Read Biatah Bidayuh 1 KRONIKEL 28 Bible Online

1 KRONIKEL 28 - Biatah Bidayuh bible

1 KRONIKEL 28

¹Raja David pesan sopŭrŭg pingibās Israel bada mandŭg tikuruk di Jerusalem. Jadi sopŭrŭg pingubak tibaran-asar, pingubak adi ndai kraja pritah, pinguru pinguru manak, bara adi ngatur buat-rata ngga dāng kudip adi dog dapu raja ngga bara anak dari-i -- sawŭ sopŭrŭg pinurung istana, pingibās soldadu, ngga daya bās -- tikuruk di Jerusalem.

² David mijog nura ngara ka minyu: “Dingah pinganang ku, bara dingan ku. Aku raan pijog ndi ramin adi tatap yŭn Pati Simanya, adi bangan kaja TUHAN adi Tapa ta. Aku mbŭh sidia bagŭ kayuh ngga pijog ndi ramin yŭn nyambah Ayŭh,

³pak Ayŭh dŭh nyibandar aku pijog-i, sabab aku ati soldadu ka mbŭh siŭ bagŭ daya.

⁴TUHAN, adi Tapa Israel, mien aku ngga bara sesang ku bada mritah Israel ndŭg situi tui. Ayŭh mien tibaran-asar Judah bada piruah pinguru, ka so Judah Ayŭh mien rawang sama ku. So rawang anŭ nanyam ka pinyiraan adŭp-I Ayŭh mien aku ka bada aku jadi raja yŭn sopŭrŭg Israel.

⁵Ayŭh nggen di aku bagŭ anak dari, ka so dupan ngara Ayŭh mbŭh mien Solomon bada mritah Israel, adi pritah TUHAN.

⁶“TUHAN nang di aku, ‘Anak mu Solomon inŭh adi re pijog ramin yŭn Ku. Aku mbŭh mien ayŭh jadi anak ku, ka Aku re jadi sama-i.

⁷Aku re bada pritah-i tan adu adu kambŭi ayŭh adu adu nakit tunda sopŭrŭg ukum ukum-adat ngga pesan Ku nimun adi mbŭh.’

⁸“Jadi madin, bara dingan ku, di sirung jawin Tapa ta ka di sirung jawin bara daya Israel ati adi daya TUHAN, aku mite ngga siabo asŭng ku angān nakit nakit tunda sopŭrŭg kayuh adi TUHAN adi Tapa ta mbŭh pesan di ata, isa angān dapŭd adu adu dapu tana adi kana ati ka isa angān dapŭd nggen-i di turap turap adi re ndŭg situi tui.”

⁹Ka di Solomon ayŭh nang, “Nak, aku mite ngga siabo asŭng ku kuu ngaku Tapa adi Tapa sama mu ka bituan di Ayŭh ngga atin tagap ka ngga siabo pikir-kira mu. Ayŭh puan sopŭrŭg pikir-kira ngga pinyiraan ta. Kambŭi kuu jiroh Ayŭh, kuu re dapŭd Ayŭh; pak kambŭi kuu nyipunok Ayŭh, Ayŭh re tangan kuu ndŭg situi tui.

¹⁰Kuu dŭh siŭn dŭh ingat Ayŭh mbŭh mien kuu bada pijog ramin kudus-I. Pijog-i, ngga siabo atin mu.”

¹¹David nggen di Solomon suto munki Ramin TUHAN an dog pijog, munki birit birit pinyirikŭn ngga sopŭrŭg birit adi bŭkŭn an dog ndai, samŭn Yŭn adi Siabo Kudus, di yŭn dosa dog apun.

¹²Ayŭh nggen gŭh di ayŭh suto, nanyam pikir kira-i, munki badag-i ka munki birit birit adi maning badag anŭ an dog ndai, samŭn birit birit pinyirikŭn yŭn pingakas ngga pinganggen adi dog nitah ka TUHAN.

¹³David nggen gŭh suto munki ngatur bara imam ngga bara daya Levi yŭn kraja adi ngara ndai, yŭn kraja darŭm Ramin TUHAN, ka kraja adi kingat sita sopŭrŭg pingakas simayang.

¹⁴Ayŭh ngajar kiang-ki pirak ngga mas an dog pakai ngga ndai pingakas anŭ,

¹⁵ngga ndai prita ngga rika prita,

¹⁶ngga ndai mija pirak, ka ngga ndai barang mija mas di yŭn baru ruti adi dog jugan ka Tapa dog na.

¹⁷Ayŭh ngajar gŭh kiang-ki tigŭrŭ mas an dog pakai ngga ndai sirapang, makuk, ka tipayan, ka kiang-ki pirak ngga mas ngga ndai pinggen,

¹⁸ka kiang-ki tigŭrŭ mas ngga ndai mija-sambah di yŭn kimanyan dog badang ka ngga ndai krita yŭn cherubim cherubim adi tiburai urad-i nyayung Pati Simanya.

¹⁹Raja David nang, “Sopŭrŭg anŭ agi di suto adi dog nuris nanyam ka ajar adi adŭp TUHAN mbŭh nggen di aku yŭn tunda.”

²⁰Raja David nang di anak-i Solomon, “Kuu dŭh siŭn bada atin mu arot pak birani. Piguru kraja anŭ ka dŭhnyah bada ani ani matŭn kuu. TUHAN Tapa, adi aku nyambah, re agi ngga kuu. Ayŭh dŭh re tagan kuu, pak re rŭŭ ngga kuu ndŭg ka kuu mbŭh ngamas kraja adi ngga pijadi ramin-I.

²¹Bara imam ngga bara daya Levi mbŭh dog nggen kraja adi re ngara ndai darŭm Ramin TUHAN. Bara tukang adi pandai di barang masam kraja mbŭh graŭh an turung kuu, ka sopŭrŭg daya ngga pinguru pinguru ngara mbŭh sidia an tunda pinganang mu.”