kah tadŭ tadŭ pimakai adi dog ndai so pirak bait mas.

¹⁴Sopŭrŭg-i dog pakai ngga bayar gaji bara adi nyiraja ka ngga miris preka piramin adi ngga nyurat.

¹⁵ Bara daya adi tukang nguasa kraja an daya adi sukup jujur, isa dŭhsah siken ngara munki dudu duit anŭ dog pakai.

¹⁶ Duit adi dog nggen yŭn sadis bayar gati rugi ngga yŭn sadis taran dosa dŭh dog na darŭm pati anŭ. Duit anŭ dog dapu bara imam.

¹⁷Di tika anŭ Raja Hazael adi raja Syria, nyerang ka ngarah kupo Gath; muko anŭ ayŭh ndai pikir-i an di nyerang Jerusalem.

¹⁸Raja Joash di Judah tambit sopŭrŭg pinganggen adi bara raja adi diŭ so adŭp, Jehoshaphat, Jehoram, ngga Ahaziah mbŭh nitah ka TUHAN, nambah anŭ ngga dudu pinganggen so adŭp-i samŭn sopŭrŭg mas so pinyirikŭn Ramin TUHAN ngga di darŭm istana, ka pait sopŭrŭg-i ndu pinganggen ka Raja Hazael, adi rasu taban bara soldadu-i bu so Jerusalem.

¹⁹Sopŭrŭg pingandai Raja Joash adi bŭkŭn agi dog nuris darŭm Surat Dundan bara Raja Judah.

²⁰Kada so bara pinurung Raja Joash bipekat rawan ayŭh, ka duwŭh naan so ngara, Jozacar anak Shimeath ngga Jehozabad anak Shomer, siŭ ayŭh di ramin adi dog pijog di tana ngisi di parad timor Jerusalem, di aran adi mūn ka Silla. Joash dog kubur di kubur raja di Kupo David, ka anak-i Amaziah gati ayŭh jadi raja.