Read Biatah Bidayuh 2 RAJA 4 Bible Online

2 RAJA 4 - Biatah Bidayuh bible

2 RAJA 4

¹Ndi naan dayung uban, so tibaran nabi, di ka yŭn Elisha ka nang, “Tuan, banŭh ku mbŭh kabŭs! Kaam puan gŭh, ayŭh daya adi tŭtŭd di Tapa, pak madin ndi naan daya adi so-i nginjam duit mbŭh mandŭg an tambit duwŭh madis anak dari ku bada jadi urun ngga bayar utang banŭh ku.”

²“Ani raan mu aku ndai yŭn mu?” ayŭh siken. “Kidaan di aku, ani biyŭn mu di ramin mu?” “Mating kayuh biyŭn ku, adŭ-i ndi anak gabuk inyo kanā,” ayŭh nam.

³“Di ka yŭn rasū mu ka nginjam engan gabuk sikiang kiang tungang mu dapŭd,” Elisha kidaan di ayŭh.

⁴“Komŭnŭ kuu ngga anak anak dari mu mŭrŭt ramin, tŭŭp tiban, ka ngisi inyo di darŭm dudu gabuk anŭ. Nguruk anŭ adi mbŭh puno.”

⁵Jadi dayung anŭ di ka ramin-i ngga anak anak dari-i, tŭŭp tiban, tambit anak gabuk inyo kanā anŭ, ka ren-i di darŭm dudu gabuk anŭ, adi anak anak-i tukang jugan di ayŭh.

⁶Kan ngara mbŭh ngisi sopŭrŭg gabuk anŭ, ayŭh siken agi kah mating dŭm. “Anŭ inŭh adi sikasŭn-i,” ndi naan so anak-i nam. Ka inyo kanā anŭ mbŭh dŭh tia bititeg.

⁷Ayŭh pari ka yŭn Elisha. Nabi anŭ nang di ayŭh, “Jua inyo kanā anŭ ka bayar nŭh sopŭrŭg utang mu, ka re bagŭ tadŭh-i dŭm sadang ngga mu ngga anak anak mu kudip adŭp ngan.”

⁸Ndi andu Elisha di ka Shunem, di yŭn ndi naan dayung adi kaya rŭŭ. Ayŭh bagan ayŭh ngga bisamah, ka so nganŭ kan ayŭh di ka Shunem ayŭh ari di man di ramin dayung anŭ.

⁹Ayŭh nang di banŭh-i, “Tatu daya anŭ adi ari mandŭg kamati inŭh daya kudus.

¹⁰Ja ata ndai ndi birit di sambu, na ndi pangō, ndi mija, ndi baku, ka ndi prita dieh, ka ayŭh bisa rŭŭ diginŭ kan ayŭh mandŭg ka yŭn ta.”

¹¹Ndi andu Elisha pari ka Shunem ka maad ka birit-i di sambu di guring.

¹²Ayŭh kidaan di daya gaji-i Gehazi bada bagan dayung anŭ. Kan ayŭh mandŭg,

¹³ayŭh nang di Gehazi, “Siken di ayŭh ani raan-i aku ndai yŭn-i ngga maras budi-i adi sidia sopŭrŭg kayuh ati yŭn ta. Kadŭ ayŭh raan aku minyu yŭn-i mite kayuh so raja bait so pingibās soldadu.” “Aku mbŭh biyŭn sopŭrŭg kayuh adi aku raan digiti di dupan bara daya ku,” ayŭh nam.

¹⁴Elisha siken Gehazi, “Ani meh re aku ndai yŭn-i?” Ayŭh nam, “Ayŭh dŭh biyŭn anak dari, ka banŭh-i mbŭh minyamba.”

¹⁵Elisha nang, “Bada ayŭh kamati.” Ayŭh mandŭg ka mijog di baŭm tiban,

¹⁶ ka Elisha nang di ayŭh, “Ngga munti sawa, sawa bauh kuu re puko ndi anak dari.” “Adoh!” ayŭh nam. “Turung, tuan, dŭhnyah kadong aku. Kaam ati daya Tapa!”

¹⁷Pak, sak adi muko Elisha nang, mŭnŭ sawa darŭm sawa anŭ ndi, ayŭh biranak ndi anak dari.

¹⁸Kudu kudu sawa ripas anŭ, di tika ngatŭm, ngga arong isan isan anak anŭ di ka yŭn sama-i, adi mbŭh di teya ngga bara adi tukang ngatŭm.

¹⁹Gŭgŭh ayŭh nyirais nang di sama-i, “Ubak ku mandam! Ubak ku mandam!” “Taban anak anŭ maad ka yŭn sindŭ-i,” sama-i nang di daya-gaji.

²⁰Daya-gaji taban ayŭh maad ka yŭn sindŭ-i. Sindŭ-i kŭkŭn ayŭh ndŭg kumbeng, ka dŭh tui ayŭh rasu kabŭs.

²¹Ayŭh tunduk ayŭh ka birit Elisha, piguring ayŭh di pangō, rasu bu ka tŭŭp tiban.

²²Komŭnŭ ayŭh bagan banŭh-i ka nang di ayŭh, “Bada daya gaji di tambit kaldi. Aku raan di ka yŭn nabi Elisha. Aku re rikas pari.”

