Read Biatah Bidayuh 2 KRONIKEL 16 Bible Online

2 KRONIKEL 16 - Biatah Bidayuh bible

2 KRONIKEL 16

¹Di sawa adi 36 darŭm pinyipritah Asa adi raja Judah, Raja Baasha so Israel nyerang Judah ka piguru ndai sindung kuta Ramah ngga matŭd sopŭrŭg aran mŭrŭt bait aran ruah so Judah.

²Jadi Asa tambit pirak ngga mas so pinyirikŭn Ramin TUHAN ngga istana ka pait-i ka Damascus ka Benhadad adi raja Syria, ngga pinganang ati:

³“Ja ata bipambit, nimun sama ta dawŭ-i. Ati, pirak ngga mas, inŭh pinganggen ku di kuu. Madin matŭd pambit mu ngga Raja Baasha di Israel isa ayŭh kadi bara soldadu-i so tarun tana ku.”

⁴Benhadad situju ngga pinganang Asa ka pait bara pingubak soldadu-i ngga bara soldadu ngara da nyerang kupo kupo Israel. Ngara sirabut Ijon, Dan, Abel Beth Maacah, ngga sopŭrŭg kupo Naphtali di yŭn biranja man dog nyikŭn.

⁵Kan Raja Baasha dingah kayuh anŭ, ayŭh ko ndai sindung kuta Ramah ka tagan kraja piramin anŭ.

⁶Komŭnŭ Raja Asa nguruk bara daya so ndi tarun tana Judah ka nggen ukum di ngara bada taban batuh ngga betang kayuh adi Baasha mbŭh pakai di Ramah, ka ngara pakai-i ngga ndai sindung kuta kupo Geba ngga Mizpah.

⁷Di tika anŭ nabi Hanani di ka Raja Asa ka nang, “Sabab kuu bisangan di raja Syria ka dŭh bisangan di TUHAN adi Tapa mu, bara tibaran soldadu raja Israel[22] mbŭh bu mangān kuu.

⁸Dŭh kah daya Ethiopia ngga daya Libya biyŭn raru bagŭ bara tibaran soldadu ngga bagŭ krita kuda ngga soldadu pinunggang kuda? Pak sabab kuu bisangan di TUHAN, Ayŭh nggen di kuu pimanang ngarah ngara.

⁹TUHAN ari nyibatŭh ndi ong ong, an nggen pinyibake di ngara adi tŭtŭd di adŭp-I. Kuu mbŭh ndai urah budo mu, ngapŭi meh so madin kuu re ari biperang.”

¹⁰Anŭ bada Asa raru baji di nabi anŭ ka bada ayŭh dog muak ngga parik basi. Di tika anŭ gŭh Asa piguru kinanyuh kada rayat-i.

¹¹Sopŭrŭg kayuh adi jadi di jaman pinyipritah Asa so sibungas ndŭg pinŭbŭn-i agi dog nuris darŭm Surat Dundan bara Raja Judah ngga Israel.

¹²Di sawa adi 39 darŭm pinyipritah-i, Asa dog andam kaja adi raru bisā; pak dŭh gŭh ayŭh mite turung so TUHAN; ayŭh mite turung so doktor.

¹³Duwŭh sawa ripas anŭ ayŭh kabŭs

¹⁴ka dog kubur di darŭm kubur batuh adi-i ko mubo yŭn adŭp-i di Kupo David. Ngara pakai rapah ngga inyo wangi ngga sidia tadang-i yŭn kubur, ka ngara ndai tibande apui ngga ngurid ayŭh.