Read Biatah Bidayuh 2 RAJA 15 Bible Online

2 RAJA 15 - Biatah Bidayuh bible

2 RAJA 15

¹Di sawa adi 27 darŭm pinyipritah Jeroboam II raja di Israel, Uzziah anak Amaziah jadi raja di Judah

²kan umbur-i simŭng nŭm sawa. Ayŭh mritah di Jerusalem 52 sawa. Sindŭ-i inŭh Jecoliah so Jerusalem.

³Tunda suto danding sama adŭp-i, ayŭh ndai kayuh adi pimunos asŭng TUHAN.

⁴Pak tarun tarun yŭn bisambah adat karŭm dŭh dog nyirubuh, ka daya gibabŭ jugan sadis ka badang kimanyan diginŭ.

⁵TUHAN kudog Uzziah ngga andam kurit adi bisā sitŭkŭd umbur-i. Ayŭh rŭŭ di ramin sadi adŭp-i, dŭh tia ndai kraja, sitadŭn anak-i Jotham mritah rais.

⁶Barang masam pingandai Uzziah adi bŭkŭn agi dog nuris darŭm Surat Dundan bara Raja Judah.

⁷ Uzziah kabŭs ka dog kubur di tana kubur raja di Kupo David, ka anak-i Jotham gati ayŭh jadi raja.

⁸Di sawa 38 darŭm pinyipritah Uzziah raja di Judah, Zechariah anak Jeroboam II jadi raja di Israel. Ayŭh mritah di Samaria nŭm buran.

⁹Ayŭh, mun bara raja adi diŭ so adŭp-i, bidosa rawan TUHAN. Ayŭh tunda suto danding adi arap so Raja Jeroboam anak Nebat, adi taban Israel bidosa.

¹⁰Shallum anak Jabesh bipekat rawan Raja Zechariah, siŭ ayŭh di Ibleam,[28] ka gati ayŭh jadi raja.

¹¹Barang masam pingandai Zechariah agi dog nuris darŭm Surat Dundan bara Raja Israel.

¹² Jadi meh janji adi TUHAN mbŭh ndai ngga Raja Jehu mbŭh jadi bitŭtŭk: “Sesang mu, ndŭg turap pat,[29] re jadi raja Israel.”

¹³Di sawa adi 39 darŭm pinyipritah Uzziah raja di Judah, Shallum anak Jabesh jadi raja di Israel. Ayŭh mritah di Samaria ndi buran.

¹⁴Menahem anak Gadi matak so Tirzah di ka Samaria, siŭ Shallum, ka gati ayŭh jadi raja.

¹⁵Barang masam pingandai Shallum adi bŭkŭn agi dog nuris darŭm Surat Dundan bara Raja Israel.

¹⁶Darŭm Menahem matak so Tirzah, ayŭh pirabur kupo Tappuah,[30] bara daya adi rŭŭ diginŭ, ka samŭn tarun tana adi maning anŭ, sabab kupo anŭ dŭh an nyerah ka ayŭh. Ayŭh nyeja tain sopŭrŭg dayung adi bite.

¹⁷Di sawa adi 39 darŭm pinyipritah Uzziah raja di Judah, Menahem anak Gadi jadi raja di Israel. Ayŭh mritah di Samaria simŭng sawa.

¹⁸Ayŭh bidosa rawan TUHAN, ka ndŭg andu adi ngga-i kabŭs ayŭh tunda suto danding adi arap so Raja Jeroboam anak Nebat, adi taban daya Israel bidosa ndŭg andu adi ngga-i kabŭs.

¹⁹Tiglath Pileser, adi raja-empaya Assyria, nyerang Israel, ka Menahem nggen di ayŭh 34,000 kilogram pirak ramŭn an dapŭd batu so ayŭh ngga nagap kuasa Menahem di Israel.

²⁰Menahem dapŭd kiang duit anŭ so bara daya kaya di Israel amai ayŭh takan barang naan ngara nggen 50 kiping pirak. Ka Tiglath Pileser meh pari ka rais adŭp-i.

²¹Barang masam pingandai Menahem adi bŭkŭn agi dog nuris darŭm Surat Dundan bara Raja Israel.

²²Ayŭh kabŭs ka dog kubur, ka anak-i Pekahiah gati ayŭh jadi raja.

²³Di sawa 50 darŭm pinyipritah Uzziah raja di Judah, Pekahiah anak Menahem jadi raja di Israel. Ayŭh mritah di Samaria duwŭh sawa.

²⁴Ayŭh bidosa rawan TUHAN, tunda suto danding adi arap so Raja Jeroboam anak Nebat, adi taban Israel bidosa.

²⁵Ndi naan pingubak soldadu Pekahiah, Pekah anak Remaliah, bipekat ngga 50 puru naan daya so Gilead, siŭ Pekahiah di kuta adi tura ka darŭm istana[31] di Samaria, ka gati ayŭh jadi raja.

²⁶Barang masam pingandai Pekahiah adi bŭkŭn agi dog nuris darŭm Surat Dundan bara Raja Israel.

²⁷Di sawa adi 52 darŭm pinyipritah Uzziah raja di Judah, Pekah anak Remaliah jadi raja di Israel. Ayŭh mritah di Samaria duwŭh puru sawa.

²⁸Ayŭh bidosa rawan TUHAN, tunda suto danding adi arap so Raja Jeroboam anak Nebat, adi taban Israel bidosa.

²⁹Di jaman Pekah jadi raja, Tiglath Pileser, adi raja-empaya Assyria, sirabut kupo kupo di Ijon, Abel Beth Maacah, Janoah, Kedesh, ka Hazor, samŭn tarun tana Gilead, Galilee, ka Naphtali, ka tambit daya ka Assyria jadi daya-takap.

³⁰Di sawa adi duwŭh puru darŭm pinyipritah Jotham anak Uzziah raja di Judah, Hoshea anak Elah bipekat rawan Raja Pekah, siŭ ayŭh, ka gati ayŭh jadi raja.

³¹Barang masam pingandai Pekah adi bŭkŭn agi dog nuris darŭm Surat Dundan bara Raja Israel.

³²Di sawa adi duwŭh darŭm pinyipritah Pekah anak Remaliah, raja Israel, Jotham anak Uzziah jadi raja di Judah

³³kan umbur-i 25 sawa. Ayŭh mritah di Jerusalem simŭng nŭm sawa. Sindŭ-i inŭh Jerusha, anak Zadok.

³⁴Tunda suto danding sama-i Uzziah, Jotham ndai kayuh adi pimunos asŭng TUHAN.

³⁵Pak tarun tarun yŭn bisambah adat karŭm dŭh dog nyirubuh, ka daya gibabŭ jugan sadis ka badang kimanyan diginŭ. Jotham inŭh adi pijog Tiban Utara Ramin TUHAN.

³⁶Barang masam pingandai Jotham adi bŭkŭn agi dog nuris darŭm Surat Dundan bara Raja Judah.

³⁷Sitadŭn ayŭh jadi raja inŭh sibungas TUHAN pait Raja Rezin so Syria ngga Raja Pekah so Israel bada nyerang Judah.

³⁸Jotham kabŭs ka dog kubur di kubur raja di Kupo David, ka anak-i Ahaz gati ayŭh jadi raja.