Read Biatah Bidayuh 2 RAJA 24 Bible Online

2 RAJA 24 - Biatah Bidayuh bible

2 RAJA 24

¹ Sitadŭn Jehoiakim jadi raja, Raja Nebuchadnezzar so Babylonia nyerang Judah, ka sitŭkŭd taruh sawa Jehoiakim dog takan nundok di pinyipritah-i. Komŭnŭ ayŭh rawan Nebuchadnezzar.

²TUHAN pait pirupak adi bisinyata so Babylonia, Syria, Moab, ngga Ammon bada rawan Jehoiakim yŭn pirabur Judah, nanyam adi mbŭh TUHAN nang so baba urun-I bara nabi.

³Kayuh anŭ jadi simŭnŭ nanyam ka pinganang TUHAN, ngga taran daya Judah so tarun tana adi-I mbŭh nggen di ngara, sabab sopŭrŭg dosa adi Raja Manasseh mbŭh ndai,

⁴ka rabis-i sabab sopŭrŭg daya adi dŭh sarah adi-i ko siŭ. TUHAN dŭh dapŭd apun Manasseh amai sarah-i anŭ.

⁵Barang masam pingandai Jehoiakim adi bŭkŭn agi dog nuris darŭm Surat Dundan bara Raja Judah.

⁶Jehoiakim kabŭs, ka anak-i Jehoiachin gati ayŭh jadi raja.

⁷Raja Egypt ngga bara soldadu-i dŭh tia ruah so Egypt di biperang dinge, sabab raja Babylonia madin mbŭh nguasa sopŭrŭg tarun tana adi muko dog dapu Egypt, so Yang Euphrates ndŭg baat tana Egypt.

⁸Jehoiachin mbŭh simŭng mai sawa umbur-i kan ayŭh jadi raja di Judah. Ayŭh mritah di Jerusalem taruh buran. Sindŭ-i inŭh Nehushta, anak dayung Elnathan so Jerusalem.

⁹Tunda suto danding sama-i, Jehoiachin bidosa rawan TUHAN.

¹⁰Di jaman pinyipritah-i bara soldadu Babylonia, dog nguru bara pingubak soldadu Nebuchadnezzar, nyerang Jerusalem ka nyikapung-i.

¹¹Adŭp Nebuchadnezzar mandŭg ka Jerusalem di tika kupo anŭ dog nyikapung,

¹² ka Raja Jehoiachin, ayō sindŭ-i, anak anak dari-i, bara pingubak-i, ka sopŭrŭg pinurung-i di istana, nyerah adŭp ngara ka daya Babylonia. Di sawa adi mai darŭm pinyipritah-i, Nebuchadnezzar nakap Jehoiachin jadi daya-takap

¹³ka taban bu ka Babylonia sopŭrŭg rata adi darŭm Ramin TUHAN ka adi darŭm istana. Nanyam adi muko TUHAN diŭ kidaan, Nebuchadnezzar pirusak sopŭrŭg pingakas mas adi Raja Solomon ndai yŭn pakai di Ramin TUHAN.

¹⁴Nebuchadnezzar taban bara daya Jerusalem ngga bu jadi daya-takap, sopŭrŭg anak raja, ka sopŭrŭg pinguru; 10,000 naan prungun ngara. Ayŭh taban ngga bu gŭh bara tukang adi pandai, samŭn tukang basi, tingge kaŭs-i daya adi sirata di Judah.

¹⁵ Nebuchadnezzar taban Jehoiachin ka Babylonia jadi daya-takap, samŭn sindŭ Jehoiachin, bara sawŭn-i, bara pinurung-i, ka bara daya bās di Judah.

¹⁶Nebuchadnezzar taban ngga bu sopŭrŭg daya adi pandai ka Babylonia, 7,000 prungun ngara, ka 1,000 tukang adi pandai, samŭn bara tukang basi. Sopŭrŭg ngara inŭh daya adi tagap bake, dapŭd jadi soldadu.

¹⁷ Nebuchadnezzar bada Mattaniah, adi tua Jehoiachin, jadi raja di Judah ka nukar dŭn-i jadi Zedekiah.

¹⁸ Zedekiah mbŭh 21 sawa umbur-i kan ayŭh jadi raja di Judah. Ayŭh mritah di Jerusalem simŭng ndi sawa. Sindŭ-i inŭh Hamutal, anak Jeremiah so kupo Libnah.

¹⁹Raja Zedekiah bidosa rawan TUHAN, mun Raja Jehoiakim.

²⁰ TUHAN mbŭh ruai baji di daya di Jerusalem ngga di Judah, jadi Ayŭh dŭh tia piduri ngara.