Read Biatah Bidayuh 1 KRONIKEL 19 Bible Online

1 KRONIKEL 19 - Biatah Bidayuh bible

1 KRONIKEL 19

¹Mua tian ripas anŭ Raja Nahash, pimritah daya Ammon kabŭs, ka anak-i Hanun gati ayŭh jadi raja.

²Raja David nang, “Aku dŭh siŭn dŭh bijerā ngga Hanun, nimun sama-i ko bijerā ngga aku dawŭ-i.” Jadi David pait kudu kudu naan pinyisung-i bada di kidaan adŭp-i masi dingah pinyikabŭs sama-i. Kan ngara mbŭh ndŭg Ammon ka bidapŭd ngga Raja Hanun,

³pinguru pinguru daya Ammon nang di raja, “Kaam pikir amai stabi-i di sama mu, David pait ngara anŭ bada kidaan di kuu atin masi-i di pinyikabŭs sama mu? Manŭn dŭh! Ayŭh pait ngara kamati bada nyibatŭh kupo ta, isa ayŭh tungang sirabut-i!”

⁴Hanun nakap pinyisung pinyisung David, gumbak ndi parad gagap ngara, kapŭg piraka ngara kŭd kupong, ka pibu ngara.

⁵Ngara mbŭh raru mangŭh re pari ka kupo adŭp ngara. Kan David dingah kayuh adi mbŭh jadi, ayŭh pait pinganang ka ngara bada rŭŭ di Jericho ka dŭhsah diŭ pari ndŭg ka gagap ngara mbŭh pari timbu.

⁶Raja Hanun ngga bara daya Ammon rada adŭp ngara mbŭh bada David jadi pinganyu, jadi ngara bayar 34,000 kilogram pirak ngga nyewa krita krita kuda ka bara soldadu adi pakai krita kuda so sijo Mesopotamia ka so Maacah ngga Zobah di rais Syria.

⁷32,000 krita kuda adi ngara nyewa ngga bara tibaran soldadu raja Maacah mandŭg ka bibari sindŭk Medeba. Daya Ammon gŭh ruah so sopŭrŭg kupo ngara ka sidia re biperang.

⁸Kan David dingah kayuh adi mbŭh jadi, ayŭh bada Joab matak ngga bara bara tibaran soldadu.

⁹Bara daya Ammon mandŭg ka kajŭn di tiban-bās kupo Rabbah, sindŭ kupo ngara, ka raja raja adi mandŭg an turung, kajŭn di sapa tarun tana rais.

¹⁰Joab kiris bara soldadu pinganyu re nyerang ayŭh so jawin ngga so punok, jadi ayŭh mien bara soldadu Israel adi siabo pandai birawan ka na ngara di tarun yŭn adi nura bara daya Syria.

¹¹Ayŭh na kada soldadu-i di ribo sude-i Abishai adi pingibās soldadu, adi na ngara di tarun yŭn adi nura bara daya Ammon.

¹²Joab nang di ayŭh, “Kambŭi kuu kiris daya Syria tatŭng bake dŭ so aku, mandŭg di turung aku, ka kambŭi daya Ammon tatŭng bake dŭ so kuu, aku mandŭg di turung kuu.

¹³Dŭhnyah taru! Ata biperang yŭn bara daya ta ka yŭn kupo kupo Tapa ta. Ka isa-i jadi nanyam pinyiraan TUHAN.”

¹⁴Joab ngga bara daya-i masang di nyerang, ka bara daya Syria babak bu.

¹⁵Kan bara daya Ammon kiris bara daya Syria babak bu, ngara bu so Abishai ka mŭrŭt kupo. Komŭnŭ Joab pari ka Jerusalem.

¹⁶Bara daya Syria kinyam adŭp ngara mbŭh dog ngarah daya Israel, ka ngara taban bara soldadu so rais Syria di parad tura ka timor Yang Euphrates ka na ngara di ribo kuasa Shobach, adi pingibās bara tibaran soldadu Raja Hadadezer, pimritah di Zobah.

¹⁷Kan David dingah, ayŭh nguruk bara soldadu Israel, mutas yang Jordan, ka na ngara di tarun yŭn nura bara daya Syria. Perang piguru,

¹⁸ka bara daya Israel bada bara tibaran soldadu Syria ngundur. David ngga bara daya-i siŭ 7,000 naan bara soldadu adi pakai krita kuda ka 40,000 naan soldadu adi panu kaja. Ngara gŭh siŭ Pingibās soldadu Syria, Shobach.

¹⁹Kan raja raja di ribo Hadadezer kinyam adŭp ngara mbŭh dog ngarah Israel, ngara bidamai ngga David ka trima ayŭh jadi raja ngara. So nganŭ bara daya Syria dŭh tia turung daya Ammon.