Read Biatah Bidayuh 1 KRONIKEL 15 Bible Online

1 KRONIKEL 15 - Biatah Bidayuh bible

1 KRONIKEL 15

¹Yŭn guna adŭp-i, David pijog dudu ramin di kupo David.[43] Ayŭh gŭh sidia tarun yŭn Pati Simanya Tapa ka ndai bari yŭn-i.

² Komŭnŭ ayŭh nang, “Kaŭs daya Levi adŭ adi patut tawid Pati Simanya, sabab ngara inŭh adi TUHAN mbŭh mien bada tawid-i ka adi adu adu bituan di Ayŭh.”

³Jadi David bagan sopŭrŭg daya Israel bada mandŭg ka Jerusalem amai an taban Pati Simanya ka tarun yŭn adi mbŭh-i sidia.

⁴Komŭnŭ ayŭh bagan bara sesang Aaron ngga bara daya Levi.

⁵So manak Kohath adi daya Levi mandŭg Uriel, adi nguasa 120 naan so manak-i;

⁶so manak Merari mandŭg Asaiah, adi nguasa 220 naan;

⁷so manak Gershon, Joel, adi nguasa 130 naan;

⁸so manak Elizaphan, Shemaiah, adi nguasa 200 naan;

⁹so manak Hebron, Eliel, adi nguasa 80 naan;

¹⁰ka so manak Uzziel, Amminadab, adi nguasa 112 naan.

¹¹David bada mŭrŭt bara imam Zadok ngga Abiathar ngga nŭm naan daya Levi, Uriel, Asaiah, Joel, Shemaiah, Eliel, ngga Amminadab.

¹²Ayŭh nang di bara daya Levi, “Angān inŭh pinguru manak daya Levi. Pibisig adŭp ngan ngga dingan ngan adi samah daya Levi, isa angān bisa taban Pati Simanya TUHAN adi Tapa Israel ka tarun yŭn adi aku mbŭh sidia yŭn-i.

¹³Sabab angān mating ngga kieh prajah ka tukang tawid-i, TUHAN adi Tapa ta ngukum kieh amai kieh dŭh nyambah Ayŭh nimun patut.”

¹⁴Komŭnŭ bara imam daya Levi pibisig adŭp ngara siŭn ngara dapŭd mindah Pati Simanya TUHAN adi Tapa Israel.

¹⁵ Bara daya Levi tawid-i pakai pinawid di tunduh kawin ngara, nimun adi mbŭh TUHAN pesan so baba Moses.

¹⁶David mritah bara pinguru daya Levi bada tijuan tadŭ tadŭ daya Levi da biragu ka main ragu gaŭn pakai kachapi ngga sigager.

¹⁷So manak manak bara pinyanyi, ngara mien kudu kudu naan daya bada main sigager timaga: Heman anak Joel, madis-i Asaph anak Berechiah, ngga Ethan anak Kushaiah, so manak Merari. Ngga turung ngara, bara daya Levi adi bŭkŭn dog mien bada main kachapi adi bigatung jawŭn-i: Zechariah, Jaaziel, Shemiramoth, Jehiel, Unni, Eliab, Maaseiah, ngga Benaiah. Ngara mien dinge bara daya Levi adi bŭkŭn bada main kachapi adi rapat jawŭn-i: Mattithiah, Eliphelehu, Mikneiah, Azaziah, ngga bara adi tukang jaga Ramin TUHAN, Obed Edom ngga Jeiel.

²²Sabab pimandai-i di musik, Chenaniah dog mien bada nguasa bara manak Levi adi tukang main musik.

²³Berechiah ngga Elkanah, samah ngga Obed Edom ngga Jehiah, mbŭh dog mien bada tukang jaga Pati Simanya. Bara imam Shebaniah, Joshaphat, Nethanel, Amasai, Zechariah, Benaiah, ngga Eliezer mbŭh dog mien bada tukang mambak trompet di jawin Pati Simanya.

²⁵Jadi Raja David, bara pinguru Israel, ngga bara pingibās soldadu di ka ramin Obed Edom di tambit Pati Simanya, ka ngara ndai gawai bās.

²⁶Ngara nyadis ju dari sapi ka ju biri, amai Tapa mbŭh turung bara daya Levi adi tawid Pati Simanya anŭ.

²⁷David nēn piraka ambu adi dog ndai so banang linen adi jarŭh, ka simŭnŭ gŭh bara adi tukang main musik, Chenaniah adi pinguru ngara, ka bara daya Levi adi tawid Pati anŭ. David nēn gŭh efod banang linen.

²⁸Jadi sopŭrŭg daya Israel samah taban Pati Simanya anŭ ka Jerusalem ngga sirais gaŭn, jawŭn trompet, jawŭn tanduk, ka jawŭn sigager, ngga jawŭn musik dog mambak ngga kachapi.

²⁹Darŭm Pati anŭ dog taban mŭrŭt kupo, Michal, anak dayung Saul, nyingo so pinjan ka kiris Raja David birajang buang-i mirupat mirupat ngga gaŭn, ka ayŭh mbŭh raru dŭh munos asŭng-i kiris.