Read Biatah Bidayuh 2 KRONIKEL 15 Bible Online

2 KRONIKEL 15 - Biatah Bidayuh bible

2 KRONIKEL 15

¹Roh Tapa mandŭg ka Azariah anak Oded,

²ka ayŭh di bidapŭd ngga Raja Asa. Ayŭh nang, “Dingah aku, Raja Asa, ngga sopŭrŭg daya Judah ngga Benjamin! TUHAN agi ngga angān atas angān agi ngga Ayŭh. Kambŭi angān jiroh Ayŭh, Ayŭh re bada angān dapŭd adŭp-I, pak kambŭi angān tagan Ayŭh, Ayŭh re tagan angān.

³Mbŭh raru tui daya Israel udip dŭh biyŭn Tapa adi sawŭ, dŭh biyŭn imam adi ngajar ngara, ka dŭh biyŭn ukum-adat.

⁴Pak kan pinyusah mandŭg, ngara mite turung so TUHAN, adi Tapa Israel. Ngara jiroh Ayŭh ka dapŭd Ayŭh.

⁵Di jaman anŭ mating daya tungang bijaruh ngga siramat, sabab pinyusah ngga pito agi di barang yŭn.

⁶Ndi bangsa kinanyuh bangsa bŭkŭn, ka ndi kupo kinanyuh kupo bŭkŭn, sabab Tapa taban pito ngga pinyusah di ngara.

⁷Pak angān dŭh siŭn dŭh bake ka dŭhnyah jimŭ. Kraja adi angān ndai re agi upah-i.”

⁸Kan Asa dingah pinganang-binabi adi Azariah anak[21] Oded mbŭh nang, ayŭh jadi birani. Ayŭh taran sopŭrŭg tibudo adi di tarun tana Judah ngga Benjamin ka sopŭrŭg tibudo adi di kupo kupo adi ayŭh mbŭh sirabut di tarun tana sandah rais Ephraim. Ayŭh gŭh ndai bada pari kana mija-sambah TUHAN adi agi di badag Ramin TUHAN.

⁹Bagŭ daya mbŭh mandŭg ka parad Asa so Ephraim, so Manasseh, ka so Simeon, ka mbŭh rŭŭ darŭm pritah-i, sabab ngara mbŭh kiris TUHAN agi ngga ayŭh. Asa bagan sopŭrŭg ngara ngga daya Judah ngga daya Benjamin.

¹⁰Ngara tikuruk di Jerusalem darŭm buran taruh di sawa simŭng-rimŭh darŭm pinyipritah Asa.

¹¹Di andu anŭ ngara jugan sadis ka TUHAN so kayuh sirapas adi ngara taban ngga mari: 700 pŭrŭng sapi ngga 7,000 pŭrŭng biri.

¹²Ngara ndai simanya adi ngga nang adŭp ngara situju an nyambah TUHAN, adi Tapa tayung-babuk ngara, ngga siabo atin ka ngga siabo asŭng ngara.

¹³Tadŭ daya, mara bait minyamba, dari bait dayung, adi dŭh nyambah Ayŭh dŭh siŭn dŭh dog nggen ukum kabŭs.

¹⁴Ngga sirŭŭn bana ngara bipayu ngga adŭn TUHAN nang adŭp ngara an sita simanya anŭ, ka komŭnŭ ngara nyirais ka mambak trompet.

¹⁵Sopŭrŭg daya Judah gaŭn sabab ngara mbŭh ndai simanya anŭ ngga siabo atin ngara. Ngara sawŭ nyambah TUHAN, ka Ayŭh trima ngara ka nggen di ngara udip damai di ndi tarun tana rais ngara.

¹⁶Raja Asa bisor gŭh simuk-i Maacah so pangkat-i adi jadi nyamba rani, sabab ayŭh muko ndai tibudo tapa Asherah, tapa pimuah. Asa pitumbang tibudo anŭ, japa-i bada anŭk, ka badang rapuh-i di rubān Kidron.

¹⁷Sunggu Asa dŭh pirabur sopŭrŭg tarun yŭn bisambah adat karŭm di tarun tana anŭ, ayŭh babŭ tŭtŭd di TUHAN sitŭkŭd umbur-i.

¹⁸Ayŭh na darŭm Ramin TUHAN sopŭrŭg kayuh adi sama-i Abijah mbŭh nitah ka Tapa, simŭnŭ gŭh ngga mas ka kayuh kayuh pirak adi adŭp-i mbŭh nitah.

¹⁹Mating tia biperang ndŭg sawa adi 35 darŭm pinyipritah-i.