Read Biatah Bidayuh 2 KRONIKEL 11 Bible Online

2 KRONIKEL 11 - Biatah Bidayuh bible

2 KRONIKEL 11

¹Kan Raja Rehoboam mbŭh ndŭg Jerusalem, ayŭh bagan bada tikuruk 180,000 naan bara soldadu adi siabo pandai birawan so tibaran-asar Benjamin ngga Judah. Ayŭh raan matak biperang ka pari tambit kuasa-i adi mritah tibaran-asar Israel adi di tura ka utara.

²Pak TUHAN kidaan di nabi Shemaiah

³bada nggen pinganang ati ka Raja Rehoboam ngga di sopŭrŭg daya so tibaran-asar Judah ngga Benjamin:

⁴“Dŭhnyah nyerang bara dingan ngan adi samah daya Israel. Pari maad ka ramin adŭp ngan. Kayuh adi mbŭh jadi inŭh so ka pinyiraan Ku.” Ngara dingah pinganang TUHAN ka dŭh di matak rawan Jeroboam.

⁵Rehoboam babŭ di Jerusalem ka mbŭh pijog sindung kuta yŭn kupo Judah ngga Benjamin:

⁶Bethlehem, Etam, Tekoa,

⁷Bethzur, Soco, Adullam,

⁸Gath, Mareshah, Ziph,

⁹Adoraim, Lachish, Azekah,

¹⁰Zorah, Aijalon, ngga Hebron.

¹¹Ayŭh bada sopŭrŭg-i dog nyindung ngga sindung kuta ka tijuan ndi pingubak di barang kupo, ka di barang kupo anŭ ayŭh sidia pinguman, inyo kanā, ka wain,

¹²samŭn dudu pinangin ngga jarok. Simŭnŭ inŭh ayŭh bada Judah ngga Benjamin di ribo kuasa-i.

¹³So sopŭrŭg tarun tana Israel bara imam ngga bara daya Levi di ka siratan, ka Judah.

¹⁴Bara daya Levi tagan tarun tana kupai ngga tana ngara adi bŭkŭn, ka bipindah ka Judah ngga Jerusalem, sabab Jeroboam adi raja Israel ngga ngara adi gati ayŭh dŭh nyibandar ngara jadi imam TUHAN.

¹⁵ Jeroboam tijuan imam imam adŭp-i bada nyiraja di tarun yŭn bisambah adat karŭm ka nyambah umot ka tibudo adi-i ndai tunda gayŭn anak dari sapi.

¹⁶So sopŭrŭg tibaran-asar Israel daya adi sawŭ raan nyambah TUHAN, adi Tapa Israel, tunda bara daya Levi ka Jerusalem, siŭn ngara dapŭd jugan sadis ka TUHAN, adi Tapa tayung-babuk ngara.

¹⁷Anŭ nyibake pritah Judah, ka sitian taruh sawa ngara batu pritah Rehoboam anak Solomon ka udip mun di jaman ngara udip di ribo kuasa Raja David ngga Raja Solomon.

¹⁸Rehoboam sawŭn Mahalath, sama-i Jerimoth anak David, ka sindŭ-i Abihail anak Eliab ka sukuh Jesse.

¹⁹Ngara biyŭn taruh madis anak dari, Jeush, Shemariah, ka Zaham.

²⁰Ripas anŭ ayŭh sawŭn Maacah anak dayung Absalom, ka ngara biyŭn pat madis anak dari: Abijah, Attai, Ziza, ka Shelomith.

²¹Prungun-i, Rehoboam biyŭn simŭng mai sawŭn ka 60 dayung nyikŭn, ka biyŭn 28 madis anak dari ka 60 madis anak dayung. So sopŭrŭg sawŭn-i adi bŭkŭn ayŭh rindu dŭ Maacah,

²²ka ayŭh siŭt dŭ anak dari-i Abijah so sopŭrŭg anak-i adi bŭkŭn, mien ayŭh jadi sianŭ adi re gati adŭp-i jadi raja.

²³Ngga bijak-i Rehoboam kutung kraja di dupan bara anak-i, piguru ngara di ndi tarun tana Judah ngga Benjamin darŭm kupo kupo adi bikuta. Ayŭh ngga dŭh sibut nggen bagŭ pinguman di ngara ka jiroh bagŭ sawŭn yŭn ngara.