Read Biatah Bidayuh 2 RAJA 7 Bible Online

2 RAJA 7 - Biatah Bidayuh bible

2 RAJA 7

¹Elisha nam, “Dingah kayuh adi TUHAN mbŭh nang! Munti andu sipagi kuu re dapŭd miris di Samaria taruh kilogram gandom adi siabo kana puan kah nŭm kilogram jeri ngga rega ndi kiping pirak.”

²Pinurung rapat raja nang di Elisha, “Dŭh-i bisa jadi, dŭh gŭh kambŭi adŭp TUHAN bait kani rasu pait gandom[14] madin!” “Kuu re kiris-i jadi, pak kuu dŭh re man tadŭ tadŭ so pinguman anŭ,” Elisha nam.

³Pat naan daya adi naman andam kurit adi bisā agi mijog di sapa tiban-bās kupo Samaria, ka nang di dingan-i, “Ani sah ata kajŭn digiti ndŭg ka ata kabŭs?

⁴Mating guna-i ata mŭrŭt kupo, sabab ata re kabŭs sikirau diginŭ; pak kambŭi ata rŭŭ digiti ata re kabŭs gŭh. Ngapŭi ja ata di ka tarun yŭn daya Syria bibari. Ngara taŭn an siŭ ata, pak kadŭ dŭh.”

⁵Jadi, darŭm andu mbŭh piguru re karŭm, ngara di ka tarun yŭn daya Syria bibari, pak kan ngara mbŭh ndŭg nŭ, mating daya diginŭ.

⁶TUHAN mbŭh bada daya Syria dingah kayuh sak jawŭn tibaran bara soldadu adi raru bagŭ mandŭg, ngga dudu kuda ka krita krita kuda, ka daya Syria pikir raja Israel muko ngupah raja daya Hitti ngga raja daya Egypt samŭn bara soldadu ngara da nyerang ngara.

⁷Jadi singumi andu anŭ daya Syria babak bu, tagan dudu bari ngara, kuda kuda, samŭn dudu kaldi, ka tandah bari ngara mun mun-i.

⁸Kan pat naan ngara anŭ mbŭh ndŭg bŭngŭn tarun yŭn bibari, ngara mŭrŭt ndi bari, man nok kayuh adi agi diginŭ, tambit pirak, mas, ka piraka adi tungang ngara dapŭd, ka bu di sukan-i. Komŭnŭ ngara pari, mŭrŭt bari adi bŭkŭn, ka ndai simŭnŭ gŭh.

⁹Pak ngara rasu nang di dingan-i, “Ata dŭh patut ndai simuti! Ati agah kana ka ata dŭh patut dŭh kidaan-i di dingan ta. Kambŭi kajŭn andu sipagi, tatu ata re dog ukum. Ja ata di madin ka kidaan di bara pinurung raja!”

¹⁰Jadi ngara bu so tarun yŭn daya Syria bibari anŭ, pari ka Samaria ka bagan soldadu adi tukang jaga tiban-bās kupo: “Kieh di ka tarun yŭn daya Syria bibari ka mating kiris asi asi bait dingah sirŭŭn daya. Dudu kuda ngga kaldi dog nyirunggo, ka dudu bari mun mun-i dog tingge daya Syria.”

¹¹Soldadu anŭ kidaan agah anŭ, ka-i mbŭh ndŭg istana.

¹²Andu gibabŭ karŭm, pak raja makat so ambok-i ka nang di bara pinurung-i, “Aku an kidaan di angān akar daya Syria! Ngara puan pasar apag digiti, jadi ngara mbŭh tingge tarun yŭn ngara bibari ka bisukan di sapa tarun tana rais. Ngara pikir ata re tingge kupo di jiroh pinguman, ka ngara re nakap ata ka sirabut kupo.”

¹³Ndi naan so bara pinurung-i nang, “Daya di kupo ati taŭn re kabŭs garang-i nŭh, mun ngara adi mbŭh tui kabŭs. Jadi suba ata pait kudu kudu naan daya ngga rimŭh kuda adi dŭm, isa ata bisa puan ani adi mbŭh jadi.”[15]

¹⁴Jadi ngara mien kudu kudu naan daya, ka raja pait ngara ngga duwŭh krita kuda ngga pinganang bada tingga ani adi mbŭh jadi di bara soldadu daya Syria.

¹⁵Ngara matak jeh ndŭg Yang Jordan, ka di aran ngara kiris dudu piraka ngga pingakas adi daya Syria mbŭh tingge darŭm ngara babak bu. Komŭnŭ ngara pari ka kidaan di raja.

¹⁶Daya Samaria rikas ruah di sirapas dudu kayuh di bari daya Syria. Ka, sak adi TUHAN muko nang, 3 kilogram gandom adi siabo kana puan kah 6 kilogram jeri dog jua ngga rega ndi kiping pirak.

¹⁷Pak tipia gŭh raja Israel muko bada pinurung-i adi siabo rapat ngga adŭp-i jaga tiban-bās kupo. Pinurung rapat-i anŭ dog digang bara daya ndŭg ka kabŭs, sak adi Elisha muko diŭ kidaan di andu raja di bidapŭd ngga ayŭh.

¹⁸Elisha muko kidaan di raja nang di tipuh anŭ, andu adi ndi, 3 kilogram gandom adi siabo kana puan kah 6 kilogram jeri re dog jua di Samaria ngga rega ndi kiping pirak,

¹⁹adi pinurung raja anŭ mbŭh nam, “Dŭh-i bisa jadi, dŭh gŭh kambŭi adŭp TUHAN bait kani rasu pait gandom madin!” Ka Elisha gŭh mbŭh nam, “Kuu re kiris-i jadi, pak kuu dŭh re man tadŭ tadŭ so pinguman anŭ.”

²⁰Ka anŭ inŭh meh kayuh adi jadi di ayŭh -- ayŭh kabŭs, dog digang bara daya di tiban-bās kupo.