Read Biatah Bidayuh 2 RAJA 22 Bible Online

2 RAJA 22 - Biatah Bidayuh bible

2 RAJA 22

¹ Josiah mbŭh mai sawa umbur-i kan ayŭh jadi raja di Judah. Ayŭh mritah di Jerusalem 31 sawa. Sindŭ-i inŭh Jedidah, anak Adaiah, so kupo Bozkath.

²Josiah ndai kayuh adi pimunos asŭng TUHAN; ayŭh tunda suto danding babuk-i Raja David, batur batur tunda sopŭrŭg ukum-adat Tapa.

³Di sawa adi simŭng mai darŭm pinyipritah-i, Raja Josiah pait Shaphan adi tukang pinuris, adi anak Azaliah ka sukuh Meshullam, bada di ka Ramin TUHAN ngga pingatur sakati:

⁴“Di ka Imam Bās Hilkiah ka tambit pinyiripot pasar kiang duit adi imam imam adi jaga di tiban Ramin TUHAN muko sun so bara daya.

⁵Kidaan di ayŭh bada nggen duit anŭ di ngara adi nguasa kraja nyurat Ramin TUHAN. Ngara an bayar

⁶gaji tukang kayuh, gaji tukang pijog, samŭn gaji ngara adi tukang batuh, ka miris betang kayuh ngga batuh adi dog pakai di kraja nyurat.

⁷ Daya adi tukang nguasa kraja inŭh daya adi sukup jujur, ka tandah adŭp ngara ngatur munki duit dog pakai.”

⁸Shaphan nggen pingatur anŭ ka Hilkiah, ka Hilkiah kidaan di ayŭh nang surat Ukum-adat mbŭh-i dapŭd di darŭm Ramin TUHAN. Hilkiah nggen di ayŭh surat anŭ, ka Shaphan basa-i.

⁹Komŭnŭ ayŭh pari ka yŭn raja ka ripot: “Aku muko tambit duit anŭ so Ramin TUHAN ka mbŭh nggen-i ka ngara adi nguasa kraja nyurat.”

¹⁰Komŭnŭ ayŭh nang, “Aku agi surat adi dog nggen Hilkiah di aku.” Ka ayŭh basa-i bana di sirung jawin raja.

¹¹Kan raja dingah kayuh adi dog basa darŭm surat anŭ, ayŭh nyiratak jipo-i darŭm susah,

¹²ka mritah Hilkiah adi imam, Ahikam anak Shaphan, Achbor anak Micaiah, Shaphan adi tukang pinuris, ka Asaiah adi pinurung raja sakati:

¹³“Panu di bisiken ngga TUHAN yŭn ku ka yŭn sopŭrŭg daya Judah pasar ajar adi di darŭm surat ati. TUHAN baji di ata sabab tayung-babuk ta dŭh ndai kayuh adi sŭn surat ati nang dŭh siŭn dŭh dog ndai.”

¹⁴Hilkiah, Ahikam, Achbor, Shaphan, ka Asaiah matak di bisiken ngga ndi naan dayung dŭn Huldah, nabi adi rŭŭ di parad Jerusalem adi bauh. (Banŭh-i Shallum, anak Tikvah ka sukuh Harhas, adi nguasa jipo-ambu Ramin TUHAN.) Ngara nyuse di ayŭh kayuh adi mbŭh jadi,

¹⁵ka ayŭh kidaan di ngara bada pari ka yŭn raja ka nggen di ayŭh

¹⁶pinganang ati adi so TUHAN: “Aku re ngukum Jerusalem ka sopŭrŭg daya-i, sak adi dog nuris darŭm surat adi raja muko basa.

¹⁷Ngara mbŭh tirawan Aku ka mbŭh jugan sadis ka tapa bŭkŭn, ka mbŭh kinuas Aku ngga sopŭrŭg kayuh adi ngara mbŭh ndai. Jerusalem mbŭh kinuas Aku, ka baji Ku dŭh re ko.

¹⁸Di adŭp raja, ati inŭh kayuh adi Aku, adi TUHAN adi Tapa Israel, nang: kuu mbit bat di kayuh adi dog nuris darŭm surat anŭ,

¹⁹ka kuu mbŭh marik pimudip mu pari ka Aku ka pirapat adŭp mu di sirung jawin Ku, nyiratak jipo mu buang sien, kan kuu dingah munki Aku re ngukum Jerusalem ngga daya-i. Aku re bada-i jadi tarun yŭn adi raru sipŭ, ka dŭn-i daya re pakai ndu pangu. Pak Aku mbŭh dingah dua mu,

²⁰ka ukum adi Aku re bada nyatŭk Jerusalem dŭh re mandŭg ndŭg ka ripas kuu mbŭh kabŭs. Aku re bada kuu kabŭs ngga sanang.” Ngara anŭ pari ka yŭn Raja Josiah ngga pinganang anŭ.