²³“Mani kuu sah di andu ati?” banŭh-i siken. “Ati dŭh andu Sabbath puan kah Gawai Anak Buran.”[8] “Dŭh mani,” ayŭh nam.

²⁴Komŭnŭ ayŭh bada kaldi anŭ dog na tapas yŭn guru dieh, ka nang di daya-gaji, “Bada kaldi panu ngga sirikas rikas-i, dŭhnyah bada sitanah, adŭ-i kambŭi aku bada.”

²⁵Ka ayŭh matak, di ka Darŭd Carmel, tarun yŭn Elisha. Darŭm-i gibabŭ jo Elisha mbŭh kiris ayŭh mandŭg, ka nang di daya gaji-i Gehazi, “Tingga -- dayung adi so Shunem mandŭg!

²⁶Rikas di tudu ayŭh ka siken ani agah-i, ani agah banŭh-i ngga anak-i.” Ayŭh kidaan di Gehazi nang sopŭrŭg kayuh agi tirase,

²⁷pak kan ayŭh mbŭh ndŭg Elisha ayŭh mutu ubak nura ayŭh ka tama kaja-i. Gehazi re turak ayŭh, pak Elisha nang, “Tandah ayŭh. Dŭh kah kuu kiris ayŭh raru susah? Ka TUHAN mating kidaan di aku ani ani.”

²⁸Dayung anŭ nang di ayŭh, “Tuan, agi kah aku mite anak dari so kaam? Dŭh kah aku agi kidaan di kaam nang dŭhnyah kies pinyiraan atin ku?”

²⁹Elisha kimat Gehazi ka nang, “Rikas! Tambit sikud ku ka rasu panu. Dŭhnyah rŭŭ ka bitabi ngga daya adi kuu dapŭd di aran, ka kambŭi daya minyu ngga kuu, dŭhsah nam. Panu radus di ka ramin anŭ ka digen sikud ku di tunduh anak anŭ.”

³⁰Dayung anŭ nang di Elisha, “Aku bipayu ngga atin tŭtŭd ku di TUHAN adi udip ngga di kaam aku dŭh re tingge kaam!” Jadi ngara duwŭh samah pari.

³¹Gehazi matak diŭ ka pakat sikud Elisha di tunduh anak anŭ, pak mating sak asŭng-i ka dŭh gŭh biguyut. Jadi ayŭh pari ka Elisha ka nang, “Anak anŭ dŭh burah.”

³²Kan Elisha mbŭh ndŭg, ayŭh di sadi ka darŭm birit ka kiris tadang anak anŭ dog piguring di tunduh pangō.

³³Ayŭh tŭŭp tiban ka bidua ka TUHAN.

³⁴ Komŭnŭ ayŭh sipŭŭb di tunduh anak anŭ, bada baba-i, batŭh-i, tangan-i dog baba, batŭh, tangan anak anŭ. Darŭm ayŭh sipŭŭb di tunduh anak anŭ, pŭrŭng ganan anak anŭ makin ngumat.

³⁵Elisha makat, panu matak mari darŭm birit anŭ, ka komŭnŭ pari di mutu di tunduh anak anŭ dinge. Anak anŭ pasin ju kari ka rasu bidarang.

³⁶Elisha bagan Gehazi ka kidaan di ayŭh bada bagan sindŭ anak anŭ. Kan Ayŭh mŭrŭt, ayŭh nang di ayŭh, “Ta anak mu.”

³⁷Ayŭh sipŭŭb di kaja Elisha, jawin-i di tana; komŭnŭ ayŭh tambit anak-i ka ruah so birit anŭ.

³⁸Agi ndi sidah, di tika apag di ndi tarun tana anŭ, Elisha pari so Gilgal. Darŭm ayŭh ngajar ndi tibaran nabi, ayŭh bada daya gaji-i tanŭk pinguman di ndi tibande priok yŭn ngara.

³⁹Ndi naan so ngara di ngutan kudos tarun. Ayŭh dapŭd tŭngŭn bakah tarun, nyaked sikiang kiang buwa rigo ayŭh tungang taban. Ayŭh taban-i mari ka nyirib-i ka tanŭk-i gaur pinguman darŭm priok anŭ, dŭh puan buwa ani anŭ.

⁴⁰Komŭnŭ pinguman anŭ dog ngidang, pak kan ngara kija-i, ngara sigara di Elisha, “Birasun pinguman ati!” Ngara abah man-i.

⁴¹Elisha mite tibaduk, na-i darŭm priok, ka nang, “Kisak meh pinguman yŭn ngara.” Ka mating tia kika-i.

⁴²Di andu bŭkŭn, ndi naan daya mandŭg so Baal Shalishah, taban ka yŭn Elisha duwŭh puru baru ruti dog ndai so sibungas jeri adi dog ngatŭm sawa anŭ, ngga tundun gandom adi bauh. Elisha kidaan di daya gaji-i bada paan bara nabi ngga pinguman anŭ,

⁴³pak ayŭh nam, “Dang kah ati sŭn mai nang ngga paan siratus naan daya?” Elisha nam, “Nggen di ngara bada man, sabab TUHAN nang ngara re man-i ka re agi kada-i dŭm.”

⁴⁴Jadi daya-gaji anŭ na pinguman anŭ di sirung jawin ngara, ka, sak adi TUHAN muko nang, sopŭrŭg ngara man ka agi kada-i dŭm.