Read Biatah Bidayuh 2 RAJA 17 Bible Online

2 RAJA 17 - Biatah Bidayuh bible

2 RAJA 17

¹Di sawa adi simŭng duwŭh darŭm pinyipritah Ahaz raja di Judah, Hoshea anak Elah jadi raja di Israel. Ayŭh mritah di Samaria prii sawa.

²Ayŭh bidosa rawan TUHAN, pak dŭh paŭh sipŭ mun bara raja adi mritah Israel diŭ so adŭp-i.

³Shalmaneser, adi raja-empaya Assyria, biperang ngga ayŭh; Hoshea nyerah adŭp-i ka Shalmaneser ka bayar takŭd ka ayŭh barang sawa.

⁴Pak ndi sidah Hoshea pait pinyisung ka So, raja Egypt,[34] mite turung so ayŭh, ka dŭh tia bayar takŭd ka Assyria. Kan Shalmaneser dingah kayuh anŭ, ayŭh nakap Hoshea ka na ayŭh darŭm jer.

⁵Komŭnŭ Shalmaneser nyerang Israel ka nyikapung Samaria. Di sawa adi taruh darŭm-i dog nyikapung,

⁶anŭ inŭh sawa adi prii darŭm pinyipritah Hoshea, raja-empaya Assyria[35] sirabut Samaria, taban bara daya Israel ka Assyria jadi daya-takap, ka na kada ngara di kupo Halah, kada sindŭk Yang Habor di utung tarun tana Gozan, ka kada di kupo kupo di Media.

⁷Samaria rabu sabab daya Israel bidosa rawan TUHAN adi Tapa ngara, adi ko pirupas ngara so raja Egypt ka adi ko taban ngara ruah so Egypt. Ngara nyambah tapa tapa bŭkŭn,

⁸tunda adat daya adi TUHAN muko pibu darŭm daya-I masang mŭrŭt rais anŭ, ka tunda adat adi dog nggen raja raja Israel.[36]

⁹Daya Israel ndai[37] kayuh adi TUHAN adi Tapa ngara dŭh nyibandar. Ngara pijog tarun tarun yŭn bisambah adat karŭm di sopŭrŭg kupo ngara, so anak anak kupo ndŭg kupo kupo adi siabo bayah.

¹⁰ Di sopŭrŭg sandah ka di barang ribo sayung tŭngŭn kayuh ngara pijog uros uros batuh pirapu' ngga gayŭn gayŭn tapa Asherah,

¹¹ka ngara badang kimanyan di tunduh sopŭrŭg mija-sambah adat karŭm, tunda adat daya adi TUHAN muko pibu so tarun tana anŭ. Ngara kinuas TUHAN ngga sopŭrŭg pingandai arap ngara

¹²ka dŭh tunda pesan TUHAN adi nagah ngara nyambah tibudo.

¹³TUHAN mbŭh pait bara pinyisung-I ngga bara nabi bada bakan Israel ngga Judah: “Dŭh tia udip ginaka pak tunda pesan Ku, adi agi darŭm Ukum-adat adi Aku muko nggen di tayung-babuk ngan ka adi Aku mbŭh nggen di angān so urun urun Ku adi bara nabi.”

¹⁴Pak ngara dŭh dingah pinganang; ngara baking mun tayung-babuk ngara, adi dŭh sabah di TUHAN adi Tapa ngara.

¹⁵Ngara abah tunda ajar-I, ngara dŭh sita simanya adi Ayŭh muko ndai ngga tayung-babuk ngara, ka ngara dŭh piduri pinyibakan-I. Ngara nyambah tibudo adi au-tarun ka mbŭh jadi au-tarun adŭp ngara. Ngara tunda adat bangsa bangsa adi maning ngara, nyibireu pesan TUHAN adi nagah ngara ndai simŭnŭ.

¹⁶ Ngara miranggar sopŭrŭg ukum-adat TUHAN adi Tapa ngara, ka mbŭh ndai patong dari sapi basi an ngara nyambah; ngara gŭh ndai uros gayŭn tapa Asherah, nyambah bitang samŭn tapa Baal.

¹⁷ Ngara nyadis anak anak dari ngga anak anak dayung adŭp ngara ndu sadis badang ka tapa adat karŭm. Ngara bisiken ngga daya adi pandai minyu ngga simangi daya adi mbŭh kabŭs samŭn ngara adi pandai kidaan nasip. Ngara mbŭh bigŭtŭ ndai kayuh adi sarah di sirung jawin TUHAN, ka mbŭh kinuas Ayŭh.

¹⁸TUHAN baji di daya Israel ka mbŭh taran ngara so tarun tana adi-I nggen di ngara, kidŭm kaŭs pritah Judah.

¹⁹Pak daya Judah dŭh gŭh tunda ukum ukum-adat TUHAN adi Tapa ngara; ngara nanya adat adi daya Israel mbŭh tunda.

