Read Biatah Bidayuh 2 RAJA 8 Bible Online

2 RAJA 8 - Biatah Bidayuh bible

2 RAJA 8

¹ Jadi Elisha muko kidaan di dayung adi rŭŭ di Shunem, adi anak dari-i ayŭh muko bada pari udip, nang TUHAN re pait apag di tarun tana Israel sitŭkŭd ju sawa, ka ayŭh ngga rawang-i dŭh siŭn dŭh bu ka rŭŭ di tarun bŭkŭn.

²Ayŭh tunda pinganang Elisha ka mbŭh taban rawang-i ngga rŭŭ di Philistia yŭn ju sawa anŭ.

³Di tŭbŭn ju sawa anŭ, ayŭh pari ka Israel ka di bidapŭd ngga raja, an mite ramin ngga tana-i dog pari ka adŭp-i.

⁴Ayŭh dapŭd raja anŭ minyu ngga Gehazi adi daya gaji Elisha; raja an puan pasar pingandai-nginga Elisha.

⁵Darŭm Gehazi kidaan di raja munki Elisha bada daya adi kabŭs pari udip, dayung anŭ ndai pimite-i di raja. Gehazi nang di raja, “Tuan Raja, ta ayŭh dayung anŭ ka ta anak-i adi Elisha mbŭh bada pari udip!”

⁶Darŭm-i nam pinyiken raja, dayung anŭ natu dundan Gehazi anŭ sawŭ, ka nganŭ raja bagan ndi naan pinurung-i ka bada ayŭh pari ka dayung anŭ sopŭrŭg kayuh adi ayŭh dapu, samŭn rega buwa buwa pimuruh adi dog ngatŭm sitadŭn ju sawa anŭ adi ngga-i rŭŭ di rais bŭkŭn.

⁷Elisha di ka Damascus di tipuh Benhadad adi Raja Syria birandam. Kan raja anŭ dog kidaan nang Elisha agi diginŭ,

⁸ayŭh nang di Hazael, ndi naan so pinurung-i, “Taban pinganggen ka nabi anŭ, ka bada ayŭh siken so TUHAN, re bua kah dŭh aku so andam ku.”

⁹Jadi Hazael na di tunduh 40 onta barang masam kayuh adi grua so Damascus ka di ka yŭn Elisha. Kan Hazael bidapŭd ngga ayŭh, ayŭh nang, “Urun mai Raja Benhadad bada aku di ka yŭn mai yŭn siken re bua kah dŭh ayŭh so andam-i.”

¹⁰Elisha nam, “TUHAN mbŭh pinandŭng di aku nang ayŭh re kabŭs; pak kidaan di ayŭh nang ayŭh re bua.”

¹¹Komŭnŭ Elisha tirek ngga raŭn adi raru arap-i ndŭg ka Hazael mbŭh dŭh gimanyam. Elisha rasu sien.

¹²“Mani kaam sien, tuan?” Hazael siken. “Sabab aku puan kayuh adi raru sipŭ adi kuu re ndai di tunduh daya Israel,” Elisha nam. “Kuu re sigot kuta kuta ngara, siŭ bara anak dari ngara adi piaŭn, mukong anak-anya ngara ndŭg kabŭs, ka nyeja tain dayung ngara adi bite.”

¹³ “So ki aku re dapŭd kuasa ngga ndai simŭnŭ?” Hazael siken. “Aku ati daya saja!” “TUHAN mbŭh kiren di aku nang kuu re jadi raja Syria,” Elisha nam.

¹⁴Hazael pari ka yŭn Benhadad, adi siken ayŭh, “Ani meh nang Elisha?” Hazael nam, “Ayŭh kidaan di aku nang kaam taŭn re bua.”

¹⁵Pak di andu anŭ ndi Hazael tambit putong, kurom-i di piin, ka pakai-i ngga nutu jawin raja bada ayŭh kabŭs aka. Ka Hazael mbŭh gati Benhadad jadi raja di Syria.

¹⁶Di sawa adi simŭng rimŭh Joram adi anak Ahab jadi raja di Israel,[16] Jehoram anak Jehoshaphat jadi raja di Judah

¹⁷kan umbur-i mbŭh 32 sawa. Ayŭh mritah di Jerusalem mai sawa.

¹⁸Sawŭn-i anak Ahab, ka mun rawang Ahab ayŭh tunda urah arap raja Israel. Ayŭh bidosa rawan TUHAN,

¹⁹ pak TUHAN dŭh raan pirabur Judah, amai Ayŭh mbŭh bijanji ngga urun-i David nang sesang-i re adu adu mritah.

²⁰ Di jaman pinyipritah Jehoram, Edom makat rawan Judah ka rasu pijog pritah adŭp-i.

²¹Jadi Jehoram ngga sopŭrŭg krita kuda-i matak ka Zair, di yŭn ngara dog kirurung bara soldadu daya Edom. Singarŭm ayŭh ngga bara pingubak krita krita kuda-i dapŭd pirupas adŭp ngara, ka bara soldadu-i mbŭh tibasak pari ka ramin arŭn adŭp ngara.

²²So nganŭ Edom mbŭh dŭh tia bisangan di pritah Judah. Di jaman anŭ gŭh kupo Libnah makat birawan, raan pirupas adŭp-i.

²³Sopŭrŭg pingandai Jehoram adi bŭkŭn mbŭh dog nuris darŭm Surat Dundan bara Raja Judah.

²⁴Jehoram kabŭs ka dog kubur di kubur raja di Kupo David, ka anak-i Ahaziah gati ayŭh jadi raja.

²⁵Di sawa adi simŭng duwŭh Joram adi anak Ahab jadi raja di Israel, Ahaziah anak Jehoram mbŭh jadi raja di Judah

²⁶kan umbur-i mbŭh 22 sawa, ka ayŭh mritah di Jerusalem ndi sawa. Sindŭ-i inŭh Athaliah, anak Raja Ahab ka sukuh Raja Omri di Israel.

²⁷Amai Ahaziah bimadis ngga Raja Ahab so banan sawan, ayŭh mbŭh bidosa rawan TUHAN, nimun rawang Raja Ahab.

²⁸Raja Ahaziah bipambit ngga Raja Joram so Israel biperang rawan Raja Hazael so Syria. Duwŭh parad bara soldadu anŭ bisaad di Ramoth di Gilead, ka Joram biragan.

²⁹Ayŭh pari ka kupo Jezreel di yŭn-i kajŭn tawan-i bua, ka Ahaziah di kamanŭ di munan ayŭh.