Read Biatah Bidayuh 1 KRONIKEL 5 Bible Online

1 KRONIKEL 5 - Biatah Bidayuh bible

1 KRONIKEL 5

¹ Ati inŭh bara sesang Reuben, adi pinuai ngara adi bara anak dari Jacob. (Sabab ayŭh agi raban ngga ndi naan dayung nyikŭn sama-i, hak yŭn anak pinuai mbŭh dog kadi so ayŭh ka dog nggen di Joseph.

² Tibaran-asar Judah, inŭh adi jadi siabo bake ka adi piruah pimritah yŭn sopŭrŭg tibaran-asar.)

³Reuben, adi anak pinuai Jacob, biyŭn pat madis anak dari: Hanoch, Pallu, Hezron ngga Carmi.

⁴ Ati inŭh bara sesang Joel so turap ndi ndŭg turap andi: Shemaiah, Gog, Shimei, Micah, Reaiah, Baal, ka Beerah adi pinguru tibaran-asar, adi Tiglath Pileser adi raja-empaya Assyria mbŭh nakap ka taban ngga bu jadi daya-takap.

⁷Di rekod rawang agi simuti susud bara pinguru manak tibaran-asar Reuben: Jeiel, Zechariah,

⁸ngga Bela, adi anak Azaz ka sukuh Shema, so manak Joel. Manak ati rŭŭ di tarun tana maning Aroer, ndŭg Nebo ngga Baal Meon di utara.

⁹Ngara biyŭn raru bagŭ biri ngga sapi sapi di tarun tana Gilead; sabab anŭ meh ngara ngisi tarun tana anŭ ka mirarat jeh ka timor ndŭg tarun tana pajam adi bayah-i ndŭg Yang Euphrates.

¹⁰Di jaman Raja Saul tibaran-asar Reuben nyerang daya Hagri, siŭ ngara darŭm biperang, ka ngisi tarun tarun tana ngara di parad tura ka timor Gilead.

¹¹Tibaran-asar Gad rŭŭ di parad tura ka utara Reuben di tarun tana Bashan jeh ndŭg Salecah di parad timor.

¹²Joel inŭh babuk sibungas manak, ka Shaphan inŭh babuk manak adi numbor duwŭh. Janai ngga Shaphat inŭh babuk manak manak adi bŭkŭn di Bashan.

¹³Bara adi bŭkŭn darŭm tibaran-asar anŭ mandŭg so ju manak ati: Michael, Meshullam, Sheba, Jorai, Jacan, Zia, ka Eber.

¹⁴Ngara inŭh sesang Abihail anak Huri; tayung-babuk ngara inŭh: Abihail, Huri, Jaroah, Gilead, Michael, Jeshishai, Jahdo, Buz.

¹⁵Ahi, anak Abdiel ka sukuh Guni, inŭh pingubak manak manak anŭ.

¹⁶Ngara rŭŭ di tarun tana Bashan ngga Gilead, di kupo kupo diginŭ ka di ndi tarun tarun tana kupai Sharon.

¹⁷(Dudu rekod ati dog nguruk di jaman Jotham adi raja Judah, ngga Jeroboam II adi raja Israel.)

¹⁸Darŭm tibaran-asar Reuben, Gad ngga Manasseh Timor agi 44,760 naan soldadu, adi mbŭh sukup pandai pakai pinangin, pedang ngga bawŭh panah.

¹⁹Ngara matak di biperang rawan tibaran-asar Hagri, samŭn tibaran-asar Jetur, Naphish, ngga Nodab.

²⁰Ngara na pinyabah ngara di Tapa ka bidua mite turung so Ayŭh, ka Tapa nam dua ngara ka bada ngara manang rawan daya Hagri samŭn pambit ngara.

²¹Ngara sirapas so pinganyu 50,000 onta, 250,000 biri, 2,000 kaldi, ka nakap 100,000 naan pinganyu.

²²Ngara siŭ bagŭ pinganyu, sabab perang anŭ mbŭh so ka pinyiraan Tapa. Ka ngara babŭ rŭŭ di tarun tana anŭ ndŭg ka andu adi ngga ngara dog taran so rais.[15]

²³Daya Manasseh Timor rŭŭ di tarun tana Bashan ndŭg Baal Hermon, Senir, ngga Darŭd Hermon, jeh di utara, buang bara daya ngara daras papah.

²⁴Ngara ati inŭh bara pingubak manak manak ngara: Epher, Ishi, Eliel, Azriel, Jeremiah, Hodaviah, ka Jahdiel. Ngara inŭh soldadu pimagan, ka bara pinguru adi timagah darŭm manak manak ngara.

²⁵Pak ngara dŭh tŭtŭd di TUHAN adi Tapa tayung-babuk ngara. Ngara tagan Ayŭh ka nyambah tapa tapa bangsa adi Ayŭh mbŭh pibu so tarun tana anŭ.

²⁶ Sabab anŭ meh Tapa bada Pul adi Raja-empaya Assyria (adi dog kadŭn gŭh Tiglath Pileser) nyerang rais ngara. Ayŭh taban bu tibaran-asar Reuben, Gad, ngga Manasseh Timor ka bada ngara rŭŭ di Halah, Habor, ka Hara, ka arong bŭngŭn Yang Gozan.