Read Biatah Bidayuh 2 RAJA 9 Bible Online

2 RAJA 9 - Biatah Bidayuh bible

2 RAJA 9

¹Di tika anŭ nabi Elisha bagan ndi naan so bara nabi adi mara ka nang di ayŭh, “Sidia adŭp mu ka nŭh di ka Ramoth di Gilead. Taban gabuk inyo kanā ati.

²Kan kuu mbŭh ndŭg nŭ, jiroh Jehu, anak Jehoshaphat ka sukuh Nimshi. Taban ayŭh ka ndi birit jo so bara dingan-i,

³ren inyo kanā ati di ubak-i, ka nang, ‘TUHAN mbŭh nang Ayŭh nginyo kuu jadi raja Israel.’ Komŭnŭ kuu bu so nŭ ngga sirikas rikas mu.”

⁴Nabi adi mara anŭ di ka Ramoth,

⁵di yŭn-i dapŭd pingubak pingubak soldadu aŭn tikuruk kirakar. Ayŭh nang, “Tuan, aku agi taban agah yŭn mai.” Jehu siken, “Aki ndi so kieh adi kuu ngga minyu?” “Ngga kaam, tuan,” ayŭh nam.

⁶ Komŭnŭ ngara duwŭh mŭrŭt birit, ka nabi adi mara anŭ ren inyo kanā anŭ di ubak Jehu ka nang di ayŭh, “TUHAN, adi Tapa Israel nang: ‘Aku nginyo kuu jadi raja daya Ku Israel.

⁷Kuu di siŭ raja adi tuan mu, anak Ahab anŭ, isa Aku bisa ngukum Jezebel amai-i mbŭh siŭ bara nabi ngga bara urun Ku adi bŭkŭn.

⁸Sopŭrŭg rawang Ahab ngga bara sesang-i dŭh siŭn dŭh kabŭs; Aku re siŭ barang naan anak dari darŭm rawang-i, mara bait minyamba.

⁹Aku re ndai di rawang-i mun Aku mbŭh ndai di bara rawang Jeroboam ngga Baasha adi duwŭh naan raja Israel.

¹⁰ Jezebel dŭh re dog kubur; tadang-i re dog man dudu kasong di tarun tana Jezreel.’ ” Ripas muko nang sakanŭ, nabi adi mara anŭ ruah so birit anŭ ka bigaut bu.

¹¹Jehu pari ka yŭn bara dingan-i adi bara pingubak adi bŭkŭn, adi siken ayŭh, “Ani har? Ani raan sigira anŭ so kuu?” “Angān puan kayuh raan-i,” Jehu nam.

¹²“Dŭh kieh puan!” Ngara nam. “Kidaan di kieh ani nang-i!” “Ayŭh kidaan di aku nang TUHAN nang: ‘Aku nginyo kuu jadi raja Israel.’ ”

¹³Nganŭ gŭh bara dingan Jehu mamad jipo ngara di ubak tungoh yŭn Jehu mijog, buang mambak trompet, ka nyirais nang, “Jehu inŭh raja!”

¹⁴Komŭnŭ Jehu bipekat yŭn re rawan Raja Joram, adi agi di Jezreel, di yŭn-i kajŭn adŭp-i bua so tawan adi-i dapŭd darŭm biperang di Ramoth rawan Raja Hazael so Syria. Jadi Jehu nang di bara dingan-i bara pingubak adi bŭkŭn, “Kambŭi angān parad ka aku ingat meh dŭhnyah bada tadŭ tadŭ daya ruah so Ramoth di bakan daya di Jezreel.”

¹⁶Komŭnŭ Jehu mŭrŭt krita kuda-i ka matak ka Jezreel. Joram bayuh bua, ka Raja Ahaziah so Judah agi diginŭ, munan ayŭh.

¹⁷Ndi naan soldadu adi jaga di tawā di Jezreel kiris Jehu ngga bara daya-i mandŭg. “Aku kiris daya mandŭg!” ayŭh nyirais nang. Joram nam, “Pait ndi naan pinunggang kuda bada tingga nang ka daya kana ka pinganyu anŭ.”

¹⁸Pinyisung ruah di tudu Jehu ka nang di ayŭh, “Raja raan puan kadŭ-i kuu mandŭg keya ka jerā.” “Ani kuu sah puan!” Jehu nam. “Sua ngga tibaran ku!” Soldadu adi tukang jaga di tawā kidaan nang pinyisung anŭ mbŭh ndŭg tibaran anŭ pak dŭh pari.

