Read Biatah Bidayuh 2 RAJA 2 Bible Online

2 RAJA 2 - Biatah Bidayuh bible

2 RAJA 2

¹Tipuh mbŭh mandŭg adi ngga TUHAN taban Elijah maad ka shorga darŭm sabak biriyung. Elijah ngga Elisha matak so Gilgal,

²ka di aran Elijah nang di Elisha, “Rŭŭ digiti; TUHAN mbŭh mritah aku bada di ka Bethel.” Pak Elisha nam, “Aku bipayu ngga atin tŭtŭd ku di TUHAN adi udip ngga di kaam aku dŭh re tingge kaam.” Jadi ngara duwŭh di ka Bethel.

³Ndi tibaran nabi adi rŭŭ diginŭ di ka Elisha ka siken ayŭh, “Puan mu kah TUHAN re tambit tuan mu so kuu andu ati?” “Aku puan,” Elisha nam. “Pak dŭhsah ata minyu pasar kayuh anŭ.”

⁴Komŭnŭ Elijah nang di Elisha, “Rŭŭ digiti; TUHAN mbŭh mritah aku bada di ka Jericho,” Pak Elisha nam, “Aku bipayu ngga atin tŭtŭd ku di TUHAN adi udip ngga di kaam aku dŭh re tingge kaam.” Jadi ngara duwŭh di ka Jericho.

⁵Ndi tibaran nabi adi rŭŭ diginŭ di ka yŭn Elisha ka siken ayŭh, “Puan mu kah TUHAN re tambit tuan mu so kuu andu ati?” “Aku puan,” Elisha nam. “Pak dŭhsah ata minyu pasar kayuh anŭ.”

⁶Komŭnŭ Elijah nang di Elisha, “Rŭŭ digiti; TUHAN mbŭh mritah aku bada di ka Yang Jordan.” Pak Elisha nam, “Aku bipayu ngga atin tŭtŭd ku di TUHAN adi udip ngga di kaam aku dŭh re tingge kaam.” Jadi ngara duwŭh samah di,

⁷ka 50 naan so tibaran nabi anŭ tunda ngara di ka Jordan. Elijah ngga Elisha rŭŭ di bŭngŭn Yang Jordan, ka 50 naan nabi anŭ mijog mua juan so ngara.

⁸Komŭnŭ Elijah kadi jipo-i, marut-i, ka pakai-i ngga masut piin; piin tipire nyinuwŭh, ka ayŭh ngga Elisha mutas di ka parad mandi di tunduh tana badŭh.

⁹ Diginŭ, Elijah nang di Elisha, “Kidaan di aku ani raan mu aku ndai yŭn mu diŭ so aku dog taban ngga bu.” “Nggen di aku kuasa mai isa aku tungang gati kaam,”[3] Elisha nam.

¹⁰“Anŭ inŭh pimite adi mbar dog nggen,” Elijah nam. “Pak kuu re kambat-i kambŭi kuu kiris aku darŭm aku dog tambit so kuu; kambŭi kuu dŭh kiris aku, kuu dŭh re kambat-i.”

¹¹Ngara babŭ minyu darŭm ngara panu. Komŭnŭ ndi krita kuda apui dog tarik kuda adi bijagu apui dieh mandŭg ka asah ngara duwŭh, ka Elijah dog taban ka shorga darŭm sabak biriyung.

¹² Elisha kiris-i ka nyirais bagan Elijah, “Sama ku, sama ku! Pingibān Israel adi bake! Kaam mbŭh mating!” Ka ayŭh mbŭh dŭh tia kiris Elijah dinge. Ngga atin susah, Elisha nyiratak jipo-i nyinuwŭh.

¹³Komŭnŭ ayŭh tambit jipo Elijah adi rabu ka pari di mijog di bŭngŭn Yang Jordan.

¹⁴Ayŭh masut piin ngga jipo Elijah, ka nang, “Diki TUHAN, adi Tapa Elijah?” Ka-i masut piin dinge, ka-i tipire nyinuwŭh, ka ayŭh panu di ka parad mandi Yang Jordan.

¹⁵50 naan nabi so Jericho anŭ kiris ayŭh ka nang, “Kuasa Elijah mbŭh di Elisha!” Ngara tudu ayŭh ka mutu ubak nura ayŭh,

¹⁶ka nang, “Digiti agi rimŭh puru naan kieh, sopŭrŭg dari adi bake. Bada kieh di jiroh tuan mai. Kadŭ roh TUHAN mbŭh taban ayŭh bu ka tingge ayŭh di arong darŭd puan kah di arong rubān.” “Dŭh, angān dŭhsah di,” Elisha nam.

¹⁷Pak ngara darah ndŭg ka ayŭh nurut ka bada ngara di. 50 naan nabi anŭ matak di jiroh Elijah di barang yŭn di tarun adi bigatung ngga adi rapat taruh andu, pak dŭh dapŭd ayŭh.

¹⁸Komŭnŭ ngara pari ka yŭn Elisha, adi mbŭh kajŭn di Jericho, ka ayŭh nang di ngara, “Dŭh kah aku muko kidaan di angān nang dŭhsah di?”

¹⁹Kudu kudu naan daya di ka yŭn Elisha ka nang, “Nimun adi mbŭh kaam puan, tuan, kupo ati kana, pak piin-i dŭh kana ka bisa bada dayung bubu.”

²⁰“Na garo di makuk adi bauh, ka taban-i ka yŭn ku,” ayŭh bada ngara. Ngara taban-i ka yŭn-i,

²¹ka ayŭh di ka rubang piin, taran garo anŭ di piin, ka nang, “Ati inŭh kayuh adi TUHAN nang: ‘Aku bada piin ati bisig, ka-i re dŭh tia bada daya kabŭs puan kah bubu.’ ”

²²Ka so nganŭ piin anŭ mbŭh bisig, nimun adi Elisha muko nang.

²³Elisha bu so Jericho di ka Bethel, ka di aran agi kada anak dari adi gi-mara ruah so ndi kupo ka napat ayŭh. “Bu so ti, sirakas!” ngara nyirais nang.

²⁴Elisha bigiring, tirek ngara, ka mangu ngara ngga adŭn TUHAN. Komŭnŭ duwŭh sindŭ buāng ruah so darŭm tarun ka nyirigat nyiratak 42 naan anak dari anŭ.

²⁵Elisha di ka Darŭd Carmel, ka ripas anŭ pari ka Samaria.