Read Biatah Bidayuh 2 RAJA 5 Bible Online

2 RAJA 5 - Biatah Bidayuh bible

2 RAJA 5

¹Naaman, adi pingibās bara soldadu Syria, adi ruai dog stabi ka ruai timagah di batŭh raja Syria, sabab so Naaman TUHAN mbŭh nggen pimanang di bara soldadu Syria. Ayŭh anŭ soldadu adi pagan, pak ayŭh naman andam kurit adi bisā.

²Di ndi serang ngara rawan Israel, bara soldadu daya Syria agi taban ndi naan anak dayung daya Israel, adi jadi daya-gaji sawŭn Naaman.

³Ndi andu ayŭh nang di sawŭn Naaman, “Kasi kambŭi tuan raan di ka ndi naan nabi adi rŭŭ di Samaria! Ayŭh bisa pibua ayŭh so andam-i.”

⁴Kan Naaman dingah, ayŭh di ka yŭn raja ka kidaan di ayŭh kayuh adi anak dayung anŭ mbŭh nang.

⁵Raja nang, “Di ka yŭn raja Israel ka nggen surat di ayŭh.” Jadi Naaman matak, taban 30,000 kiping pirak, 6,000 kiping mas, ka simŭng piraka kibarui adi grua.

⁶Pinganang di surat adi-i taban agi sakati: “Surat ati kidaan asi pingubak soldadu ku Naaman. Aku raan kuu pibua ayŭh so andam-i.”

⁷Kan raja Israel basa surat anŭ, ayŭh nyiratak piraka-i darŭm baji ka nang, “Simuki raja Syria bisa mite aku pibua daya ati? Ayŭh pikir aku ati Tapa,[9] biyŭn kuasa bada daya udip ka bada daya kabŭs. Mbŭh tatŭng ayŭh raan piguru kaii ngga aku!”

⁸Kan nabi Elisha dingah kayuh adi mbŭh jadi, ayŭh pait pinganang ka raja: “Mani kuu susah? Bada daya anŭ ka yŭn ku, ka aku re kiren di ayŭh agi ndi naan nabi di Israel!”

⁹Jadi Naaman di ngga dudu kuda-i samŭn krita kuda-i ka rŭŭ di tiban ramin Elisha.

¹⁰Elisha pait ndi naan daya gaji bada kidaan di ayŭh da mamuh ju kari di Yang Jordan, ka ayŭh re bua so andam-i anŭ.

¹¹Pak Naaman bu buang tuas, nang, “Aku pikir ayŭh re piji ka mandŭg ka yŭn ku, bidua ka TUHAN adi Tapa-i, pakat tangan-i di tunduh yŭn adi mandam,[10] ka pibua aku!

¹²Yang Abana ngga yang Pharpar, dŭh kah-i kana dŭ so tadŭ tadŭ sungi di Israel? Aku bisa mamuh diginŭ, ka bua so andam ku!”

¹³Daya gaji-i di ka yŭn-i ka nang, “Tuan, kambŭi nabi anŭ bada kaam ndai kayuh adi mbar, kaam patut ndai-i. Mani kaam dŭh mamuh adŭ, sak adi nang-i, ka bua so andam mai anŭ?”

¹⁴Jadi Naaman di ka Yang Jordan, kurom adŭp-i diginŭ ju kari, sak adi Elisha muko kidaan, ka ayŭh rasu bua so andam-i anŭ. Pŭrŭng ganan-i rasu tatŭng tagap buang ramus, mun pŭrŭng ganan anak daya.

¹⁵Ayŭh pari ka Elisha ngga sopŭrŭg daya-i ka nang, “Madin aku puan nang mating tapa adi bŭkŭn adŭ-i Tapa Israel. Turung, tuan, trima pinganggen ati so aku.”

¹⁶Elisha nam, “Ngga adŭn TUHAN adi udip, adi yŭn ku bituan, aku bipayu aku dŭh re trima pinganggen.” Naaman darah bada ayŭh trima-i, pak ayŭh abah.

¹⁷Jadi Naaman nang, “Kambŭi kaam abah trima pinganggen ku, nggen garang di aku tana sikiang adi tungang kuda pinakan kaldi taban, isa aku taban tana anŭ ngga mari,[11] sabab so madin aku dŭh re jugan sadis puan kah sadis badang ka tadŭ tadŭ tapa adŭ-i ka TUHAN.

¹⁸Jadi aku harap TUHAN re apun aku kan aku nguru raja ku di bisambah di bari-sambah Rimmon, tapa rais Syria. Tatu TUHAN re apun aku!”

¹⁹“Panu kuu ngga damai,” Elisha nang. Ka Naaman matak. Ayŭh mbŭh mua juan-i panu,

²⁰kan Gehazi adi daya-gaji Elisha nang darŭm asŭng-i, “Tuan ku bada Naaman bu dŭh bayar ani ani! Ayŭh patut trima kayuh adi daya Syria anŭ an nggen di ayŭh. Ngga adŭn TUHAN adi udip, aku re tadak ayŭh ka tambit kayuh so ayŭh.”

²¹Jadi ayŭh matak di tunda Naaman. Kan Naaman kiris daya tadak adŭp-i, ayŭh mūn so krita kuda-i an dapŭd ayŭh, ka siken, “Ani har?”

²²“Mating har,” Gehazi nam. “Pak tuan ku pait aku bada kidaan di kuu nang bauh tejah duwŭh naan so tibaran nabi di rais tarun tana sandah Ephraim mandŭg, ka ayŭh raan kuu nggen di ngara taruh ribu kiping pirak ngga duwŭh piraka kibarui adi grua.”

²³“Bisa!” Naaman nam, ka takan Gehazi bada trima nŭm ribu kiping pirak. Ayŭh ngisi pirak anŭ di duwŭh kambut, mŭŭng-i, nggen-i ngga duwŭh piraka kibarui adi grua di duwŭh naan urun-i, ka pait-i diŭ so Gehazi.

²⁴Kan ngara mbŭh ndŭg sandah adi yŭn Elisha rŭŭ, Gehazi tambit duwŭh kambut anŭ ka taban-i ngga mŭrŭt ramin. Komŭnŭ ayŭh bada daya-gaji Naaman pari.

²⁵Ayŭh mŭrŭt ramin, ka Elisha siken ayŭh, “So ki kuu?” “Mating aku kamaki maki, tuan,” ayŭh nam.

²⁶Pak Elisha nang, “Dŭh kah aku agi diginŭ kan daya anŭ mūn so krita kuda-i di dapŭd kuu? Ati dŭh tipuh adi ngga trima duit puan kah piraka, teya kanā ngga teya anggor, biri ngga sapi sapi, puan kah daya-gaji!

²⁷Ka madin andam Naaman re dog kuu, ka kuu ngga sesang mu re dog andam anŭ adu adu!” Kan Gehazi bu so nŭ, ayŭh mbŭh dog andam anŭ -- kurit-i mbŭh buda mun salju.