Read Biatah Bidayuh 2 RAJA 23 Bible Online

2 RAJA 23 - Biatah Bidayuh bible

2 RAJA 23

¹Raja Josiah bagan sopŭrŭg pinguru Judah ngga Jerusalem,

²ka ngara samah di ka Ramin TUHAN, ayō bara imam ngga bara nabi ka sopŭrŭg daya, adi kaya ngga adi sirata. Di sirung jawin ngara, raja basa bana sopŭrŭg isi surat simanya anŭ adi ko dog dapŭd di Ramin TUHAN.

³Ayŭh mijog sindŭk tiang bās adi taŭn mbŭh dog sidia yŭn raja, ka ndai simanya ngga TUHAN an tŭtŭd di Ayŭh, an sita ukum ukum-adat ngga pesan ngga siabo atin-i ka ngga siabo asŭng-i, ka ndai nanyam ka adi mbŭh dog miratak yŭn simanya anŭ, nimun adi mbŭh dog nuris darŭm surat anŭ. Ka sopŭrŭg daya bijanji an sita simanya anŭ.

⁴ Komŭnŭ Josiah mritah Imam Bās Hilkiah, imam imam adi pinurung-i, ngga bara adi tukang jaga di tiban Ramin TUHAN bada piruah sopŭrŭg kayuh adi dog pakai ngga nyambah Baal so darŭm Ramin TUHAN, tibudo tapa Asherah, ngga tibudo tibudo bitang. Raja badang sopŭrŭg kayuh anŭ di sapa kupo sindŭk rubān Kidron, ka komŭnŭ taban dabu-i ka Bethel.

⁵Ayŭh taran so kraja sopŭrŭg imam adi raja raja Judah ko garar bada jugan sadis di tunduh mija mija-sambah adat karŭm di kupo kupo Judah ka di tarun tarun sindŭk Jerusalem -- sopŭrŭg imam adi jugan sadis ka Baal, ka batŭh andu, buran, ong ong bŭkŭn di rangit, samŭn bitang bitang.

⁶Ayŭh kadi so Ramin TUHAN tandā pinatŭng tapa Asherah, taban-i ruah so kupo di ka rubān Kidron, badang-i, nginges ŭbŭ-i bada jadi dabu, ka nabur-i di kubur-ratus.

⁷Ayŭh nyirubuh birit birit di Ramin TUHAN adi yŭn bara sundar rŭŭ.[50] (Diginŭ inŭh bara dayung nanun piraka adi dog pakai ngga nyambah Asherah.)

⁸Ayŭh taban ka Jerusalem imam imam so kupo kupo Judah, ka di ndi tarun tarun tana rais ayŭh nyembar mija mija-sambah adi yŭn ngara jugan sadis. Ayŭh nyirubuh gŭh mija mija-sambah adi dog nitah yŭn umot-kambing sindŭk tiban adi dog pijog Joshua, adi gabenor kupo, tura ka bait tiban-bās adi so daya mŭrŭt kupo.

⁹Bara imam anŭ dŭh dog nyibandar nyiraja di Ramin TUHAN, pak siŭn man ruti dŭh-biragi adi dog nitah yŭn dingan ngara adi samah bara imam.

¹⁰ Raja Josiah nyembar gŭh Topheth, tarun yŭn bisambah adat karŭm di Rubān Hinnom, isa daya dŭh dapŭd nyadis anak dari bait anak dayung ngara ndu sadis badang ka tapa Molech.

¹¹Ayŭh kadi gŭh kuda kuda adi bara raja Judah ko nitah yŭn nyambah batŭh andu, ka badang krita krita kuda adi dog pakai yŭn bisambah anŭ. (Sopŭrŭg anŭ agi dog nyikŭn di badag Ramin TUHAN, sindŭk tiban ka dŭh jo so birit adi yŭn Nathan Melech, pinurung adi bās pangkat, rŭŭ.)

¹² Mija mija-sambah adi raja raja Judah muko pijog di tibung istana nyirungan birit birit Raja Ahaz, Raja Josiah nyirubuh, samŭn mija mija-sambah adi dog pijog Raja Manasseh di duwŭh badag Ramin TUHAN; ayŭh pirandŭk[51] mija mija-sambah anŭ ka taran-i ka Rubān Kidron.

¹³ Josiah nyembar mija-sambah adi Raja Solomon pijog di timor Jerusalem, tura ka siratan Sandah Kanā,[52] adi ngga nyambah tibudo tibudo adi sipŭ anŭ -- Astart adi tapa tapa Sidon, Chemosh adi tapa Moab, ka Molech adi tapa Ammon.

¹⁴Raja Josiah mapar bada asur uros uros batuh pirapu', nyirubuh tandā tandā pinatŭng tapa Asherah, ka tana adi yŭn ngara dog pijog ayŭh nambun ngga turang turang manusia.

¹⁵ Josiah nyirubuh gŭh tarun yŭn bisambah di Bethel adi dog pijog Raja Jeroboam anak Nebat, adi taban Israel bidosa. Josiah nyirubuh mija-sambah, pirandŭk batuh-i,[53] ka mupu-i bada jadi dabu; ayŭh badang gŭh uros gayŭn Asherah.

