Read Biatah Bidayuh 2 RAJA 13 Bible Online

2 RAJA 13 - Biatah Bidayuh bible

2 RAJA 13

¹Di sawa adi 23 darŭm pinyipritah Joash anak Ahaziah raja di Judah, Jehoahaz anak Jehu jadi raja di Israel, ka ayŭh mritah di Samaria simŭng ju sawa.

²Mun Raja Jeroboam adi diŭ so ayŭh, ayŭh bidosa rawan TUHAN ka taban Israel ngga bidosa; bŭn-i pasan urah arap-i.

³Jadi TUHAN baji di Israel, ka Ayŭh tandah Raja Hazael so Syria ngga anak-i Benhadad ari ngarah Israel.

⁴Komŭnŭ Jehoahaz bidua ka TUHAN, ka TUHAN, kiris munki masam arap raja Syria kinanyuh bara daya Israel, nam dua-i.

⁵TUHAN pait ndi naan pinguru ka Israel, adi pirupas ngara so daya Syria, ka daya Israel meh rasu udip darŭm damai, mun adi dawŭ-i.

⁶Pak ngara dŭh pasan dosa adi Raja Jeroboam mbŭh taban ngara ndai; ngara babŭ[23] ndai-i; ka uros gayŭn tapa Asherah babŭ di Samaria.

⁷Bara soldadu bisinyata Jehoahaz mating tia dŭm, adŭ-i 50 naan adi bara soldadu pinunggang kuda, simŭng krita kuda, ka 10,000 soldadu adi panu kaja, sabab raja Syria mbŭh siŭ adi bŭkŭn, adi-i digang ka pirandŭk mun dabu tana.

⁸Sopŭrŭg pingandai Jehoahaz adi bŭkŭn samŭn pingandai pagan-i agi dog nuris darŭm Surat Dundan bara Raja Israel.

⁹Ayŭh kabŭs ka dog kubur di Samaria, ka anak-i Jehoash gati ayŭh jadi raja.

¹⁰Di sawa adi 37 darŭm pinyipritah Joash Raja di Judah, Jehoash anak Jehoahaz jadi raja di Israel, ka ayŭh mritah Samaria simŭng nŭm sawa.

¹¹Ayŭh gŭh bidosa rawan TUHAN ka mbŭh tunda suto arap Raja Jeroboam, adi taban Israel bidosa.

¹²Sopŭrŭg pingandai Jehoash adi bŭkŭn, samŭn pinyipagan-i darŭm perang rawan Raja Amaziah so Judah, agi dog nuris darŭm Surat Dundan bara Raja Israel.

¹³Jehoash kabŭs ka dog kubur di kubur raja di Samaria, ka anak-i Jeroboam II gati ayŭh jadi raja.

¹⁴ Nabi Elisha mbŭh bana birandam, ka darŭm ayŭh mbŭh sindŭk re kabŭs Raja Jehoash so Israel di munan ayŭh. “Sama ku, sama ku!” ayŭh nang buang-i sien. “Kaam inŭh pingibān adi raru bake yŭn Israel!”

¹⁵“Di tambit ndi bawŭh ngga kada reja-panah,” Elisha mritah ayŭh. Jehoash rasu di tambit-i,

¹⁶ka Elisha bada ayŭh sidia yŭn re nimbak-i. Raja sawŭ ndai simŭnŭ, ka Elisha na tangan-i di tunduh tangan raja.

¹⁷Komŭnŭ, tunda pinganang nabi anŭ, raja kuka pinjan adi nura Syria. “Nimbak meh reja-panah!” Elisha nang. Kan raja nimbak reja-panah anŭ, nabi nang, “Kuu inŭh reja-panah TUHAN, adi ngga-I re manang ngarah Syria. Kuu re biperang rawan daya Syria ndŭg ka kuu mbŭh ngarah ngara.”

¹⁸Komŭnŭ Elisha bada raja tambit reja-panah adi bŭkŭn ka mupu tana pakai-i. Raja mupu tana pitaruh kari, ka komŭnŭ rŭŭ.

¹⁹Anŭ bada Elisha tuas, ka nang di raja, “Kuu patut mupu pirimŭh puan kah pikinŭm kari, simŭnŭ kuu dapŭd batur batur manang ngarah daya Syria; pak kuu batur re ngarah ngara pitaruh kari adŭ.”

²⁰Elisha kabŭs ka dog kubur. Barang sawa tibaran pirupak so Moab nyerang tana Israel.

²¹Agi ndi sidah, di tika nyikubur, ndi so dudu tibaran pirupak anŭ tatŭng, ka bara daya taran adŭ tadang anŭ ka darŭm kubur Elisha ka bikaduh bu.[24] Kan tadang anŭ dog turang Elisha, daya anŭ pari udip dinge ka rasu mijog.

²²Raja Hazael so Syria kinanyuh daya Israel sitadŭn pinyipritah Jehoahaz,

²³pak TUHAN mandis ka masi di ngara. Ayŭh dŭh raan ngara dog pirabur, pak turung ngara, sabab simanya-I ngga Abraham, Isaac, ka Jacob. Ayŭh bŭn kambŭt daya-I.

²⁴Di tika Hazael adi raja Syria kabŭs, anak-i Benhadad jadi raja.

²⁵Komŭnŭ Raja Jehoash so Israel ngarah Benhadad pitaruh kari ka pari tambit kupo kupo adi ko dog tambit Benhadad di jaman pinyipritah Jehoahaz, adi sama Jehoash.