Read Biatah Bidayuh 2 KRONIKEL 10 Bible Online

2 KRONIKEL 10 - Biatah Bidayuh bible

2 KRONIKEL 10

¹Rehoboam di ka Shechem, di yŭn sopŭrŭg daya di Israel utara mbŭh tikuruk an bada ayŭh jadi raja.

²Kan Jeroboam anak Nebat, adi mbŭh bu ka Egypt mangān Raja Solomon, dingah agah anŭ, ayŭh pari ka ramin adŭp-i.

³Daya so tibaran-asar adi tura ka utara bagan ayŭh, ka sopŭrŭg ngara samah matak ka yŭn Rehoboam ka nang di ayŭh,

⁴“Sama mu pijera kieh ngga kraja bat. Kambŭi kuu pijangan kraja ami anŭ ka bada pimudip ami sanang, kieh re jadi rayat adi tŭtŭd yŭn mu.”

⁵Rehoboam nam, “Nggen di aku taruh andu yŭn bipikir di kayuh anŭ. Ripas anŭ, angān bisa pari kamati.” Ka ngara bu.

⁶Raja Rehoboam bisiken ngga bara nyamba adi muko jadi tukang pitayan yŭn sama-i Solomon. “Ani pinyinam sŭn angān nang aku patut nggen di ngara anŭ?” ayŭh siken.

⁷Ngara nam, “Kambŭi kuu mandis ngga bara daya anŭ ka suba pimunos asŭng ngara ngga pinyinam adi kana, ngara re ari tŭtŭd bituan di kuu.”

⁸Pak ayŭh nyibireu pinyitayan bara nyamba anŭ ka di ka yŭn ngara adi tuba takar adŭp-i adi madin mbŭh jadi tukang pitayan yŭn adŭp-i.

⁹“Ani pinyitayan ngan yŭn ku?” ayŭh siken. “Ani sŭn angān nang aku patut nang di ngara anŭ adi bada aku pijangan kraja ngara?”

¹⁰Ngara nam, “Ati inŭh kayuh adi kuu patut kidaan di ngara: ‘Anak trinju ku tabar dŭ so kupong sama ku!’

¹¹Kidaan di ngara, ‘Sama ku bada angān bandar nyiraja, pak aku re bada kraja ngan rabis bat. Ayŭh madŭs angān ngga pasut; aku re madŭs angān ngga pasut pireja basi!’ ”

¹²Taruh andu ripas anŭ Jeroboam ngga sopŭrŭg daya pari ka yŭn Raja Rehoboam, nimun adi muko-i kidaan di ngara.

¹³Raja nyibireu pinyitayan bara nyamba ka minyu kasar ngga ngara,

¹⁴nimun adi bara adi mara anŭ muko pitayan di ayŭh. Ayŭh nang, “Sama ku bada angān bandar nyiraja; Aku re bada kraja ngan rabis bat. Ayŭh madŭs angān ngga pasut; aku re madŭs angān ngga pasut pireja basi!”

¹⁵Anŭ mbŭh pinyiraan TUHAN Tapa an bada bitŭtŭk kayuh adi-I nang di Jeroboam anak Nebat so baba nabi Ahijah so Shiloh. Anŭ inŭh sabab raja dŭh mbit piduri di pimite bara daya.

¹⁶ Kan bara daya kiris raja dŭh piduri kayuh adi ngara nang, ngara nyirais, “Re ata ngga mani David ngga rawang-i! Ani mbŭh ngara ndai yŭn ta? Bara daya Israel, ja ata maad! Tandah Rehoboam sadi jaga adŭp-i!” Jadi daya Israel rawan pritah,

¹⁷tingge Rehoboam jadi raja yŭn daya adi rŭŭ di utung tarun tana Judah adŭ.

¹⁸Komŭnŭ Raja Rehoboam pait Adoniram, adi tukang ngatur kraja takan, bada di ka bara daya Israel, pak ngara manjan ayŭh ngga batuh ndŭg kabŭs. Sabab anŭ, Rehoboam rikas tambit krita kuda-i ka bu di ka Jerusalem.

¹⁹So nganŭ daya Israel di tura ka utara pritah israel rawan taris asar pinyipritah David.