¹⁹Pinyisung adi bŭkŭn dinge dog pait, adi siken Jehu sakanŭ gŭh. Babŭ gŭh Jehu nam, “Ani kuu sah puan! Sua ngga tibaran ku!”

²⁰Soldadu adi tukang jaga anŭ kidaan gŭh dinge nang pinyisung anŭ mbŭh ndŭg tibaran anŭ pak dŭh pari. Ka ayŭh nang gŭh, “Pingubak tibaran anŭ nambang krita kuda-i mun daya gira, batur mun Jehu!”

²¹“Sidia krita kuda ku,” Raja Joram mritah. Ka-i mbŭh dog sidia, ka ayŭh ngga Raja Ahaziah ruah, masin masin nambang krita kuda adŭp-i, di tudu Jehu. Ngara bidapŭd ngga ayŭh di teya Naboth.

²²“Kuu mandŭg ngga damai kah?” Joram siken ayŭh. “Simuki re agi damai,” Jehu nam, “darŭm ata gibabŭ ndai pingandai siher ka nyambah tibudo adi sindŭ mu Jezreel piguru?”

²³“Ahaziah, ati inŭh birawan rawan pritah,” Joram nyirais nang buang-i nguit krita kuda-i ka rasu bu.

²⁴Jehu pakat bawŭh-i, ka ngga situngang tungang-i nimbak reja-panah bada dog punok Joram ka tambus ndŭg atin-i. Joram tumbang darŭm krita kuda-i ka kabŭs,

²⁵ka Jehu nang di pinurung-i Bidkar, “Tambit tadang-i ka taran di teya Naboth. Ingat di andu kuu ngga aku samah tunda Ahab adi sama Raja Joram, TUHAN mbŭh minyu sakati di Ahab:

²⁶ ‘Aku kiris Naboth ngga anak anak dari-i dog siŭ mijah. Ka Aku bipayu Aku re ngukum kuu digiti di teya ati gŭh.’ Ngapŭi meh, tambit tadang Joram ka taran-i di teya Naboth, ngga bada payu TUHAN jadi bitŭtŭk.”

²⁷Raja Ahaziah kiris kayuh adi mbŭh jadi, ayŭh bu pakai krita kuda-i nuju kupo Beth Haggan dog tadak Jehu. “Siŭ ayŭh gŭh!” Jehu mritah bara soldadu-i, ka ngara bada ayŭh biragan[17] darŭm ayŭh nambang krita kuda-i di aran ndŭg Gur, sindŭk kupo Ibleam. Pak ayŭh tungang nyana pijuu jeh ndŭg kupo Megiddo, adi yŭn-i kabŭs.

²⁸Bara pinurung-i taban tadang-i pari ka Jerusalem darŭm krita kuda ka kubur ayŭh di kubur raja di Kupo David.

²⁹Ahaziah jadi raja di Judah darŭm sawa adi simŭng ndi di jaman Joram anak Ahab jadi raja di Israel.

³⁰Jehu mandŭg di Jezreel. Jezebel, mbŭh dingah kayuh adi mbŭh jadi, nakit ngudat batŭh-i, nyinod ubok-i, ka mijog tingga aran so pinjan istana.

³¹Darŭm Jehu mŭrŭt tiban-bās kupo, Jezebel nyirais nang, “Kuu Zimri![18] Kuu pinyiŭ! Mani kuu kamati?”

³²Jehu nyigura ka nyirais nang, “Asi adi parad ka aku?” Duwŭh taruh naan pinurung istana tingga ka sagān so pinjan,

³³ka Jehu nang di ngara, “Buan ayŭh ka sagān!” Ngara buan Jezebel ka sagān, ka deya-i tipasik di sindung ngga di dudu kuda. Jehu bada kuda kuda ngga krita kuda-i panu di tunduh tadang Jezebel,

³⁴mŭrŭt ka darŭm istana, ka man. Nganŭ meh ayŭh nang, “Tambit dayung adi tio anŭ ka kubur ayŭh; mŭnŭ anak raja gŭh ayŭh.”

³⁵Pak ngara adi ruah re kubur ayŭh mating dapŭd ani ani, adŭ-i tikurok ka turang kaja ngga tangan-i.

³⁶ Kan ngara kidaan kayuh anŭ di Jehu, ayŭh nang, “Ati inŭh kayuh adi TUHAN muko nang re jadi, di andu Ayŭh minyu so baba Elijah adi urun-i: ‘Kasong re man tadang Jezebel di tarun tana Jezreel.

³⁷Rapuh tadang-i re mingare mun taki, ndŭg ka dŭh tungang dog natŭng.’ ”