Read Biatah Bidayuh 1 KRONIKEL 10 Bible Online

1 KRONIKEL 10 - Biatah Bidayuh bible

1 KRONIKEL 10

¹Bara daya Philistine biperang rawan bara daya Israel di Darŭd Gilboa. Bagŭ daya Israel dog siŭ diginŭ, ka adi bŭkŭn, samŭn adŭp Raja Saul ngga bara anak dari-i babak bu.

²Pak bara daya Philistine tadak ka nyandat ngara ka siŭ taruh madis anak Saul, Jonathan, Abinadab ngga Malchishua.

³Bisaad anŭ mbŭh makin bisā maning Saul, ka ayŭh dog tabŭk reja reja-panah pinganyu, ka mbŭh bana biragan.

⁴Saul nang di bujang dari anŭ adi tukang digŭng sinyata perang-i, “Nyitak pedang mu ka siŭ aku isa daya Philistine adi dŭh puan Tapa dŭh tawŭh aku.” Pak dari bujang anŭ mbŭh raru dŭh birani re ndai simŭnŭ. Jadi Saul nyitak pedang adŭp-i ka sagan adŭp-i dieh.

⁵Bujang dari anŭ kiris Saul kabŭs, ayŭh sagan gŭh adŭp-i di pedang-i ka kabŭs.

⁶Jadi Saul ngga anak anak dari-i adi taruh madis mbŭh samah kabŭs ka mating sesang-i tia mritah.

⁷Kan bara daya Israel adi rŭŭ di Rubān Jezreel dingah agah bara soldadu Israel mbŭh babak bu ka Saul ngga anak anak-i mbŭh kabŭs, ngara babak bu tagan kupo kupo ngara. Komŭnŭ bara daya Philistine mandŭg ka ngisi kupo kupo anŭ.

⁸Ndi andu ripas biperang anŭ, bara daya Philistine matak di mirupak sinyata daya adi mbŭh kabŭs, ka ngara dapŭd tadang Saul ngga tadang bara anak-i prigure di Darŭd Gilboa.

⁹Ngara kapŭg ubak Saul, pirukos jipo perang-i so pŭrŭng-i, ka pait bara pinyisung bada taban-i ka barang yŭn di Philistia, piagah agah kana di tibudo tibudo ngga di bara daya ngara.

¹⁰Ngara na sinyata Saul di ndi so dudu bari-sambah ngara ka tangid ubak-i di bari-sambah Dagon adi tapa ngara

¹¹Kan bara daya di Jabesh di tarun tana Gilead dingah kayuh adi daya Philistine mbŭh ndai di tunduh Saul,

¹²bara dari adi pagan matak di tambit tadang Saul ngga tadang bara anak-i ka taban-i ka Jabesh. Ngara kubur ngara di ribo tŭngŭn oak ka bipusa ju andu.

¹³ Saul kabŭs sabab ayŭh dŭh tŭtŭd di TUHAN. Ayŭh nyibireu pesan TUHAN; ayŭh bisiken ngga roh roh daya adi mbŭh kabŭs

¹⁴ka dŭh bisiken ngga TUHAN. Ngapŭi TUHAN siŭ ayŭh ka nggen pritah-i ka David anak Jesse.