Read Biatah Bidayuh 2 RAJA 18 Bible Online

2 RAJA 18 - Biatah Bidayuh bible

2 RAJA 18

¹Di sawa adi taruh darŭm pinyipritah Hoshea anak Elah, raja di Israel, Hezekiah anak Ahaz jadi raja di Judah

²kan umbur-i 25 sawa. Ayŭh mritah di Jerusalem 29 sawa. Sindŭ-i inŭh Abijah, anak Zechariah.

³Tunda suto danding babuk-i David, ayŭh ndai kayuh adi pimunos asŭng TUHAN.

⁴ Ayŭh nyirubuh tarun yŭn bisambah adat karŭm, mapar uros uros batuh pirapu', ka nyirubuh gayŭn gayŭn tapa Asherah. Ayŭh pirandŭk gŭh jippŭh timaga adi Moses ndai, adi dog kadŭn Nehushtan, amai ndŭg jaman anŭ daya Israel badang kimanyan ngga nggen stabi dieh.

⁵Hezekiah sabah di TUHAN, adi Tapa Israel; Judah bŭn biyŭn raja adi bŭkŭn mun ayŭh, bait-i adi diŭ so ayŭh puan kah adi sundis so ayŭh.

⁶Ayŭh tŭtŭd di TUHAN ka bŭn-i nyibireu Ayŭh; ayŭh nakit sita sopŭrŭg pesan adi TUHAN muko nggen di Moses.

⁷Jadi TUHAN agi ngga ayŭh, ka ayŭh mujur di sopŭrŭg kayuh adi ndai-i. Ayŭh rawan raja-empaya Assyria ka abah-i nundok di ayŭh.

⁸Ayŭh ngarah daya Philistine, ka mirupak tarun tana ngara, so anak kupo ndŭg kupo adi siabo bayah, samŭn Gaza ngga utung tarun tana adi maning-i.

⁹Di sawa adi pat darŭm pinyipritah Hezekiah -- adi sawa adi ju darŭm pinyipritah Raja Hoshea di Israel -- Shalmaneser, adi raja-empaya Assyria, nyerang Israel ka nyikapung Samaria.

¹⁰Taruh sawa ripas anŭ, Samaria dog ngarah. Anŭ inŭh di sawa adi nŭm darŭm pinyipritah Hezekiah, ka di sawa adi prii darŭm pinyipritah Hoshea.

¹¹Raja-empaya Assyria[40] tambit bara daya Israel ka Assyria jadi daya-takap ka bada kada so ngara rŭŭ di kupo Halah, kada sindŭk Yang Habor di gadung tarun tana Gozan, ka kada di kupo kupo Media.

¹²Samaria rabu sabab daya Israel dŭh an dingah pinganang TUHAN adi Tapa ngara, ka miranggar simanya adi-I ndai ngga ngara ka nyibireu sopŭrŭg ukum-adat adi dog nggen Moses, adi urun TUHAN. Ngara dŭh an dingah pinganang buang dŭh tŭtŭd.

¹³Di sawa adi simŭng pat darŭm pinyipritah Hezekiah, Sennacherib, adi raja-empaya Assyria, nyerang kupo kupo Judah adi bikuta ka ngarah sopŭrŭg-i.

¹⁴Hezekiah pait pinganang ka Sennacherib, adi di tika anŭ agi di Lachish: “Aku mbŭh sarah; turung dŭh tia nyerang. Aku re nggen tadŭ tadŭ kayuh adi kuu mite.” Pinyinam raja-empaya inŭh ayŭh mite Hezekiah nggen di ayŭh 10,000 kilogram pirak ka siribu kilogram mas.

¹⁵Hezekiah pait ka ayŭh sopŭrŭg pirak adi di Ramin TUHAN ka adi di pinyirikŭn-rata istana;

¹⁶ayŭh kadi gŭh mas so tiban tiban Ramin TUHAN ka mas adi-i ngga marut uros tiban. Sopŭrŭg anŭ ayŭh pait ka Sennacherib.

¹⁷Raja-empaya Assyria pait ndi tibaran bara soldadu adi raru bagŭ so Lachish bada nyerang Hezekiah di Jerusalem; bara tibaran soldadu anŭ dog nguru taruh naan pingubak soldadu adi bās pangkat. Kan ngara mbŭh mandŭg di Jerusalem, ngara rŭŭ di aran di yŭn bara tukang banang nyiraja, sindŭk aran-piin adi so piin aman so pagong di sijo.

¹⁸Komŭnŭ ngara bagan Raja Hezekiah, ka taruh naan pinurung-i ruah di bidapŭd ngga ngara: Eliakim anak Hilkiah, adi tukang kingat kayuh di istana; Shebna, adi tukang pinuris; ka Joah anak Asaph, adi tukang jaga rekod.

