Read Biatah Bidayuh 2 KRONIKEL 1 Bible Online

2 KRONIKEL 1 - Biatah Bidayuh bible

2 KRONIKEL 1

¹Solomon, anak Raja David, nagap adŭp-i mritah Israel, ka TUHAN adi Tapa-i nyiberkat ayŭh ka bada ayŭh raru bikuasa.

²Raja Solomon nggen ukum bada sopŭrŭg pingubak adi nguasa bara tibaran soldadu adi siribu naan ngga bara tibaran adi siratus naan, sopŭrŭg pingubak adi ndai kraja pritah, sopŭrŭg pingubak rawang, ka barang naan rayat,

³bada di ayō adŭp-i ka tarun yŭn bisambah di Gibeon. Ngara di kamanŭ sabab anŭ inŭh tarun yŭn Bari TUHAN, adi Moses, urun TUHAN, muko pijog di tarun tana-pajam.

⁴ (Pati Simanya, nganŭ, mbŭh di Jerusalem, dog nyikŭn darŭm bari adi Raja David mbŭh pijog di andu ayŭh mindah Pati anŭ so Kiriath Jearim.)

⁵ Mija-sambah timaga adi dog ndai Bezalel anak Uri ka sukuh Hur, agi gŭh di Gibeon di jawin Bari TUHAN. Raja Solomon ngga sopŭrŭg daya nyambah TUHAN diginŭ.

⁶Di jawin Bari anŭ raja nyambah TUHAN buang jugan sadis di tunduh mija-sambah timaga; ayŭh siŭ siribu dāng ka mŭrŭng badang-i di tunduh mija-sambah anŭ.

⁷Ngarŭm anŭ Tapa nandŭng di Solomon ka siken, “Ani raan mu Aku nggen di kuu?”

⁸Solomon nam, “Kaam ari kiren pinyirindu bās di sama ku David, ka madin Kaam mbŭh bada aku gati ayŭh jadi raja.

⁹ O TUHAN Tapa, pijadi janji adi Kaam mbŭh ndai ngga sama ku. Kaam mbŭh bada aku jadi raja bara daya adi raru bagŭ ka adi dŭh tungang dog mirang,

¹⁰nggen di aku pinyibijak ngga pinyipuan adi aku biguna ngga mritah ngara. Kambŭi dŭh simuki aku re tungang mritah bara daya Mai ati adi raru bagŭ?”

¹¹Tapa nam Solomon, “Kuu mbŭh mien kayuh adi batur. Kuu dŭh mite pinyikaya, puan kah rata, puan kah mite adŭp mu timagah, puan kah mite pinyikabŭs bara pinganyu mu, puan kah udip tui. Kuu mite pinyibijak ngga pinyipuan isa kuu dapŭd mritah daya Ku, ka kuu gŭh mbŭh Aku bada jadi raja.

¹²Aku re nggen di kuu pinyibijak ngga pinyipuan. Ka ngga nambah anŭ, Aku re nggen di kuu rabis bagŭ pinyikaya, rata, ka re bada kuu timagah dŭ so tadŭ tadŭ raja adi mbŭh ngga adi re.”

¹³Jadi Solomon bu[1] so tarun yŭn bisambah di Gibeon, di yŭn Bari TUHAN, ka pari ka Jerusalem. Diginŭ ayŭh mritah Israel.

¹⁴ Ayŭh ndai 1,400 krita kuda ngga 12,000 kuda yŭn soldadu pinunggang kuda. Kada so anŭ ayŭh nyikŭn di Jerusalem, ka adi bŭkŭn ayŭh nyikŭn di kupo kupo bŭkŭn.

¹⁵Di jaman pinyipritah-i pirak ngga mas mbŭh jadi kayuh braŭn di Jerusalem, keya ka batuh; ka kayuh sedar mbŭh raru bagŭ mun kayuh sycomore saja.

¹⁶ Bara pinurung raja yŭn dagang, ngatur kuda kuda adi dog jua so Musri[2] ngga Cilicia,[3]

¹⁷ngga krita krita kuda adi dog jua so Egypt. Ka komŭnŭ ngara jua kuda kuda ngga krita krita kuda anŭ ka raja Hitti ngga raja Syria, ngga rega 150 kiping pirak yŭn barang pŭrŭng kuda,[4] ka 600 kiping pirak yŭn barang krita kuda.