Read Biatah Bidayuh 1 KRONIKEL 13 Bible Online

1 KRONIKEL 13 - Biatah Bidayuh bible

1 KRONIKEL 13

¹Raja David bisiken ngga sopŭrŭg pingubak soldadu adi nguasa siribu soldadu ndi naan ngga adi nguasa siratus soldadu ndi naan.

²Komŭnŭ ayŭh kidaan di sopŭrŭg daya Israel, “Kambŭi angān situju ka kambŭi-i pinyiraan adŭp TUHAN adi Tapa ta, ja ata pait pinyisung ka bara daya ta adi bŭkŭn, ka bara imam, ka bara daya Levi di kupo kupo ngara, ka kidaan di ngara bada tikuruk digiti ngga ata.

³Komŭnŭ ata re di tambit Pati Simanya Tapa, adi dŭh dog piduri sitadŭn Saul jadi raja.”

⁴Bara daya munos asŭng ngga atur anŭ ka mbŭh samah situju.

⁵ Jadi David bada tikuruk bara daya Israel so ndi tarun tana rais, so baat ngga Egypt di tura ka siratan ndŭg Ateng Hamath di tura ka Utara, yŭn re an tambit Pati Simanya so Kiriath Jearim ka taban-i ka Jerusalem.

⁶ David ngga bara daya di ka kupo Baalah, anŭ inŭh, di ka Kiriath Jearim, di tarun tana Judah, di tambit Pati Simanya Tapa, adi dog kadŭn TUHAN bitakta di tunduh cherubim.

⁷Di ramin Abinadab ngara piruah Pati Simanya ka na-i di tunduh ndi krita-sapi adi tibŭn. Uzzah ngga Ahio adi tukang taban krita-sapi anŭ,

⁸sitadŭn David ngga bara daya bandar bandar birajang kibās Tapa. Ngara biragu ka mambak kachapi, gendang, sigager, ka trompet.

⁹Darŭm ngara mandŭg ka tarun yŭn ngiik di Chidon, sapi adi tarik krita anŭ sikak, ka Uzzah ton tangan-i ka digŭng Pati Simanya anŭ.

¹⁰Jam anŭ gŭh TUHAN rasu baji di Uzzah ka siŭ ayŭh amai tama pati anŭ. Ayŭh kabŭs diginŭ di sirung jawin TUHAN,

¹¹ka tarun anŭ meh mbŭh dog kadŭn Perez Uzzah[40] so andu anŭ. David mbŭh raru baji sabab TUHAN mbŭh ngukum Uzzah darŭm baji.

¹²Komŭnŭ David taru di Tapa ka nang, “Simuki meh aku re taban Pati Simanya anŭ?”

¹³Jadi David dŭh taban-i ka Jerusalem. Ayŭh tingge-i adŭ di ramin ndi naan daya dŭn Obed Edom, daya asar kupo Gath.

¹⁴ Pati anŭ diginŭ sitŭkŭd taruh buran, ka TUHAN nyiberkat rawang Obed ka sopŭrŭg kayuh adi-i dapu.