Read Biatah Bidayuh 2 RAJA 14 Bible Online

2 RAJA 14 - Biatah Bidayuh bible

2 RAJA 14

¹Di sawa adi duwŭh darŭm pinyipritah Jehoash anak Jehoahaz, jadi raja di Israel, Amaziah anak Joash jadi raja di Judah

²kan umbur-i 25. Ayŭh mritah di Jerusalem 29 sawa. Sindŭ-i inŭh Jehoaddin, so Jerusalem.

³Ayŭh ndai kayuh adi pimunos asŭng TUHAN, pak ayŭh dŭh mun babuk-i Raja David; ayŭh ndai kayuh adi sama-i Joash mbŭh ndai.

⁴Ayŭh dŭh nyirubuh tarun yŭn bisambah adat karŭm, ka daya gibabŭ jugan sadis ka badang kimanyan diginŭ.

⁵Kan pinyipritah Amaziah mbŭh sukup tagap, ayŭh siŭ sopŭrŭg pinurung adi ko siŭ sama-i, raja adi mritah sibayuh adŭp-i.

⁶ Amaziah dŭh siŭ anak ngara pak tunda kayuh adi TUHAN mbŭh pesan di Ukum-adat Moses: “Pimas dŭh siŭn dog nggen ukum kabŭs amai sarah adi anak ngara ko ndai, ka anak dŭh siŭn dog nggen ukum kabŭs amai sarah adi pimas ngara ko ndai; daya siŭn dog nggen ukum kabŭs amai sarah adi adŭp ngara mbŭh ndai.”

⁷Amaziah siŭ 10,000 soldadu daya Edom di Rubān Garo; ayŭh sirabut kupo Sela darŭm biperang ka kadŭn-i Joktheel, dŭn-i adi babŭ ndŭg andu ati.

⁸Komŭnŭ Amaziah pait bara pinyisung ka Jehoash adi raja Israel, natang ayŭh mite biperang.[25]

⁹Pak Raja Jehoash pait pinyinam-i: “Agi ndi sidah, tŭngŭn reja di Darŭd Lebanon pait pinganang ka tŭngŭn sedar: ‘Nyibandar anak dayung mu banan ngga anak dari ku.’ Pak dāng tarun murah ka bidigang di tŭngŭn reja anŭ.

¹⁰Amaziah, kuu mbŭh ngarah daya Edom, ka kuu madin mbŭh raru gambung. Kuu patut mbŭh puas asŭng ngga pimanang mu anŭ ka rŭŭ di arŭn. Mani sah jiroh pito adi re taban pinyirusag di adŭp mu ka di daya mu?”

¹¹Pak Amaziah dŭh mbit piduri di pinganang anŭ, ka Raja Jehoash ruah ngga bara soldadu-i di rawan ayŭh di Beth Shemesh di Judah.

¹²Soldadu Amaziah arah, ka sopŭrŭg ngara babak bu pari ka ramin adŭp-i.

¹³Jehoash tambit Amaziah jadi daya-takap, masang ka Jerusalem ka nyirubuh sindung kupo so parad Tiban Ephraim ndŭg tiban adi dog kadŭn Tiban Sikuh, kira ka 200 mita jo-i.

¹⁴Ayŭh tambit sopŭrŭg pirak ngga mas adi tungang-i dapŭd, sopŭrŭg pingakas Ramin TUHAN samŭn sopŭrŭg rata istana, ka taban-i ngga pari ka Samaria. Ayŭh taban gŭh kudu kudu naan daya ndu daya-tubos.

¹⁵Barang masam pingandai Jehoash adi bŭkŭn, samŭn pinyipagan-i darŭm perang rawan Raja Amaziah so Judah, agi dog nuris darŭm Surat Dundan bara Raja Israel.

¹⁶Jehoash kabŭs ka dog kubur di kubur raja di Samaria, ka anak-i Jeroboam II gati ayŭh jadi raja.

¹⁷Amaziah, raja Judah udip simŭng rimŭh sawa ripas Jehoash raja Israel mbŭh kabŭs.

¹⁸Barang masam pingandai Amaziah adi bŭkŭn agi dog nuris darŭm Surat Dundan bara Raja Judah.

¹⁹Di Jerusalem mbŭh agi daya bipekat an siŭ Amaziah, jadi ayŭh bu di ka kupo Lachish, pak pinganyu-i tunda ayŭh ka siŭ ayŭh diginŭ.

²⁰Tadang-i dog na di tunduh kuda ka dog taban pari ka Jerusalem ka dog kubur di kubur raja di Kupo David.

²¹Daya di Judah garar anak-i Uzziah adi simŭng nŭm sawa umbur-i jadi raja.

²²Uzziah pari sirabut Elath ripas sama-i mbŭh kabŭs.

²³Di sawa adi simŭng-nŭm darŭm pinyipritah Amaziah anak Joash, jadi raja Judah, Jeroboam anak Jehoash jadi raja di Israel. Ayŭh mritah di Samaria 41 sawa.

²⁴Ayŭh bidosa rawan TUHAN, tunda suto arap Raja Jeroboam anak Nebat, adi taban Israel bidosa.

²⁵ Ayŭh pari sirabut sopŭrŭg tarun tana adi taŭn muko dawŭ-i tung Israel, so Ateng Hamath di tura ka utara ndŭg Rawŭt Pide di tura ka siratan. Anŭ inŭh kayuh adi TUHAN, adi Tapa Israel, mbŭh bijanji, an nggen, so baba urun-I nabi Jonah anak Amittai so Gath Hepher.

²⁶TUHAN kiris sangsara daya Israel mbŭh raru sipŭ;[26] ka taŭn mating adŭ daya turung ngara.

²⁷Pak dŭh-i pinŭtŭn TUHAN an pirarap Israel, jadi Ayŭh nyiramat ngara ngga pritah Raja Jeroboam II.

²⁸Barang masam pingandai Jeroboam II adi bŭkŭn, pinyipagan-i darŭm bisaad, ka munki ayŭh sirabut pari Damascus ngga Hamath yŭn Israel,[27] agi dog nuris darŭm Surat Dundan bara Raja Israel.

²⁹Jeroboam kabŭs ka dog kubur di kubur raja, ka anak-i Zechariah gati ayŭh jadi raja.