Read Biatah Bidayuh 2 RAJA 25 Bible Online

2 RAJA 25 - Biatah Bidayuh bible

2 RAJA 25

¹ Zedekiah rawan Raja Nebuchadnezzar so Babylonia, jadi Nebuchadnezzar mandŭg ngga sopŭrŭg bara soldadu-i ka nyerang Jerusalem di andu adi simŭng darŭm buran simŭng di sawa adi prii darŭm pinyipritah Zedekiah. Ngara bibari di sapa kupo, pijog sindung sindung ngga nyikapung-i,

²ka nyikapung-i ndŭg sawa adi simŭng ndi darŭm pinyipritah Zedekiah.

³Di andu adi prii darŭm buran pat[55] sawa anŭ, di tipuh apag adi bisā ndŭg ka daya dŭh biyŭn kayuh man,

⁴ pinganyu miratos sindung kuta kupo. Sunggu bara daya Babylonia kirurung kupo, sopŭrŭg soldadu bu singarŭm. Ngara bu so teya raja, ka ruah so tiban-bās adi di asah duwŭh sindung anŭ, ka bu nuju Rubān Jordan.

⁵Pak bara soldadu Babylonia tadak Raja Zedekiah, nakap ayŭh di rabak sindŭk Jericho, ka sopŭrŭg soldadu-i tagan ayŭh.

⁶Zedekiah dog taban ka yŭn Raja Nebuchadnezzar, di kupo Riblah, ka diginŭ Nebuchadnezzar miratak ukum di tunduh ayŭh.

⁷ Di sirung jawin adŭp Zedekiah, anak anak dari-i dog siŭ. Komŭnŭ Nebuchadnezzar bada ruwang batŭh Zedekiah dog kadi, muak ayŭh ngga parik basi, ka taban ayŭh ka Babylon.

⁸Di andu adi ju darŭm buran rimŭh darŭm sawa adi prii darŭm pinyipritah Nebuchadnezzar so Babylonia, Nebuzaradan adi tukang pitayan raja ka adi pingibās soldadu-i, mŭrŭt Jerusalem.

⁹Ayŭh sigot Ramin TUHAN, istana, ngga ramin ramin bara daya adi bās di Jerusalem,

¹⁰ka bara soldadu-i nyirubuh sindung sindung kupo.

¹¹Komŭnŭ Nebuzaradan taban bu ka Babylonia bara daya adi dŭm di kupo, bara tukang adi pandai,[56] samŭn ngara adi muko nyerah adŭp-i jadi soldadu Babylonia.

¹²Pak ayŭh kidŭm di Judah kada ngara adi siabo sirata, adi dŭh biyŭn buat-rata, ka bada ngara nyiraja di teya anggor ka di ŭmŭh.

¹³ Bara daya Babylonia pirandŭk tiang tiang bās timaga ka krita krita timaga adi di darŭm Ramin TUHAN, samŭn tibande tong timaga, ka ngara taban sopŭrŭg timaga ka Babylon.

¹⁴ Ngara taban ngga bu gŭh sanduk ngga bŭrŭh ŭbŭ adi dog pakai di tika pibisig mija-sambah, pingakas adi ngga sita prita, makuk ngga taŭ deya so sadis, ka makuk timaga yŭn badang kimanyan, ka sopŭrŭg pimakai adi bŭkŭn adi dog ndai so timaga, adi dog pakai ngga bisambah di Ramin TUHAN.

¹⁵Ngara tambit barang masam kayuh adi dog ndai so mas ngga pirak, samŭn anak anak makuk ngga tipaku adi ngga taban bam apui.

¹⁶Kayuh kayuh timaga adi Raja Solomon mbŭh ndai yŭn Ramin TUHAN -- tiang tiang bās, krita krita timaga, ngga tibande tong -- mbŭh raru bat re nŭŭh nimbang.

¹⁷Duwŭh tiang bās anŭ brimun: barang tiang 8 mita bigatung, ka ubak tiang di tunduh-i, 1.3 mita bigatung. Maning ubak ubak tiang anŭ agi radai timaga dog ngabuh ngga buwa delima adi dog ndai so timaga.

¹⁸Nambah ka anŭ, Nebuzaradan, adi pingibās soldadu, taban ngga bu jadi bara daya-takap Seraiah adi Imam Bās, Zephaniah adi numbor duwŭh imam, ngga taruh naan pinurung adi pangkat baga di Ramin TUHAN.

¹⁹So kupo ayŭh tambit pingibās adi ko nguasa bara soldadu, rimŭh naan daya adi gibabŭ agi di kupo adi tukang pitayan raja, ngga pinurung pingibās soldadu, adi tukang nguasa rekod soldadu, ngga 60 naan daya adi bŭkŭn adi bās pangkat-i.

²⁰Nebuzaradan taban ngara ka yŭn Raja Babylonia, adi di tika anŭ agi di kupo Riblah

²¹di tarun tana Hamath. Diginŭ raja bada ngara dog kijera ka dog siŭ. Jadi simŭnŭ inŭh daya Judah dog taban ngga bu, ka dog taran so rais adŭp ngara.

²²Raja Nebuchadnezzar so Babylonia bada Gedaliah, anak Ahikam ka sukuh Shaphan, jadi gabenor di Judah, ka bada ayŭh tukang nguasa sopŭrŭg ngara adi gibayuh dog taban ngga bu ka Babylonia.

²³Kan bara pingubak soldadu Judea ngga bara soldadu adi gibayuh nyerah adŭp ngara dingah kayuh anŭ, ngara di bidapŭd ngga Gedaliah di Mizpah. Bara pingubak anŭ inŭh Ishmael anak Nethaniah, Johanan anak Kareah, Seraiah anak Tanhumeth, so kupo Netophah, ngga Jezaniah so Maacah.

²⁴Gedaliah nang di ngara, “Dŭhnyah taru di bara pingibās Babylonia. Rŭŭ di tarun tana ati, bituan di raja Babylonia, ka angān dŭh re mani mani.”

²⁵Pak darŭm buran adi ju sawa anŭ, Ishmael, anak Nethaniah ka sukuh Elishama, adi asar raja, di ka Mizpah ngga simŭng naan daya, nyerang Gedaliah ka siŭ ayŭh. Ayŭh siŭ gŭh daya daya Israel samŭn daya daya Babylonia adi agi diginŭ ngga ayŭh.

²⁶ Komŭnŭ sopŭrŭg daya Israel, kaya bait sirata, samah ngga bara pingubak soldadu, bu di ka Egypt, sabab ngara taru daya Babylonia.

²⁷Di sawa adi ngga-i jadi raja Babylonia, Evilmerodach mandis ngga Jehoiachin adi raja Judah ka pirupas ayŭh so ramin jer. Kayuh anŭ jadi di andu adi 27 darŭm buran simŭng duwŭh di sawa adi 37 ripas Jehoiachin mbŭh dog taban ngga bu jadi daya-takap.

²⁸Evilmerodach kana ngga ayŭh, ka nggen di ayŭh pangkat adi rabis bās so anŭ adi-i nggen di raja raja adi bŭkŭn adi samah dog taran ngga ayŭh di Babylonia.

²⁹Jadi Jehoiachin dog nyibandar dŭh tia nēn piraka-i adi-i nēn di ramin jer ka sitŭkŭd umbur-i ari sua guru man ayō raja.

³⁰Barang andu, sitŭkŭd ayŭh babŭ udip, ayŭh ari dog nggen duit ngga miris biranja yŭn adŭp-i.