²⁰TUHAN tirawan sopŭrŭg daya Israel, ngukum ngara ka nyerah ngara ka tangan pinganyu ngara adi gaok, ndŭg ka ngara mbŭh mating di tana adi Ayŭh muko nggen di ngara.

²¹Ripas TUHAN muko nyidŭrŭ Israel so Judah, daya Israel bada Jeroboam anak Nebat jadi raja ngara. Jeroboam bada ngara nyipunok TUHAN ka taban ngara ndai dosa adi sipŭ.

²²Ngara tunda Jeroboam ka adu adu ndai sopŭrŭg dosa adi ayŭh mbŭh ndai.

²³Pinŭbŭn-i TUHAN taran ngara so tarun tana adi-I muko nggen di ngara, nimun Ayŭh muko bakan ngara so baba urun-I bara nabi. Jadi daya Israel dog taran ka Assyria, di yŭn ngara gibabŭ madin.

²⁴Raja-empaya Assyria taban daya so kupo kupo di Babylon, Cuth, Iwah, Hamath, ka Sepharvaim, ka bada ngara rŭŭ di kupo kupo di Samaria,[38] ngga gati daya Israel adi mbŭh dog taran. Ngara dapu kupo kupo anŭ ka rŭŭ diginŭ.

²⁵Darŭm sibungas sawa ngara rŭŭ diginŭ, ngara dŭh nyambah TUHAN, ka Ayŭh pait singah bada siŭ kada ngara.

²⁶Raja-empaya Assyria dog kidaan nang daya adi-i bada rŭŭ di Samaria dŭh puan ukum-adat tapa tarun tana anŭ, ngapŭi tapa anŭ pait singah bada siŭ ngara.

²⁷Jadi raja-empaya pesan: “Bada pari ndi naan so bara imam adi ata tambit jadi daya-takap. Bada ayŭh[39] pari ka rŭŭ diginŭ, siŭn-i ngajar daya pasar ukum-adat tapa tarun tana anŭ.”

²⁸Jadi ndi naan imam daya Israel adi muko dog taban bu so Samaria pari ka rŭŭ di Bethel, di yŭn-i ngajar daya atur ngga nyambah TUHAN.

²⁹Pak daya adi rŭŭ di Samaria gibabŭ ndai tibudo adŭp ngara, ka na-i di bari-sambah adi daya Israel muko pijog. Barang tibaran ndai tibudo di kupo di yŭn adŭp-i rŭŭ:

³⁰Daya Babylon ndai tibudo tapa Succoth Benoth; daya Cuth, tibudo Nergal; daya Hamath, tibudo Ashima;

³¹daya Iwah, tibudo Nibhaz ngga Tartak; ka daya Sepharvaim nyadis anak anak adŭp ngara ndu sadis badang ka tapa ngara, Adrammelech ngga Anammelech.

³²Ngara anŭ nyambah gŭh TUHAN ka mien so dupan adŭp ngara tadŭ tadŭ daya bada jadi imam di barang yŭn bisambah adat karŭm ka adi tukang jugan sadis yŭn ngara diginŭ.

³³Jadi ngara nyambah TUHAN, pak ngara nyambah gŭh tapa adŭp ngara nanyam ka adat rais adi so ngara mandŭg.

³⁴ Ngara gibabŭ sita adat amba ngara ndŭg andu ati. Ngara dŭh nyambah TUHAN, ka dŭh gŭh tunda ukum ukum-adat ngga pesan adi-I mbŭh nggen di bara sesang Jacob, adi-I kadŭn Israel.

³⁵ TUHAN mbŭh ndai ndi simanya ngga ngara ka mbŭh pesan ngara: “Dŭhnyah nyambah tapa bŭkŭn; dŭhnyah mutu ubak ngan ka ngara bait bituan di ngara, bait jugan sadis ka ngara.

³⁶ Angān dŭh siŭn dŭh tunda pinganang Ku, adi TUHAN, adi taban angān ruah so Egypt ngga kuasa bās ka pinyibake. Angān dŭh siŭn dŭh mutu ubak ngan ka Aku ka jugan sadis ka Aku.

³⁷Angān dŭh siŭn dŭh ari sita ukum ukum-adat ngga pesan adi Aku muko nuris yŭn ngan. Angān dŭh siŭn nyambah tapa bŭkŭn,

³⁸ka angān dŭh siŭn kambŭt simanya adi Aku mbŭh ndai ngga angān.

³⁹Angān dŭh siŭn dŭh nyambah Aku, TUHAN adi Tapa ngan, ka Aku re pirupas angān so pinganyu ngan.”

⁴⁰Pak ngara dŭh dingah pinganang, ka babŭ tunda adat amba ngara.

⁴¹Jadi sunggu ngara nyambah TUHAN, ngara babŭ gŭh nyambah tibudo ngara; ka ndŭg andu ati bara sesang ngara babŭ ndai simŭnŭ.