Read Biatah Bidayuh 2 KRONIKEL 14 Bible Online

2 KRONIKEL 14 - Biatah Bidayuh bible

2 KRONIKEL 14

¹Raja Abijah kabŭs ka dog kubur di kubur raja di Kupo David. Anak-i Asa gati ayŭh jadi raja, ka di ribo Asa tarun tana Judah kinyam udip damai sitŭkŭd simŭng sawa.

²Asa pimunos asŭng TUHAN, adi Tapa-i, ngga pingandai adi batur ka kana.

³Ayŭh kadi mija mija-sambah bangsa bŭkŭn ngga tarun yŭn bisambah adat karŭm, mape uros uros batuh pirapu' ka pitumbang tandā tandā pinatŭng tapa Asherah.

⁴Ayŭh mritah daya Judah bada ndai pinyiraan TUHAN, adi Tapa tayung-babuk ngara, ka tunda ajar ngga pinyipesan-I.

⁵Sabab ayŭh kadi tarun yŭn bisambah adat karŭm ka mija mija-sambah kimanyan so sopŭrŭg kupo di Judah, pritah mbŭh darŭm damai di ribo pinyipritah-i.

⁶Ayŭh pijog kuta yŭn kupo kupo di Judah di jaman adŭp-i anŭ, ka darŭm kudu kudu sawa mating perang, sabab TUHAN nggen damai di ayŭh.

⁷Ayŭh nang di daya Judah, “Ja ata ndai kuta ka tawā yŭn kupo kupo ati, ka tiban tiban adi bisa dog tŭŭp ka dog ngabŭt. Ata biyŭn kuasa di tarun tana ati sabab ata mbŭh ndai pinyiraan TUHAN adi Tapa ta. Ayŭh mbŭh grindung ata ka bada ata siramat di barang yŭn di tarun tana ati.” Sawŭ meh ngara ndai kraja pijog anŭ ka bada-i kamas ka kana.

⁸Raja Asa biyŭn bara tibaran soldadu 300,000 naan so Judah, bisinyata pinangin ngga jarok, ka 280,000 naan daya so Benjamin, bisinyata pinangin ngga bawŭh panah. Sopŭrŭg ngara birani, buang sukup pandai birawan.

⁹Ndi naan daya Ethiopia dŭn Zerah nyerang Judah ngga ndi juta bara tibaran soldadu ka 300 krita kuda ka masang jeh ndŭg Mareshah.

¹⁰Asa ruah an rawan ayŭh, ka so-duwŭh parad sidia di Rubān Zephathah sindŭk Mareshah.

¹¹Asa bidua ka TUHAN adi Tapa-i, “O TUHAN, Kaam dapŭd turung bara tibaran soldadu adi ramah ngarah anŭ adi rabis bake. Turung kieh madin, O TUHAN Tapa ami, sabab kieh bisangan di Kaam, ka ngga adŭn Mai kieh mbŭh ruah di rawan soldadu ati adi raru bagŭ. TUHAN, Kaam inŭh Tapa; mating daya re birani nang adŭp-i an ngarah Kaam.”

¹²TUHAN ngarah bara tibaran soldadu daya Ethiopia anŭ kan Asa ngga bara tibaran soldadu Judah nyerang ngara. Ngara babak bu,

¹³ka Asa ngga bara soldadu-i tadak ngara jeh ndŭg Gerar. Raru bagŭ daya Ethiopia dog siŭ ndŭg ka bara tibaran soldadu ngara dŭh dapŭd birisang ka birawan.[20] Ngara dog ngarah TUHAN ngga bara tibaran soldadu-I, ka bara tibaran soldadu anŭ taban ngga bu bagŭ kayuh sirapas.

¹⁴Komŭnŭ ngara tungang nyerang kupo kupo di gadung tarun tana Gerar, sabab daya diginŭ mbŭh taru TUHAN. Tibaran bara soldadu mirupak sopŭrŭg kupo anŭ ka taban ngga bu raru bagŭ kayuh sirapas.

¹⁵Ngara gŭh nyerang kudu kudu bari pingingat-biri, nakap raru bagŭ biri ka onta. Komŭnŭ ngara pari ka Jerusalem.