Read Biatah Bidayuh 2 RAJA 20 Bible Online

2 RAJA 20 - Biatah Bidayuh bible

2 RAJA 20

¹Di tika anŭ Raja Hezekiah birandam ka mbŭh sindŭk re kabŭs. Nabi Isaiah anak Amoz di ka yŭn-i ka nang di ayŭh, “TUHAN nang di kuu bada ngamas sopŭrŭg kayuh bada tirase, sabab kuu dŭh re bua. Sidia adŭp mu re kabŭs.”

²Hezekiah marik jawin-i ka sindung ka bidua:

³“Ingat, TUHAN, aku mbŭh bituan di Kaam ngga atin tŭtŭd ka stabi, ka aku mbŭh siraru bandar bandar ndai kayuh adi Kaam bada aku ndai.” Ka-i nyisakuk sien.

⁴Isaiah bu so yŭn raja, pak diŭ so-i mutas awah yun istana, TUHAN bada ayŭh

⁵pari ka yŭn Hezekiah, pimritah daya TUHAN, ka nang di ayŭh, “Aku, TUHAN, adi Tapa babuk mu David, mbŭh dingah dua mu ka kiris randang batŭh mu. Aku re pibua kuu, ka andu adi taruh kuu re di ka Ramin TUHAN.

⁶Aku re nambah simŭng rimŭh sawa umbur mu dinge. Aku re pirupas kuu ngga kupo Jerusalem ati so raja-empaya Assyria. Aku re tak kupo ati, yŭn stabi adŭp Ku ka sabab janji adi Aku mbŭh ndai ngga urun Ku David.”

⁷Komŭnŭ Isaiah kidaan di urun raja bada mipis buwa ara ka nape-i di pirakis raja, isa ayŭh bua.[43]

⁸Raja Hezekiah siken, “Ani tandā adi bisa kiren nang TUHAN re pibua aku ka andu adi taruh aku re tungang di ka Ramin TUHAN?”

⁹Isaiah nam, “TUHAN re nggen di kuu tandā ngga kiren Ayŭh sawŭ re ndai nanyam ka janji-I. Jadi madin, aki adi raan mu: singangi so batŭh andu di subang tungoh anŭ masang sijawin simŭng subang puan kah sikanang simŭng subang?”[44]

¹⁰Hezekiah nam, “Sanang nŭŭh bada singangi so batŭh andu anŭ masang simŭng subang![45] Bada-i sikanang simŭng subang.”[46]

¹¹Isaiah bidua ka TUHAN, ka TUHAN bada singangi anŭ masang sikanang simŭng subang[47] di tungoh anŭ[48] adi dog pijog Raja Ahaz.

¹²Kira ka di tika anŭ raja so Babylonia, Merodach, anak Baladan, dingah Raja Hezekiah agi birandam, jadi ayŭh pait surat ka ayŭh samŭn ndi pinganggen.

¹³Hezekiah kambat bara pinyisung anŭ ka kiren kaya raja-i di ngara -- pirak, mas, ngga rapah rapah ka wangi, samŭn sopŭrŭg pingakas perang-i. Mating kayuh di birit pinyirikŭn-i bait di tadŭ tadŭ yŭn darŭm pritah-i adi dŭh-i kiren di ngara.

¹⁴Komŭnŭ nabi Isaiah di ka Raja Hezekiah ka siken, “So ki bara daya ati mandŭg ka ani nang ngara di kuu?” Hezekiah nam, “Ngara mandŭg so rais adi raru jo, so Babylonia.”

¹⁵“Ani mbŭh ngara kiris di darŭm istana?” “Ngara kiris sopŭrŭg kayuh. Mating kayuh adi darŭm birit pinyirikŭn adi dŭh aku kiren di ngara.”

¹⁶Jadi Isaiah nang di raja, “TUHAN adi Bisa-pŭrŭg nang

¹⁷ tika re mandŭg adi ngga sopŭrŭg kayuh darŭm istana mu, sopŭrŭg adi tayung tayung-babuk mu mbŭh nyikŭn ndŭg andu ati, re dog taban ngga bu ka Babylonia. Mating kayuh re dŭm.

¹⁸ Kada so bara sesang adŭp mu re dog taban ngga bu ka re dog nuroi yŭn dog bada nyiraja di istana raja Babylonia.”

¹⁹Sŭn Raja Hezekiah nang, rati pinganang anŭ inŭh damai ngga pinyipagŭng rais di jaman adŭp-i, jadi ayŭh nam, “Pinganang so TUHAN adi kaam nggen di aku anŭ inŭh kana.”

²⁰Barang masam pingandai Raja Hezekiah adi bŭkŭn, pingandai pagan-i, samŭn munki ayŭh ndai pagong piin ngga aran piin ngga pibŭrŭt piin ka darŭm kupo, mbŭh dog nuris darŭm Surat Dundan bara Raja Judah.

²¹Hezekiah kabŭs, ka anak-i Manasseh gati ayŭh jadi raja.