Read Biatah Bidayuh 2 RAJA 19 Bible Online

2 RAJA 19 - Biatah Bidayuh bible

2 RAJA 19

¹Kan Raja Hezekiah dingah pinganang ngara, ayŭh nyiratak jipo-i darŭm susah, kasŭk banang guni, rasu di ka Ramin TUHAN.

²Ayŭh pait Eliakim, adi tukang kingat kayuh di istana, Shebna, adi tukang pinuris, ka imam imam adi mbŭh tuuh da di ka yŭn nabi Isaiah anak Amoz. Ngara gŭh nēn banang guni.

³Ati inŭh pinganang adi ayŭh bada ngara kidaan di Isaiah: “Andu ati inŭh andu sangsara; ata mbŭh dog ukum ka dog pimangŭh. Ata keya ka dayung adi mbŭh re biranak, pak dŭh dapŭd biranak amai mbŭh raru ramah.

⁴Raja-empaya Assyria mbŭh pait pingubak soldadu-i adi siabo bās pangkat-i bada ngamun Tapa adi udip. Isa-i TUHAN adi Tapa mai dingah pinganang pimangŭh anŭ ka ngukum ngara adi nang pinganang anŭ. Ka bidua meh yŭn daya ta adi gibabŭ udip.”

⁵Kan Isaiah trima pinganang anŭ so Raja Hezekiah,

⁶ayŭh pait pinganang sakati ngga nam: “TUHAN nang di kuu bada dŭhnyah tandah daya Assyria pirawan kuu, ngga pinganang ngara adi nang Ayŭh dŭh dapŭd nyiramat kuu.

⁷TUHAN re bada raja-empaya anŭ dingah agah-sabak adi re bada ayŭh pari ka rais adŭp-i, ka diginŭ TUHAN re bada ayŭh dog siŭ.”

⁸Pingubak anŭ dingah raja-empaya mbŭh bu so Lachish ka mbŭh biperang rawan kupo Libnah adi dŭh jo so nŭ. Jadi ayŭh matak kamanŭ di bisiken ngga ayŭh.

⁹Pinganang mbŭh agi ndŭg daya Assyria nang bara soldadu Egypt, dog nguru Raja Tirhakah so Ethiopia[41], mbŭh mandŭg di nyerang ngara. Kan raja-empaya dingah, ayŭh pait surat ka Hezekiah raja Judah

¹⁰nang, “Tapa adi kuu sabah mbŭh kidaan di kuu nang kuu dŭh re rabu ka darŭm tangan ku, pak dŭhnyah kuu budo.

¹¹Kuu muko dingah kayuh adi raja-empaya Assyria mbŭh ndai di tadŭ tadŭ rais adi ayŭh an pirabur. Kuu pikir kuu re tungang pirupas adŭp mu?

¹²Bara tayung-babuk ku muko pirabur kupo kupo Gozan, Haran, ka Rezeph, ka siŭ daya Betheden adi rŭŭ di Telassar, ka mating tapa ngara tungang nyiramat ngara.

¹³Diki meh raja raja kupo Hamath, Arpad, Sepharvaim, Hena, ka Iwah?”

¹⁴Raja Hezekiah tambit surat anŭ so pinyisung ka basa-i. Komŭnŭ ayŭh di ka Ramin TUHAN, na-i diginŭ di sirung jawin TUHAN,

¹⁵ ka bidua, “O TUHAN, adi Tapa Israel, bitakta di tunduh cherubim, Kaam sadi adŭ Tapa, mritah sopŭrŭg pritah di ong. Kaam napa ong ngga rangit.

¹⁶Madin, TUHAN, tingga kayuh adi mbŭh jadi di kieh. Dingah sopŭrŭg kayuh adi Sennacherib nang ngga pimangŭh Kaam, Tapa adi udip.

¹⁷Sopŭrŭg ami puan, TUHAN, nang raja raja-empaya Assyria mbŭh pirabur bagŭ bangsa, ka bada rais rais ngara rusak,

¹⁸ka badang tapa tapa ngara -- adi tapa au-tarun, gayŭn adi dog ndai tangan manusia so kayuh ngga batuh.

¹⁹Madin, TUHAN adi Tapa ami, pirupas kieh so daya Assyria, isa sopŭrŭg bangsa di ong puan nang Kaam sadi adŭ, o TUHAN, adi Tapa.”

