Read Biatah Bidayuh 1 KRONIKEL 26 Bible Online

1 KRONIKEL 26 - Biatah Bidayuh bible

1 KRONIKEL 26

¹Ati inŭh utung utung kraja yŭn bara daya Levi adi jadi tukang jaga Ramin TUHAN. So manak Korah inŭh Meshelemiah anak Kore, so rawang Asaph.

²Ayŭh biyŭn ju madis anak dari, dog nyusud nanyam ka umbur: Zechariah, Jediael, Zebadiah, Jathniel,

³Elam, Jehohanan, ngga Eliehoenai.

⁴ Simŭnŭ gŭh Obed Edom, adi Tapa nyiberkat ngga mai madis anak dari, dog nyusud nanyam ka umbur: Shemaiah, Jehozabad, Joah, Sachar, Nethanel,

⁵Ammiel, Issachar, ngga Peullethai.

⁶Anak pinuai Obed Edom, Shemaiah, biyŭn nŭm madis anak dari: Othni, Rephael, Obed, Elzabad, Elihu, ngga Semachiah. Ngara inŭh daya adi bās darŭm manak ngara sabab pimandai ngara; rabis-i ngara adi sikasŭn duwŭh naan di susud anŭ.

⁸Rawang Obed Edom biyŭn 62 naan daya adi ruai pandai yŭn kraja anŭ.

⁹Rawang Meshelemiah biyŭn mai naan daya adi pandai.

¹⁰So manak Merari inŭh Hosah, adi biyŭn pat madis anak dari: Shimri (sama-i bada ayŭh jadi pinguru, sunggu ayŭh dŭh anak pinuai),

¹¹Hilkiah, Tebaliah, ngga Zechariah. Prungun-i inŭh simŭng taruh naan so rawang Hosah adi jadi tukang jaga Ramin TUHAN.

¹²Bara adi tukang jaga Ramin TUHAN dog kutung ngga tibaran, nanyam ka rawang, ka ngara dog nggen utung kraja di Ramin TUHAN, nimun daya Levi adi bŭkŭn.

¹³Barang rawang, dŭh kira baga sŭ, taran dadu ngga puan aki tiban re-i jaga.

¹⁴Shelemiah taran dadu ka dog tiban tura ka timor, ka anak-i Zechariah, daya adi ari pitayan ngga pinganang adi kana, taran dadu ka dog tiban tura ka utara.

¹⁵Obed Edom dog tiban tura ka siratan, ka anak anak-i birit birit pinyirikŭn.

¹⁶Shuppim ngga Hosah dog tiban tura ka barat ngga Tiban Shallecheth di aran maad ka sambu. Kraja jaga anŭ dog ngatur simuti:

¹⁷Di parad ka timor, nŭm naan tukang jaga barang andu, di parad ka utara, pat naan, ka di parad ka siratan, pat naan. Pat naan dog bada jaga birit birit pinyirikŭn barang andu, duwŭh naan di barang birit.

¹⁸Sindŭk pavilion tura ka barat agi pat naan tukang jaga di aran, ka duwŭh naan di pavilion anŭ.

¹⁹Anŭ inŭh utung kraja tukang jaga yŭn manak Korah ngga manak Merari.

²⁰Bara daya Levi adi bŭkŭn[51] dog nggen kraja tukang ngatur pinyirikŭn-rata Ramin TUHAN ngga birit birit pinyirikŭn pinganggen adi mbŭh dog nitah ka Tapa.

²¹Ladan, ndi naan so anak anak Gershon, inŭh babuk bagŭ tibaran rawang, samŭn rawang anak-i Jehiel.

²²Duwŭh madis anak Ladan adi bŭkŭn, Zetham ngga Joel, tukang ngatur pinyirikŭn-rata Ramin TUHAN samŭn birit birit pinyirikŭn.

²³Kraja dog kutung gŭh di dupan bara sesang Amram, Izhar, Hebron, ngga Uzziel.

²⁴Shebuel, so manak Gershom adi anak Moses, inŭh pingubak tukang ngatur pinyirikŭn-rata Ramin TUHAN.

²⁵So Eliezer adi jurud Gershom ayŭh bikada ngga Shelomith. Eliezer inŭh sama Rehabiah, adi sama Jeshiah, sama Joram, sama Zichri, sama Shelomith.

²⁶Shelomith ngga bara adi so rawang-i dog bada tukang ngatur sopŭrŭg pinganggen adi dog nitah Raja David ngga bara pingubak rawang, pinguru tibaran manak, ka pingubak tibaran bara soldadu.

²⁷Ngara taban kada kayuh sirapas adi ngara dapŭd di tika biperang ka nitah-i yŭn pakai di Ramin TUHAN.

²⁸Shelomith ngga rawang-i tukang ngatur sopŭrŭg kayuh adi mbŭh dog nitah yŭn pakai di Ramin TUHAN, samŭn dudu pinganggen adi dog taban nabi Samuel, Raja Saul, Abner anak Ner, ka Joab anak Zeruiah.

²⁹Sesang Izhar, anŭ inŭh Chenaniah ngga bara anak dari-i, dog nggen kraja pritah: tukang ngatur ka nyikŭn rekod ka tukang nggen bisara yŭn daya Israel.

³⁰Sesang Hebron, anŭ inŭh Hashabiah ngga 1,700 naan madis-i, sopŭrŭg adi traŭn, dog nggen kraja tukang ngatur sopŭrŭg kayuh adat ngga kayuh pritah parad barat Yang Jordan.

³¹Jeriah inŭh pinguru bara sesang Hebron. Di sawa adi 40 darŭm pinyipritah David, susud taris rawang sesang Hebron dog nyasat, ka soldadu soldadu adi traŭn so rawang anŭ agi dog dapŭd rŭŭ di Jazer di tarun tana Gilead.

³²Raja David mien 2,700 naan pingubak rawang adi traŭn so dupan bara madis Jeriah ka bada ngara tukang ngatur sopŭrŭg adat ngga kayuh pritah di Israel parad timor Yang Jordan -- tarun tana Reuben, Gad, ngga Manasseh Timor.