¹⁶ Komŭnŭ Josiah tingga bait tauh-i ka kiris kada kubur di sandah; ayŭh bada turang turang dog kadi so darŭm kubur ka badang-i di tunduh mija-sambah. Simŭnŭ ayŭh nyembar mija-sambah anŭ, pingandai adi nabi muko ninjau jah di tika gawai kan Raja Jeroboam mijog sindŭk mija-sambah anŭ. Raja Josiah tingga bait tauh-i ka kiris kubur nabi anŭ[54] adi ko ninjau sakanŭ.

¹⁷ “Kubur asi anŭ?” ayŭh siken. Bara daya Bethel nam, “Anŭ kubur nabi adi mandŭg so Judah adi ko ninjau kayuh adi kaam ndai di mija-sambah ati.”

¹⁸“Dŭhnyah ngaso-i,” Josiah nang. “Turang-i dŭh siŭn dog mindah.” Jadi turang-i dŭh dog mindah, ka simŭnŭ gŭh turang nabi adi mandŭg so Samaria.

¹⁹Di barang kupo di Israel Raja Josiah nyirubuh sopŭrŭg tarun yŭn bisambah adat karŭm adi ko dog pijog raja raja Israel, adi ko kinuas TUHAN. Ayŭh ndai di sopŭrŭg mija-sambah anŭ nimun adi mbŭh-i ndai di dudu anŭ di Bethel.

²⁰Ayŭh siŭ sopŭrŭg imam adat karŭm di tunduh mija-sambah adi yŭn ngara nyiraja, ka ayŭh badang turang manusia di barang mija-sambah. Komŭnŭ ayŭh pari ka Jerusalem.

²¹Raja Josiah mritah bara daya bada sita gawai Paska ngga kibās TUHAN adi Tapa ngara, nanyam ka adi mbŭh dog nuris darŭm surat simanya.

²²Gi-mating Paska mun anŭ dog sita tadŭ tadŭ raja di Israel bait di Judah, so jaman akim mritah Israel.

²³Ka madin meh, di sawa adi simŭng mai darŭm pinyipritah Josiah, Paska dog sita di Jerusalem.

²⁴Ngga bada pagŭng ukum ukum-adat adi dog nuris darŭm surat adi Imam Bās mbŭh dapŭd di Ramin TUHAN, Raja Josiah kadi so Jerusalem ngga so kada tarun yŭn di Judah sopŭrŭg daya adi pandai minyu ngga simangi daya adi mbŭh kabŭs ka ngara adi pandai kidaan nasip, ka sopŭrŭg tapa rawang, tibudo tibudo, ngga sopŭrŭg kayuh pakai bisambah adat karŭm.

²⁵Diŭ so ayŭh mating raja mun ayŭh, adi bituan di TUHAN ngga siabo asŭng-i, ngga siabo pikir kira-i, ka ngga siabo tungang-i, tunda sopŭrŭg Ukum-adat Moses. Ripas ayŭh mating gŭh mun ayŭh.

²⁶Pak baji TUHAN adi keya ka apui mbŭh bijagu re nyatŭk Judah amai kayuh adi Raja Manasseh mbŭh ndai, ka madin baji anŭ gibayuh pura.

²⁷TUHAN nang, “Aku re ndai di Judah kayuh adi Aku muko ndai di Israel: Aku re taran daya Judah so tarun tana adi Aku muko nggen di ngara, ka Aku re nyipunok Jerusalem, kupo adi Aku mien, ngga Ramin Ku, tarun yŭn adi ko Aku nang tarun yŭn Aku patut dog nyambah.”

²⁸Sopŭrŭg pingandai Raja Josiah adi bŭkŭn agi dog nuris darŭm Surat Dundan bara Raja Judah.

²⁹Sitadŭn Josiah jadi raja, Raja Neco so Egypt taban bara soldadu ka Yang Euphrates bada turung raja-empaya Assyria. Raja Josiah suba pirŭŭ bara soldadu Egypt di Megiddo pak adŭp-i dog siŭ.

³⁰Bara pinurung-i na tadang-i di krita kuda ka taban-i pari ka Jerusalem, di yŭn-i dog kubur di kubur raja. Daya Judah mien Joahaz anak Josiah ka nginyo ayŭh jadi raja.

³¹Joahaz mbŭh 23 sawa umbur-i kan ayŭh jadi raja di Judah. Ayŭh mritah di Jerusalem taruh buran. Sindŭ-i inŭh Hamutal, anak dayung Jeremiah so kupo Libnah.

³²Tunda suto danding bara tayung babuk-i, ayŭh bidosa rawan TUHAN.

³³Pinyipritah-i mungan kan Raja Neco so Egypt tambit ayŭh jadi daya-takap di Riblah, di tarun tana Hamath, ka bada Judah bayar 3,400 kilogram pirak ngga 34 kilogram mas ndu takŭd.

³⁴ Raja Neco bada Eliakim anak Josiah jadi raja di Judah gati Josiah, ka nukar dŭn-i jadi Jehoiakim. Joahaz dog taban Raja Neco ka Egypt, ka diginŭ ayŭh kabŭs.

³⁵Raja Jehoiakim sun suke so bara daya nanyam tungang daya nggen, ngga nyukup kiang adi ngga bayar takŭd yŭn raja di Egypt.

³⁶ Jehoiakim mbŭh 25 sawa umbur-i kan ayŭh jadi raja di Judah. Ayŭh mritah di Jerusalem simŭng ndi sawa. Sindŭ-i inŭh Zebidah, anak Pedaiah so kupo Rumah.

³⁷Tunda suto danding bara tayung babuk-i, Jehoiakim bidosa rawan TUHAN.