Read Biatah Bidayuh 2 KRONIKEL 12 Bible Online

2 KRONIKEL 12 - Biatah Bidayuh bible

2 KRONIKEL 12

¹Kan pritah Rehoboam mbŭh tagap mijog ka adŭp-i mbŭh bitambah bikuasa, ayŭh ngga sopŭrŭg daya Israel nyipunok Ukum-adat TUHAN.

²Di sawa adi rimŭh darŭm pinyipritah Rehoboam, ngara dog ukum TUHAN. Shishak adi raja Egypt nyerang Jerusalem

³ayō bara tibaran soldadu-i adi 1,200 naan adi pakai krita kuda, 60,000 naan adi pinunggang kuda, ka ngga sopŭrŭg soldadu adi dŭh tungang dog mirang, samŭn adi so Libya, Sukki, ngga Ethiopia.

⁴Ayŭh sirabut kupo kupo Judah adi bikuta ka masang jeh ka Jerusalem.

⁵Shemaiah adi nabi di ka yŭn Raja Rehoboam ka bara pinguru Judah adi mbŭh tikuruk di Jerusalem bu mangān Shishak. Ayŭh nang di ngara, “Ati inŭh pinganang TUHAN di angān: ‘Angān mbŭh tagan Aku, jadi madin Aku mbŭh tagan angān ka darŭm tangan Shishak.’ ”

⁶Raja ngga bara pinguru ngaku adŭp-i mbŭh bidosa, ka ngara nang, “Kayuh adi Tapa ndai inŭh batur.”

⁷Kan TUHAN dingah pinganang ngara, Ayŭh minyu dinge di Shemaiah nang, “Sabab ngara ngaku dosa-i, Aku dŭh re pirabur ngara. Pak kan Shishak nyerang, Aku re tandah ngara nyiramat adŭp-i, ka Jerusalem dŭh re asur,

⁸pak sunggu mŭnŭ Shishak re nyerang ngara, ka ngara re puan ani anŭ bituan di Aku ka ani anŭ bituan di pritah ong.”

⁹ Raja Shishak mandŭg ka Jerusalem ka tambit rata so Ramin TUHAN samŭn anŭ adi darŭm istana. Ayŭh tambit sopŭrŭg kayuh, samŭn dudu pinangin mas anŭ adi Raja Solomon ndai.

¹⁰Ngga gati anŭ, Rehoboam ndai pinangin timaga ka nyerah-i ka darŭm tangan ngara adi tukang jaga tiban istana.

¹¹Tiap kari raja di ka Ramin TUHAN, bara adi tukang jaga taban pinangin pinangin anŭ, ka ko anŭ pari-i ka birit daya di tukang jaga.

¹²Sabab ayŭh nundok di TUHAN, baji TUHAN dŭh bana nyatŭk ayŭh, ka kayuh mbŭh pari kana yŭn Judah.

¹³Rehoboam mritah di Jerusalem ka kuasa raja-i mbŭh bitambah. Ayŭh mbŭh 41 sawa umbur-i kan ayŭh jadi raja, ka ayŭh mritah sitian simŭng ju sawa di Jerusalem, kupo adi TUHAN mbŭh mien so ndi tarun tana Israel ndu tarun yŭn-I dog nyambah. Sindŭ Rehoboam inŭh Naamah, so tarun tana Ammon.

¹⁴Raja Rehoboam ndai kayuh adi arap, sabab ayŭh dŭh an jiroh pinyiraan TUHAN.

¹⁵Pingandai Rehoboam so sibungas ndŭg sikasŭn-i ka pasar rawang-i agi dog dapŭd darŭm Surat Dundan Nabi Shemaiah ka darŭm Surat Dundan Nabi Iddo. Rehoboam ngga Jeroboam taŭn ari biperang ngga dingan-i.

¹⁶Rehoboam kabŭs ka dog kubur di kubur raja di Kupo David ka anak-i Abijah gati ayŭh jadi raja.