Read Biatah Bidayuh 2 RAJA 3 Bible Online

2 RAJA 3 - Biatah Bidayuh bible

2 RAJA 3

¹Di sawa adi simŭng mai darŭm pinyipritah Raja Jehoshaphat di Judah, Joram anak Ahab jadi raja di Israel. Ayŭh mritah di Samaria simŭng duwŭh sawa.

²Ayŭh bidosa rawan TUHAN, pak ayŭh dŭh arap mun sama-i, puan kah sindŭ-i Jezebel. Ayŭh kadi patong adi sama-i ngga sindŭ-i mbŭh pijog ngga nyambah Baal.

³Pak, mun Raja Jeroboam anak Nebat adi diŭ so ayŭh, ayŭh taban Israel bidosa, ka dŭh-i an ko ndai simŭnŭ.

⁴Raja Mesha di Moab kudip biri, ka barang sawa ayŭh pait ndu takŭd ka raja Israel 100,000 biri, ka buruh biri so 100,000 biri.

⁵Pak kan Raja Ahab di Israel kabŭs, Mesha rawan Israel.

⁶Raja Joram rasu bu so Samaria ka nguruk bara soldadu-i.

⁷Ayŭh pait pinganang ka Raja Jehoshaphat di Judah: “Raja di Moab mbŭh rawan aku; an kah kuu sua ngga aku biperang rawan ayŭh?” “An,” Raja Jehoshaphat nam. “Aku mbŭh sidia an turung kuu, ka simŭnŭ gŭh bara daya ku ngga ngara adi pinunggang kuda.

⁸So ki ata matak di nyerang?” “Ata kadŭg aran adi jo, mutas tarun tana-pajam Edom,” Joram nam.

⁹Jadi Raja Joram ngga raja so Judah ngga raja so Edom matak di nyerang. Ripas baris ju andu, piin ngara abo, mating tia yŭn ngara samŭn dāng dāng ngara.

¹⁰“Mŭmbŭh ata ati!” Raja Joram nang. “TUHAN mbŭh ngatur bada ata dog nyerah ka darŭm tangan raja Moab!”

¹¹Raja Jehoshaphat siken, “Agi kah nabi digiti adi so ta bisa bisiken ngga TUHAN?” Ndi naan pingubak soldadu Joram nam, “Elisha anak Shaphat agi digiti. Ayŭh anŭ muko jadi pinurung Elijah.”

¹²“Ayŭh anŭ nabi adi sawŭ,” Raja Jehoshaphat nang. Jadi taruh naan raja anŭ di ka yŭn Elisha.

¹³“Re ku ngga mani turung angān?” Elisha nang di raja Israel. “Panu di bisiken ngga bara nabi anŭ adi yŭn sama mu ngga sindŭ mu bisiken.” “Dŭh!” Joram nam. “Tapa inŭh adi mbŭh ngatur re nyerah kieh ka darŭm tangan raja Moab.”

¹⁴Elisha nam, “Ngga adŭn TUHAN, adi aku yŭn bituan, aku bipayu kambŭi dŭh sitagar pambit mu Raja Jehoshaphat so Judah, aku dŭh an turung kuu.

¹⁵Madin di bagan pimain musik.” Darŭm daya anŭ mambak kachapi-i, kuasa TUHAN mandŭg ka Elisha,

¹⁶ka ayŭh nang, “Ati inŭh kayuh adi TUHAN nang: ‘Kareh parit di tana rasan sungi adi badŭh ati.

¹⁷Sunggu angān dŭh re kiris ujen puan kah sabak, sungi ati re brisi ngga piin, ka angān, ngga dāng dāng ngan, ka dāng adi taban barang ngan re biyŭn sukup piin nok.’ ”

¹⁸Ka Elisha pijuu nang, “Pak ati kayuh adi ruai sanang dog ndai TUHAN. Ayŭh gŭh re nggen pimanang di angān ngarah daya Moab.

¹⁹Angān re ngarah sopŭrŭg kupo ngara adi ramus ka adi bikuta; angān re tabŭng sopŭrŭg tŭngŭn pimuruh ngara, nabat sopŭrŭg atak piin ngara, ka pirusak sopŭrŭg tana mandis ngara pakai dudu batuh adi angān nambun dieh.”

²⁰Isan isan andu jawa ndi, di tika jugan sadis isan isan, piin aman mandŭg so parad Edom, ka ngapuh tana sungi anŭ adi badŭh.

²¹Kan bara daya Moab dingah taruh naan raja anŭ mandŭg di nyerang ngara, sopŭrŭg daya adi tungang digŭng sinyata, so adi minyamba ndŭg ka adi siabo mara, dog bagan bada bijaga di baat.

²²Kan ngara makat isan isan andu jawa ndi, batŭh andu nyekar piin, bada-i bireh mun deya.

²³“Deya anŭ!” ngara sigara. “Kadŭ-i bara soldadu pinganyu ta taruh naan raja anŭ mbŭh bisaad dupan adŭp-i! Ja di sirapas kayuh so bari ngara!”

²⁴Pak kan ngara mbŭh ndŭg tarun yŭn ngara bibari, bara daya Israel nyerang ngara ka tadak ngara. Daya Israel adu adu tadak[4] ka siŭ ngara

²⁵ka pirabur kupo kupo ngara. Darŭm ngara murah tana adi mandis, barang naan daya Israel taran batuh dieh ndŭg ka sopŭrŭg tana abo titambun. Ngara gŭh nabat atak atak piin ka tabŭng tŭngŭn tŭngŭn pimuruh. Sikasŭn-i kaŭs sindŭ kupo Kir Heres[5] adŭ adi dŭm, ka bara soldadu nyikapung ka nyerang-i.

²⁶Kan raja Moab rada adŭp-i mbŭh arah biperang, ayŭh taban 700 soldadu-i adi pakai pedang ka suba nyurong miradak bara soldadu pinganyu ka bu di ka raja Syria,[6] pak ayŭh dŭh tungang.

²⁷Jadi ayŭh tambit anak pinuai-i adi re gati ayŭh jadi raja, ka nyadis ayŭh di sindung kupo ndu sadis ka tapa Moab. Bara daya Israel mbŭh taru[7] ka rasu ngundur bu so kupo anŭ ka pari ka rais adŭp ngara.