²⁰Komŭnŭ Isaiah pait pinganang ka Raja Hezekiah yŭn pinyinam di dua-i nang

²¹TUHAN muko nang, “Kupo Jerusalem tawŭh kuu, Sennacherib, ka ngamun kuu.

²²Asi anŭ sŭn mu nang, adi kuu pimangŭh ka napat? Kuu dŭh biradat di Aku, adi Tapa kudus Israel.

²³Kuu pait bara pinyisung mu bada minyu gambung di Aku nang ngga sopŭrŭg krita kuda mu kuu mbŭh ngarah darŭd darŭd Lebanon adi siabo bigatung. Kuu minyu gambung nang diginŭ kuu tabŭng tŭngŭn tŭngŭn sedar adi siabo bigatung samŭn tŭngŭn sipres adi siabo kana, ka nang adŭp mu mbŭh tambus yun tuān adi jera daya mŭrŭt.

²⁴Kuu minyu gambung nang adŭp mu kareh prigi ka nok piin di rais tami ka kaja bara soldadu mu bidigang di Yang Nile ndŭg badŭh.

²⁵“Bŭn kah kuu dingah Aku ati inŭh adi ngatur kayuh anŭ ndun jah? Ka madin Aku mbŭh ndai-i. Aku nggen di kuu kuasa ngga nyirubuh kupo kupo adi bikuta bada jadi tugung rapuh batuh.

²⁶Daya adi rŭŭ diginŭ mbŭh dŭh dapŭd ndai ani ani; ngara mbŭh taru buang riruk. Ngara mbŭh keya ka kupai di ŭmŭh, ka keya ka uduh adi timbu di tibung ramin dog poh sabak timor adi paras.[42]

²⁷“Pak Aku puan sopŭrŭg kayuh pasar kuu, kayuh adi kuu ndai ka kamaki kuu panu. Aku puan munki kuu magā rawan Aku.

²⁸Aku mbŭh dingah pasar magā mu samŭn gambung mu anŭ, ka madin Aku re na sikait di undung mu ka basi-gŭngŭm di baba mu, ka taban kuu pari kadŭg aran adi so mu mandŭg.”

²⁹Komŭnŭ Isaiah nang di Raja Hezekiah, “Ati inŭh tandā yŭn kayuh adi re jadi. Sawa ati ngga sawa bauh kuu re man kaŭs-i gandom tarun, pak darŭm sawa adi ripas anŭ kuu re dapŭd purun gandom ka ngatŭm-i, ka purun anggor ka man buwa-i.

³⁰Ngara adi di Judah adi gibabŭ udip re mujur mun anak anak kayuh-udip adi piruat tŭrŭp di tana ka buān bagŭ buwa.

³¹Di Jerusalem ngga di Sandah Zion re agi daya adi gibabŭ udip, sabab TUHAN mbŭh natu bada-i jadi simŭnŭ.

³²“Ati inŭh kayuh adi TUHAN mbŭh nang pasar raja-empaya Assyria: ‘Ayŭh dŭh re tungang mŭrŭt kupo ati, bait nimbak reja-panah dieh, ka mating tugung tana dog ndai re ngga kirurung-i.

³³Ayŭh re pari kadŭg aran adi so-i mandŭg, buang-i dŭh mŭrŭt kupo ati. Aku, adi TUHAN, mbŭh minyu.

³⁴Aku re tak kupo ati ka grindung-i, yŭn stabi adŭp Ku ka sabab janji adi Aku muko ndai ngga urun Ku David.’ ”

³⁵Ngarŭm anŭ ndi naan malaikat TUHAN di ka tarun yŭn daya Assyria bibari ka siŭ 185,000 naan soldadu. Ka ngga isan isan, ngara mbŭh sadi prigure kabŭs!

³⁶Komŭnŭ Sennacherib adi raja-empaya Assyria ngundur so nŭ ka pari ka Nineveh.

³⁷Ndi andu, kan ayŭh bisambah di bari-sambah tapa-i Nisroch, duwŭh madis anak-i, Adrammelech ngga Sharezer, siŭ ayŭh ngga pedang, ka rasu bu ka tarun tana Ararat. Esarhaddon, anak-i adi bŭkŭn, gati ayŭh jadi raja-empaya.