Read Biatah Bidayuh 2 RAJA 6 Bible Online

2 RAJA 6 - Biatah Bidayuh bible

2 RAJA 6

¹Ndi andu tibaran bara nabi adi di ribo Elisha ngadu di ayŭh, “Tarun yŭn ata rŭŭ paŭh sŭ!

²Nyibandar kieh di ka Jordan ka tabŭng tŭngŭn kayuh, isa kieh bisa pijog tarun yŭn rŭŭ diginŭ.” “Bisa,” Elisha nam.

³Ndi naan so ngara ngaja ayŭh sua matak ngga ngara; ayŭh situju,

⁴ka ngara samah matak. Kan ngara mbŭh ndŭg Jordan, ngara piguru nyiraja.

⁵Darŭm ndi naan so ngara tabŭng tŭngŭn kayuh, gŭgŭh ka ubak kapak-i rudos ka rabu ka darŭm piin. “Ani re ku ndai, tuan?” ayŭh nang di Elisha. “Kapak anŭ kapak dog nginjam!”

⁶“Diki-i rabu?” Elisha siken. Daya anŭ tiju tarun yŭn-i rabu, ka Elisha kapŭg rangas, taran-i ka darŭm piin, bada ubak kapak anŭ tipuang.

⁷“Tambit meh,” Elisha nang di ayŭh, ka daya anŭ nyapai ka tambit-i.

⁸Raja Syria biperang ngga Israel. Ayŭh bisiken ngga bara pinurung-i ka mien tarun yŭn-i re ndai bari-i.

⁹Pak Elisha pait pinganang ka raja Israel, bakan ayŭh bada dŭh nyindŭk tarun anŭ, sabab bara daya Syria agi tuman ngara diginŭ.

¹⁰Jadi raja Israel bakan daya-i adi rŭŭ di tarun anŭ, ka ngara mbŭh bijaga. Ka Elisha, agi pikudu kari, bakan raja.

¹¹Sitagar anŭ raja Syria mbŭh ruai baji; ayŭh bagan bara pingubak soldadu-i ka siken ngara, “Asi so angān adi parad ka raja Israel?”

¹²Ndi naan so ngara nam, “Mating, Tuan Raja. Nabi Elisha kidaan di raja Israel kayuh adi kaam mbŭh nang, ndŭg ka anŭ adi kaam nang darŭm birit ani.”

¹³“Jiroh diki yŭn-i,” raja mritah ngara, “Ka aku re di nakap ayŭh.” Kan ayŭh mbŭh dog kidaan nang Elisha agi di Dothan,

¹⁴ayŭh pait bara soldadu kamanŭ ngga dudu kuda ka krita krita kuda. Ngara ndŭg kupo anŭ singarŭm ka kirurung-i.

¹⁵Awar isan isan, daya-gaji Elisha makat, ruah ka sapa ramin, ka kiris bara soldadu Syria ngga dudu kuda ka krita krita kuda kirurung kupo anŭ. Ayŭh pari mŭrŭt ka yŭn Elisha ka nang, “Mŭmbŭh ata, tuan! Ani meh re ata ndai?”

¹⁶“Dŭhnyah taru,” Elisha nam. “Bagŭ dŭ tura ka parad ta so tura ka parad ngara.”

¹⁷Komŭnŭ ayŭh bidua, “O TUHAN, kuka batŭh-i ka bada ayŭh kiris!” TUHAN nam dua-i, ka daya-gaji Elisha nyigura ka kiris bŭngŭn sandah puno bada dudu kuda ka krita krita kuda adi agi apui dieh mbŭh maning Elisha.

¹⁸Kan bara soldadu daya Syria nyerang, Elisha bidua, “O TUHAN, bada ngara ati karak!” TUHAN nam dua-i ka bada ngara karak.

¹⁹Komŭnŭ Elisha di ka yŭn ngara ka nang, “Angān mbŭh kadŭg aran adi sarah; ati dŭh inŭh kupo adi angān jiroh. Tunda aku, ka aku re taban angān ka yŭn daya adi angān jiroh.” Ka ayŭh taban ngara ka Samaria.

²⁰Kan ngara mbŭh mŭrŭt kupo, Elisha bidua, “Kuka batŭh ngara, TUHAN, isa ngara kiris tarun.” TUHAN nam dua-i. Ayŭh bada ngara kiris tarun dinge, ka ngara kiris tarun ka rada adŭp-i di darŭm kupo Samaria.

²¹Kan raja Israel kiris bara soldadu daya Syria anŭ, ayŭh siken Elisha, “Bisa kah aku siŭ ngara, tuan? Bisa kah aku siŭ ngara?”

²²“Dŭhnyah,” Elisha nam. “Sopŭrŭg soldadu adi kuu nakap darŭm biperang kuu dŭh siŭn siŭ. Bada ngara man nok, komŭnŭ bada ngara pari ka yŭn raja ngara.”

²³Jadi raja Israel nggen man bās di ngara. Ka ripas ngara mbŭh man nok, ayŭh bada ngara pari ka yŭn raja Syria. So nganŭ daya Syria dŭh tia nyerang tarun tana Israel.

²⁴Dŭh tui ripas anŭ Raja Benhadad, raja Syria nguru sopŭrŭg bara tibaran soldadu-i rawan Israel ka kirurung kupo Samaria.

²⁵Sitagar dog nyikapung pinguman mbŭh raru kurang di kupo anŭ ndŭg ka rega ubak kaldi mbŭh 80 kiping pirak, ka 200 gram taki manuk asang[12] mbŭh 5 kiping pirak rega-i.

²⁶Ndi andu kan raja Israel panu murah di tunduh sindung kupo, ndi naan dayung bagan, “Turung aku, Tuan Raja!”

²⁷Ayŭh nam, “Kambŭi TUHAN dŭh an turung kuu, pinurung ani meh re aku nggen? Agi kah gandom puan kah wain ku?

²⁸Ani pinyusah mu?” Dayung anŭ nam, “Di andu adi mbŭh ripas dayung ati ngaja aku man anak ku, ka komŭnŭ man anak adŭp-i andu andi.

²⁹ Jadi kieh tanŭk anak ku ka man-i. Di andu andi aku kidaan di ayŭh nang kieh re man anak-i, pak ayŭh mbŭh sukan-i!”

³⁰Kan raja dingah har anŭ, ayŭh nyiratak piraka-i darŭm susah, ka daya adi sindŭk sindung anŭ tungang kiris ayŭh nēn banang guni dog nurap piraka-i.

³¹Ayŭh nang, “Isa-i Tapa siŭ aku kambŭi Elisha dŭh dog kapŭg ubak-i sibayuh andu ati ripuan!”

³²Ka ayŭh pait pinyisung-i bada di tambit Elisha. Nganŭ Elisha agi di ramin-i ngga kudu kudu naan nyamba adi muah tudu ayŭh. Diŭ so pinyisung raja mandŭg, Elisha muko kidaan di bara nyamba anŭ, “Pinyiŭ anŭ mbŭh pait daya bada siŭ aku! Jadi kan ayŭh mbŭh ndŭg ti, tŭŭp tiban ka dŭhnyah bada ayŭh mŭrŭt. Adŭp raja agi dŭh jo tunda punok-i.”

³³Bayuh abo pinganang-i, kan raja[13] mbŭh mandŭg ka nang, “TUHAN inŭh adi taban pinyusah ati ka ata! Re ngga mani aku sah tia kajŭn Ayŭh ndai kayuh?”