Read Biatah Bidayuh 1 KRONIKEL 18 Bible Online

1 KRONIKEL 18 - Biatah Bidayuh bible

1 KRONIKEL 18

¹Mua tian ripas anŭ Raja David nyerang daya Philistine ka ngarah ngara. Ayŭh tambit so ngara kupo Gath samŭn anak anak kupo adi maning anŭ.

²Ayŭh gŭh ngarah daya Moab, adi trima ayŭh jadi raja ngara ka bayar suke di ayŭh.

³Ripas anŭ, David nyerang Raja Hadadezer, adi pimritah di Zobah, sindŭk tarun tana Hamath di tarun tana rais Syria, sabab Hadadezer suba an nguasa tarun tana sindŭk sijo Yang Euphrates.

⁴David sirapas siribu krita kuda-i, 7,000 soldadu-i adi pinunggang kuda, ka 20,000 soldadu-i adi panu kaja. Ayŭh nyikŭn sukup kuda yŭn siribu krita kuda ka bada bajang sopŭrŭg adi bŭkŭn.

⁵Kan bara daya Syria so Damascus pait ndi bara tibaran soldadu bada turung Raja Hadadezer, David nyerang-i ka siŭ 22,000 naan daya.

⁶Komŭnŭ ayŭh pijog bari bara tibaran soldadu di tarun tana ngara, ka ngara trima ayŭh jadi raja ngara ka bayar suke di ayŭh. TUHAN bada David manang biperang di tadŭ tadŭ yŭn.

⁷David sirapas pinangin pinangin mas Hadadezer adi dog pakai bara pinurung Hadadezer ka taban-i ka Jerusalem.

⁸ Ayŭh gŭh tambit raru bagŭ timaga so Tibhath ngga Kun, kupo kupo adi dog mritah Hadadezer. (Ripas anŭ Solomon pakai timaga anŭ ngga ndai tong, tiang bās, ka pingakas pingakas timaga yŭn Ramin TUHAN.)

⁹Raja Toi, pimritah di Hamath dingah David mbŭh ngarah sopŭrŭg bara tibaran soldadu Hadadezer.

¹⁰Jadi ayŭh pait anak-i Joram bada tabi Raja David ka nganju ayŭh amai pimanang-i ngarah Hadadezer adi taŭn tian-ti ari biperang gŭh ngga ayŭh. Joram taban ka yŭn David pinganggen adi dog ndai so mas, pirak, ka timaga.

¹¹Raja David nitah sopŭrŭg-i yŭn dog pakai di tika simayang, samŭn pirak ngga mas adi-i tambit so bangsa bangsa adi-i ko ngarah -- Edom, Moab, Ammon, Philistia, ngga Amalek.

¹² Abishai, adi Zeruiah dŭn sindŭ-i, ngarah daya Edom di Rubān Garo ka siŭ 18,000 naan ngara.

¹³Ayŭh pijog bari bara tibaran soldadu di ndi tarun tana Edom, ka daya diginŭ nundok di Raja David. TUHAN bada David manang biperang di tadŭ tadŭ yŭn.

¹⁴David mritah di ndi tarun tana Israel ka natu sopŭrŭg rayat-i dog sita brinyam ka ngga batur.

¹⁵Joab, adi jurud Abishai, jadi pingibās bara soldadu; Jehoshaphat anak Ahilud jadi tukang jaga rekod;

¹⁶Zadok anak Ahitub ngga Ahimelech anak Abiathar jadi imam; Seraiah[47] jadi tukang pinuris;

¹⁷Benaiah anak Jehoiada jadi tukang nguasa bara pingibān David; ka bara anak dari David jadi pinurung adi siabo bās pangkat nyiraja di ribo David.