Read Biatah Bidayuh 2 RAJA 21 Bible Online

2 RAJA 21 - Biatah Bidayuh bible

2 RAJA 21

¹Manasseh mbŭh simŭng duwŭh sawa umbur-i kan ayŭh jadi raja Judah. Ayŭh mritah di Jerusalem 55 sawa. Sindŭ-i inŭh Hephzibah.

² Tunda pingandai arap bangsa adi TUHAN muko pibu dawŭ-i darŭm daya-I masang mŭrŭt rais anŭ, Manasseh bidosa rawan TUHAN.

³Ayŭh pari pijog tarun yŭn bisambah adat karŭm adi sama-i Hezekiah muko nyirubuh; ayŭh pijog mija mija-sambah yŭn nyambah Baal ka ndai uros gayŭn tapa Asherah, nimun adi Ahab raja Israel mbŭh ndai. Manasseh nyambah gŭh bitang.

⁴ Ayŭh pijog mija-sambah adat karŭm darŭm Ramin TUHAN, tarun yŭn adi TUHAN muko kidaan nang tarun yŭn adŭp-I dog nyambah.

⁵Di duwŭh badag Ramin TUHAN ayŭh pijog mija mija-sambah yŭn nyambah bitang.

⁶Ayŭh nyadis anak adŭp-i ndu sadis badang. Ayŭh nanung ka ndai biruri karŭm ka bisiken ngga[49] daya adi pandai kidaan nasip ka ngara adi pandai minyu ngga simangi daya adi mbŭh kabŭs. Ayŭh mbŭh bana bidosa rawan TUHAN ka mbŭh kinuas Ayŭh.

⁷ Ayŭh na tandā pinatŭng tapa Asherah di Ramin TUHAN, tarun yŭn adi TUHAN muko kidaan di David ngga di anak-i Solomon: “Digiti di Jerusalem, di Ramin Ku ati, inŭh tarun yŭn adi Aku mbŭh mien so dudu tarun tana simŭng duwŭh tibaran-asar Israel ndu tarun yŭn Aku dog nyambah.

⁸Ka kambŭi daya Israel tunda sopŭrŭg pesan Ku ka sita sopŭrŭg Ukum-adat adi urun Ku Moses nggen di ngara, Aku dŭh re tandah ngara dog pibu so tarun tana adi Aku nggen di tayung-babuk ngara.”

⁹Pak daya Judah dŭh tunda pinganang TUHAN, ka Manasseh mbŭh taban ngara rabis bidosa so bangsa adi TUHAN muko pibu dawŭ-i darŭm daya-I masang mŭrŭt rais anŭ.

¹⁰So baba urun urun-I adi bara nabi TUHAN nang,

¹¹“Raja Manasseh mbŭh ndai kayuh kayuh adi raru sipŭ, kayuh adi mbŭh rabis sipŭ so adi mbŭh daya Canaan ndai; ka ngga dudu tibudo-i ayŭh mbŭh taban daya Judah bidosa.

¹²Jadi Aku, TUHAN adi Tapa Israel, re pait pinyirusag bada nyatŭk Jerusalem ngga Judah; pinyirusag adi re bada daya bangap bangap.

¹³Aku re ngukum Jerusalem mun Aku ngukum Samaria, mun Aku ngukum Raja Ahab ngga bara sesang-i. Aku re siŭ sopŭrŭg adi rŭŭ di Jerusalem keya ka pibisig pinggen ka marik-i bada badŭh.

¹⁴Aku re tagan ngara adi gibabŭ udip, ka re nggen ngara ka pinganyu adŭp ngara, adi re ngarah ngara ka pirinda tana ngara.

¹⁵Aku re ndai simŭnŭ di daya Ku sabab ngara mbŭh bidosa rawan Aku ka mbŭh kinuas Aku so jaman tayung-babuk ngara ruah so Egypt ndŭg andu ati.”

¹⁶Manasseh siŭ bagŭ daya adi dŭh sarah ndŭg ka aran aran di Jerusalem mbŭh puno ngga deya; ayŭh ndai simŭnŭ buang-i taban daya Judah nyambah tibudo, ngga bada ngara bidosa rawan TUHAN.

¹⁷Sopŭrŭg pingandai Manasseh adi bŭkŭn, samŭn dosa adi-i ndai, agi dog nuris darŭm Surat Dundan bara Raja Judah.

¹⁸Manasseh kabŭs ka dog kubur di teya istana, teya Uzza, ka anak-i Amon gati ayŭh jadi raja.

¹⁹Amon mbŭh 22 sawa umbur-i kan ayŭh jadi raja di Judah. Ayŭh mritah di Jerusalem duwŭh sawa. Sindŭ-i inŭh Meshullemeth, anak Haruz, so kupo Jotbah.

²⁰Mun sama-i Manasseh, ayŭh bidosa rawan TUHAN;

²¹ayŭh nanya gaya sama-i, ka ayŭh nyambah tibudo adi sama-i nyambah.

²²Ayŭh tirawan TUHAN, adi Tapa tayung babuk-i, ka nyibireu pesan TUHAN.

²³Pinurung pinurung-i bipekat rawan ayŭh ka siŭ ayŭh di istana.

²⁴Bara daya Judah siŭ ngara adi siŭ Amon ka bada anak-i Josiah jadi raja.

²⁵Sopŭrŭg pingandai Amon adi bŭkŭn agi dog nuris darŭm Surat Dundan bara Raja Judah.

²⁶Amon dog kubur di kubur di teya Uzza, ka anak-i Josiah gati ayŭh jadi raja.