Read Biatah Bidayuh 1 KRONIKEL 29 Bible Online

1 KRONIKEL 29 - Biatah Bidayuh bible

1 KRONIKEL 29

¹ Raja David kidaan di bara daya bagŭ anŭ: “Anak ku Solomon inŭh adi Tapa mbŭh mien, pak ayŭh gibabŭ mara buang kurang pinyipuan. Kraja adi re dog ndai inŭh kraja bās, amai-i dŭh istana yŭn manusia pak ramin yŭn TUHAN Tapa.

²Aku mbŭh ngga situngang tungang ku sidia bagŭ preka piramin yŭn ramin anŭ -- mas, pirak, timaga, basi, betang betang kayuh, batuh adi brega, batuh ngga ndai mosek, ka bagŭ batuh mabel.

³Ngga nambah anŭ, aku mbŭh nggen pirak ngga mas so buat-rata adŭp ku sabab pinyirindu ku di ramin Tapa.

⁴Aku mbŭh nggen rabis so siratus tan mas adi siabo ramus ka simŭnŭ gŭh duwŭh ratus pat puru tan tigŭrŭ pirak ngga ngabuh sindung sindung Ramin TUHAN

⁵ka yŭn kayuh kayuh adi bara tukang adi pandai re ndai. Ka asi meh dinge adi raan nggen pinganggen ka TUHAN?”

⁶Komŭnŭ bara pingubak manak, pingubak tibaran-asar, bara pingibās bara tibaran soldadu, ka bara pingubak adi ngatur buat-rata raja kidaan adŭp ngara raan nggen

⁷kayuh kayuh ati yŭn kraja pijog Ramin TUHAN: rabis 170 tan mas, rabis 340 tan pirak, sindŭk 620 tana timaga, ka rabis 3,400 tan basi.

⁸Ngara adi biyŭn batuh brega nggen-i di Jehiel bada pibŭrŭt-i di pinyirikŭn-rata Ramin TUHAN. Jehiel manak Gershon inŭh daya Levi.

⁹Bara daya mbŭh nggen ka TUHAN ngga siabo asŭng ngara, ka ngara mbŭh sanang asŭng amai raru bagŭ mbŭh dog nggen. Raja David gŭh mbŭh raru sanang asŭng-i.

¹⁰Diginŭ di sirung jawin daya bagŭ Raja David muji TUHAN. Ayŭh nang, “TUHAN Tapa Jacob adi babuk ami, isa-i Kaam dog muji ndŭg situi tui!

¹¹ Kaam inŭh bās ka bikuasa, bibragah, sangŭn, ka adi siabo bigatung. Sopŭrŭg kayuh di shorga ngga di ong inŭh jamai, ka Kaam inŭh raja, pimritah sopŭrŭg kayuh.

¹²Sopŭrŭg pinyikaya mandŭg so Kaam; Kaam mritah sopŭrŭg kayuh ngga pinyibake ka kuasa Mai; ka Kaam inŭh adi tungang bada tadŭ daya bās ka bake.

¹³Madin, Tapa ami, kieh nggen di Kaam trima kaseh, ka kieh muji adŭn Mai adi bibragah.

¹⁴“Aku ngga daya ku sawŭ dŭh tungang nggen di Kaam sopŭrŭg kayuh, sabab sopŭrŭg kayuh inŭh pinganggen so Kaam. Ka kieh mbŭh nggen pari ka Kaam kayuh adi taŭn mbŭh tung adŭp Mai.

¹⁵Kaam puan, O TUHAN, nimun tayung-babuk ami, kieh udip mbŭh keya ka daya tami ka daya saruh. Pimudip ami keya ka singangi, ka kieh dŭh tungang pirupas adŭp ami so pinyikabŭs.

¹⁶O TUHAN, Tapa ami, kieh mbŭh nguruk sopŭrŭg kayuh ati ngga pijog ramin yŭn Mai isa kieh dapŭd kibās adŭn kudus Mai. Sopŭrŭg-i mandŭg so Kaam ka sopŭrŭg-i mbŭh tung adŭp Mai.

¹⁷Aku puan nang Kaam suba atin barang naan daya, ka taŭn munos asŭng di daya adi jujur. Ngga atin jujur ka tŭnggŭn aku mbŭh ngga siabo asŭng nggen sopŭrŭg ati ka Kaam, ka aku mbŭh kiris munki masam daya Mai adi agi tikuruk digiti ngga sanang asŭng taban sadis ka Kaam.

¹⁸TUHAN Tapa bara babuk ami Abraham, Isaac, ngga Jacob, nagap daya Mai bada adu adu mun ati ka bada ngara adu adu tŭtŭd di Kaam.

¹⁹Nggen di anak ku Solomon atin adi sukup raan tunda pinganang Mai ka pijog ramin simayang ati pakai sopŭrŭg kayuh adi mbŭh aku sidia ati.”

²⁰Komŭnŭ David mritah bara daya, “Muji TUHAN adi Tapa ngan!” Ka sopŭrŭg daya muji TUHAN, adi Tapa tayung-babuk ngara, ka ngara mutu rapat ubak ngara nggen stabi di TUHAN ka simŭnŭ gŭh di raja.

²¹Andu anŭ ndi ngara siŭ dāng ndu sadis, nitah-i ka TUHAN, ka komŭnŭ nggen-i di bara daya da man. Ngga nambah anŭ, ngara nyadis siribu dari sapi, siribu dari biri, ka siribu anak biri, adi ngara mŭrŭng badang di mija-sambah. Ngara taban gŭh sadis wain.

²²Di andu anŭ ngara man nok ngga gaŭn di sirung jawin TUHAN. Ngara kadŭn dinge di sirung jawin daya bagŭ nang Solomon inŭh raja. Ngga adŭn TUHAN, ngara nginyo ayŭh jadi pimritah ka Zadok jadi imam.

²³ Ngga gati Raja David adi sama-i, Solomon maad takta adi dog pijog TUHAN. Ayŭh raja adi mujur, ka sopŭrŭg daya di Israel nundok di ayŭh.

²⁴Sopŭrŭg pingubak adi ndai kraja pritah ngga bara soldadu, ndŭg ka sopŭrŭg anak dari David adi bŭkŭn bijanji adŭp ngara nundok di Solomon adi jadi raja.

²⁵TUHAN bada Solomon bās di batŭh sopŭrŭg Israel, ka bada ayŭh bibragah dŭ so raja raja adi bŭkŭn adi mbŭh mritah Israel.

²⁶David anak Jesse mritah sopŭrŭg Israel

²⁷ 40 sawa. Ayŭh mritah di Hebron ju sawa ka di Jerusalem 33 sawa.

²⁸Ayŭh kabŭs minyamba, kaya buang dog stabi, ka anak-i Solomon gati ayŭh jadi raja.

²⁹Dundan Raja David so sibungas ndŭg pinŭbŭn-i agi dog nuris darŭm rekod ngara adi taruh naan nabi, Samuel, Nathan, ngga Gad.

³⁰Rekod anŭ kidaan munki ayŭh mritah, munki bikuasa ayŭh, samŭn sopŭrŭg kayuh adi jadi di ayŭh, di Israel, di pritah pritah adi maning Israel.