Read Biatah Bidayuh 1 KRONIKEL 22 Bible Online

1 KRONIKEL 22 - Biatah Bidayuh bible

1 KRONIKEL 22

¹Jadi David nang, “Digiti inŭh Ramin TUHAN Tapa re dog pijog. Digiti inŭh mija-sambah di yŭn daya Israel an jugan sadis badang.”

²Raja David nggen ukum bada sopŭrŭg daya tami adi rŭŭ di tarun tana Israel tikuruk, ka ayŭh bada ngara nyiraja. Kada so ngara mŭŭt batuh re pakai ngga pijog Ramin TUHAN.

³Ayŭh sidia raru bagŭ basi ngga ndai pasak samŭn apit yŭn tiban buwang, samŭn timaga adi raru bagŭ ndŭg ka mating daya tungang nimbang-i.

⁴Ayŭh ngatur bada daya Tyre ngga daya Sidon nggen di ayŭh dudu kayuh sedar.

⁵David bipikir, “Ramin TUHAN adi anak ku an pijog dŭh siŭn dŭh an adi grua ka adi timagah di ndi ong ong. Pak ayŭh gi-mara buang bayuh sukup pinyipuan di kayuh ati, jadi aku dŭh siŭn dŭh sidia.” Jadi David mbŭh nguruk raru bagŭ preka piramin sibayuh ayŭh kabŭs.

⁶Ayŭh bagan anak-i Solomon ka pesan ayŭh bada pijog Ramin TUHAN, adi Tapa Israel.

⁷ David nang di ayŭh, “Nak, aku raan pijog ndi ramin ngga stabi di TUHAN adi Tapa ku.

⁸Pak TUHAN kidaan di aku nang aku mbŭh siŭ raru bagŭ daya ka mbŭh raru siraru biperang. Ngapŭi meh Ayŭh dŭh nyibandar aku pijog ramin yŭn-I.

⁹Sawŭ, ayŭh mbŭh bijanji ngga aku. Ayŭh nang, ‘Kuu re biyŭn ndi anak dari adi re mritah darŭm damai, sabab Aku re bada ayŭh dŭh dog nyusah bara pinganyu-i. Dŭn-i inŭh re Solomon[49] sabab darŭm pinyipritah-i Aku re nggen di Israel damai ngga pinyipagŭng.

¹⁰Ayŭh re pijog ramin yŭn Ku. Ayŭh re jadi anak Ku, ka Aku re jadi Sama-i. Takta-i ngga barang turap sesang-i re mritah Israel ndŭg situi tui.’ ”

¹¹David pijuu nang, “Madin, nak, isa-i TUHAN adi Tapa mu agi ngga kuu, ka isa-i Ayŭh ingat janji-I an bada kuu mujur pijog ramin yŭn-I.

¹²Ka isa-i TUHAN adi Tapa mu nggen di kuu pinyipitar ngga pinyibijak isa kuu bisa mritah Israel nanyam ka Ukum adat-I.

¹³ Kambŭi kuu tunda sopŭrŭg ukum-adat adi TUHAN nggen di Moses yŭn Israel, kuu re mujur. Kuu dŭh siŭn dŭh birani ka dŭhnyah atin mu arot, ka dŭhnyah taru tadŭ tadŭ kayuh.

¹⁴Pasar Ramin TUHAN anŭ, aku mbŭh bandar bandar nguruk rabis so 3,400 tan mas ngga rabis so 34,000 tan pirak ngga pijog-i. Ngga nambah anŭ, agi timaga ngga basi adi mbŭh dŭh nyawa dog nimbang. Aku gŭh mbŭh sidia kayuh ka batuh, pak kuu dŭh siŭn dŭh jiroh tambah-i.

¹⁵Kuu biyŭn bagŭ daya adi bitukang. Agi adi nyiraja di kwari batuh, agi adi tukang batuh ngga tukang kayuh, ka bagŭ gŭh tukang adi bŭkŭn

¹⁶mun tukang mas, tukang pirak, tukang timaga, ka tukang basi. Piguru meh kraja anŭ madin, ka isa-i TUHAN agi ngga kuu.”

¹⁷David pesan sopŭrŭg pinguru Israel bada turung Solomon.

¹⁸Ayŭh nang, “TUHAN adi Tapa mu agi ngga kuu ka mbŭh nggen di kuu damai di ndi tarun tana rais mu. Ayŭh muko bada aku ngarah sopŭrŭg daya adi muko dawŭ-i rŭŭ di tarun tana ati, ka ngara madin mbŭh nundok di kuu ka di TUHAN.

¹⁹Madin bituan meh di TUHAN adi Tapa mu ngga siabo atin ka ngga siabo simangi mu. Piguru pijog Ramin TUHAN, isa kuu dapŭd na di darŭm-i Pati Simanya TUHAN samŭn sopŭrŭg kayuh kudus adi dog pakai ngga nyambah Ayŭh.”