Read Biatah Bidayuh 2 KRONIKEL 13 Bible Online

2 KRONIKEL 13 - Biatah Bidayuh bible

2 KRONIKEL 13

¹Di sawa adi simŭng mai darŭm pinyipritah Jeroboam adi raja Israel, Abijah jadi raja Judah,

²ka ayŭh mritah sitian taruh sawa di Jerusalem. Sindŭ-i Micaiah anak Uriel, so kupo Gibeah. Abijah ngga Jeroboam biperang.

³Abijah ndai bara tibaran soldadu 400,000 naan, ka Jeroboam rawan ayŭh ngga bara tibaran soldadu 800,000 naan.

⁴So-duwŭh tibaran soldadu anŭ bisitura jawin di tarun tana sandah Ephraim. Raja Abijah maad Darŭd Zemaraim ka nyirais nang di Jeroboam ngga daya daya Israel: “Dingah aku!” ayŭh nang.

⁵“Dŭh kah kuu puan TUHAN, adi Tapa Israel, mbŭh ndai simanya adi dŭh bisa dog miranggar ngga David, bada ayŭh ngga bara sesang-i adu adu jadi raja Israel?

⁶Jeroboam anak Nebat rawan Solomon, adi raja-i.

⁷Ripas anŭ ayŭh nguruk bara daya adi arap, ka matah Rehoboam anak Solomon, adi nganŭ paŭh gi-mara ka gibayuh sukup pandai re ngarah ngara.

⁸Madin angān raan biperang rawan kuasa raja adi TUHAN mbŭh nggen di bara sesang David. Angān biyŭn bara tibaran soldadu adi raru bagŭ ka agi ngga angān anak sapi mas adi Jeroboam mbŭh ndai ndu tapa ngan.

⁹Angān pibu imam imam TUHAN, adi sesang Aaron, ka angān pibu bara daya Levi. Ngga gati ngara angān tijuan imam imam pakai gaya bangsa bŭkŭn. Asi asi adi mandŭg taban dari sapi puan kah ju pŭrŭng biri dapŭd dog pibŭrŭt ngan jadi imam yŭn kayuh adi dŭh Tapa.

¹⁰“Pak kieh gibabŭ bituan di TUHAN adi Tapa ami ka bŭn tagan Ayŭh. Imam imam adi bara sesang Aaron ndai kraja ngara, ka daya Levi turung ngara.

¹¹Barang isan ngga barang singumi andu ngara jugan ka Ayŭh kimanyan ngga sadis dāng adi mŭrŭng dog badang. Ngara jugan ruti di tunduh mija adi bisig nanyam ka adat, ka barang singumi andu ngara tung prita adi di tunduh rika-mas prita. Kieh ndai kayuh adi TUHAN mbŭh pesan, pak angān mbŭh tagan Ayŭh.

¹²Adŭp Tapa inŭh pinguru ami ka bara imam-I agi digiti taban trompet, sidia re mambak-i ngga bagan kieh bada masang rawan angān. Daya Israel, dŭhnyah biperang rawan TUHAN, adi Tapa tayung-babuk ngan! Angān dŭh dapŭd manang!”

¹³Atan anŭ Jeroboam muko pait kada bara soldadu-i bada nyerang bara tibaran soldadu Judah so punok, darŭm adi bŭkŭn nyerang so jawin.

¹⁴Bara daya Judah tingga bait tauh ka kiris adŭp ngara mbŭh dog kirurung. Ngara bidua ka TUHAN mite turung, ka bara imam mambak trompet ngara.

¹⁵Bara daya Judah ngāb, ka dog nguru Abijah, ngara nyerang; Tapa ngarah Jeroboam ngga bara tibaran soldadu Israel.

¹⁶Bara daya Israel bu mangān daya Judah, ka Tapa tandah daya Judah ngarah ngara.

¹⁷Abijah ngga bara tibaran soldadu-i bandar ngarah bara daya Israel -- sitangah juta bara soldadu Israel adi siabo pandai birawan dog siŭ.

¹⁸Simŭnŭ inŭh daya Judah ngarah daya Israel, sabab ngara bisangan di TUHAN, adi Tapa tayung-babuk ngara.

¹⁹Abijah tadak bara tibaran soldadu Jeroboam ka ngisi kada kupo-i: Bethel, Jeshanah, ka Ephron, samŭn anak anak kupo adi sindŭk barang kupo anŭ.

²⁰Jeroboam bŭn tungang dapŭd pari kuasa-i sitŭkŭd pinyipritah Abijah. Sikasŭn-i TUHAN ngukum ayŭh, ka ayŭh kabŭs.

²¹Ka kuasa Abijah tanŭ ka bitambah. Ayŭh biyŭn simŭng pat sawŭn ka biyŭn 22 madis anak dari ka simŭng nŭm madis anak dayung.

²²Dundan Abijah adi bŭkŭn, kayuh adi-i nang ka kayuh adi-i ndai, agi dog nuris darŭm Surat Dundan Nabi Iddo.