¹⁹Ndi naan so pingubak soldadu daya Assyria kidaan di ngara nang raja-empaya raan puan ani anŭ adi bada Raja Hezekiah dŭh biyŭn atin taru.

²⁰Ayŭh mite puan, “Agi kah angān pikir pinganang dapŭd gati pimandai ngga pinyibake bara soldadu? Asi di pikir ngan re an turung angān rawan Assyria?

²¹Angān harap Egypt re an turung angān, pak anŭ re keya ka pakai tŭngŭn reed ndu sikud. Anŭ re pata ka tabŭk tangan ngan. Mun anŭ inŭh raja Egypt kan daya bisangan di ayŭh.”

²²Pingubak soldadu daya Assyria nang dinge, “Puan kah angān re nang adŭp ngan bisangan di TUHAN adi Tapa ngan? Bari-sambah ngga mija mija-sambah TUHAN inŭh adi Hezekiah muko nyirubuh, kan ayŭh kidaan di bara daya Judah ngga Jerusalem bada bisambah di mija-sambah di Jerusalem adŭ.

²³Aku an bitawar ngga angān pakai dŭn raja-empaya. Aku re nggen di angān duwŭh ribu kuda kambŭi angān tungang dapŭd kiang anŭ pinunggang bada nunggang-i!

²⁴Pingubak soldadu Assyria adi siabo sŭ pangkat-i dŭh gŭh angān re tungang rawan, makat ka angān harap daya Egypt pait ka angān krita krita kuda ngga dudu soldadu pinunggang kuda!

²⁵Angān pikir aku nyerang ka pirabur rais ngan dŭh so ka pinurung TUHAN kah? Adŭp TUHAN inŭh adi bada aku nyerang ka pirabur-i.”

²⁶Komŭnŭ Eliakim, Shebna, ka Joah kidaan di bara pingubak soldadu anŭ, “Minyu piminyu Aram ngga kieh, tuan. Kieh mirati piminyu anŭ. Dŭhnyah minyu ngga kieh pakai piminyu Hebrew amai sopŭrŭg daya adi di sambu sindung mirati-i.”

²⁷Ayŭh nam, “Angān pikir raja-empaya pait aku bada minyu ngga angān ka ngga raja ngan adŭ kah? Dŭh, aku minyu ngga ngara adi guru di sambu sindung anŭ ani, adi re man tadang adŭp-i ka nok kasing adŭp-i, mun adŭp ngan gŭh re.”

²⁸Komŭnŭ pingubak soldadu anŭ nyirais minyu darŭm piminyu Hebrew, “Dingah kayuh adi raja-empaya Assyria nang di angān!

²⁹Ayŭh bakan angān bada dŭh tandah Hezekiah nipu angān. Hezekiah dŭh dapŭd nyiramat angān.

³⁰Ka dŭhnyah tandah ayŭh mujuk angān bada bisangan di TUHAN. Dŭhnyah pikir TUHAN re nyiramat angān, ka pirŭŭ bara tibaran soldadu Assyria so sirabut kupo ngan.

³¹Dŭhnyah dingah Hezekiah. Raja-empaya Assyria mritah angān bada ruah so kupo ka nyerah adŭp ngan. Sopŭrŭg ngan re dog nyibandar man buwa anggor so tŭngŭn anggor adŭp ngan, ka man buwa ara so tŭngŭn ara adŭp ngan, ka nok piin so prigi adŭp ngan --

³²ndŭg ka raja-empaya mbŭh bada angān rŭŭ di rais adi batur mun tung jangān, adi agi teya anggor so angān dapŭd wain ka ndai ruti so gandom; anŭ inŭh tarun tana kanā, inyo kanā, ka ju banyis. Kambŭi angān ndai kayuh adi-i pesan, angān dŭh re kabŭs, pak dog tandah udip. Dŭhnyah tandah Hezekiah nyibudo angān nang TUHAN re nyiramat angān.

³³Agi kah tapa tapa bangsa bŭkŭn nyiramat rais ngara so raja-empaya Assyria?

³⁴Diki meh ngara madin, tapa Hamath ngga tapa Arpad? Diki tapa Sepharvaim, Hena, ka Iwah? Agi kah adi mbŭh nyiramat Samaria?

³⁵Mbŭh kah tapa tapa sopŭrŭg rais anŭ nyiramat rais ngara so raja-empaya ami? Jadi ani meh bada angān pikir TUHAN dapŭd nyiramat Jerusalem?”

³⁶Bara daya bagŭ pajam, amai Raja Hezekiah mbŭh bada ngara pajam; ngara dŭh nang ani ani.

³⁷Komŭnŭ Eliakim, Shebna, ka Joah nyiratak piraka ngara darŭm susah. Ngara di ka yŭn raja ka kidaan kayuh adi pingubak soldadu daya Assyria mbŭh nang.