Read Biatah Bidayuh 2 KRONIKEL 17 Bible Online

2 KRONIKEL 17 - Biatah Bidayuh bible

2 KRONIKEL 17

¹Jehoshaphat gati sama-i Asa jadi raja ka nyibake adŭp-i yŭn rawan Israel.

²Ayŭh na bara soldadu di kupo kupo adi bikuta di Judah, di sapa tarun tana rais Judah, ka di kupo kupo adi Asa mbŭh sirabut di tarun tana Ephraim.

³TUHAN nyiberkat Jehoshaphat sabab ayŭh tunda suto danding sibungas pimudip sama-i ka dŭh nyambah Baal.

⁴Ayŭh bituan di Tapa sama-i, tunda pesan Tapa, ka dŭh mun gaya raja raja Israel.

⁵TUHAN nagap pritah-i di Judah, ka sopŭrŭg daya nggen di ayŭh pinganggen, isa ayŭh jadi kaya ka dog stabi.

⁶Ayŭh mingangŭn adŭp-i nyambah TUHAN ka nyirubuh sopŭrŭg tarun yŭn bisambah adat karŭm samŭn tandā tandā pinatŭng tapa Asherah di Judah.

⁷Di sawa adi taruh darŭm pinyipritah-i ayŭh pait bara pinurung-i ati da ngajar di kupo kupo Judah: Benhail, Obadiah, Zechariah, Nethanel, ka Micaiah.

⁸Ngara dog nguru prii naan daya Levi ka duwŭh naan imam. Daya Levi inŭh Shemaiah, Nethaniah, Zebadiah, Asahel, Shemiramoth, Jehonathan, Adonijah, Tobijah, ka Tobadonijah; ka imam imam inŭh Elishama ngga Jehoram.

⁹Ngara taban surat Ukum-adat TUHAN ka matak tudu sopŭrŭg kupo di Judah, ngajar ukum-adat anŭ di daya.

¹⁰TUHAN bada sopŭrŭg pritah adi maning Judah taru matak biperang rawan Raja Jehoshaphat.

¹¹Agi kada daya Philistine taban ka yŭn Jehoshaphat bagŭ kiang pirak samŭn pinganggen adi bŭkŭn, ka agi kada daya Arab taban ka yŭn-i 7,700 biri ka 7,700 kambing.

¹²Jadi Jehoshaphat jadi bitambah bikuasa. Di ndi tarun tana Judah ayŭh pijog sindung kuta ka pijog kupo,

¹³di yŭn-i nyikŭn raru bagŭ biranja man. Di Jerusalem ayŭh na dudu pingubak adi traŭn,

¹⁴nanyam ka manak ngara. Adnah inŭh pingibās bara soldadu so manak Judah, ka ayŭh biyŭn 300,000 naan soldadu di ribo-i.

¹⁵Adi numbor duwŭh darŭm pangkat inŭh Jehohanan, ngga 280,000 naan soldadu,

¹⁶adi numbor taruh darŭm pangkat inŭh Amasiah anak Zichri, ngga 200,000 naan soldadu. (Amasiah so pinyiraan adŭp-i raan bituan di TUHAN.)

¹⁷Pingibās bara soldadu so manak Benjamin inŭh Eliada, soldadu adi traŭn; ayŭh nguasa 200,000 naan soldadu adi bisinyata ngga pinangin ka bawŭh panah.

¹⁸Adi numbor duwŭh-i inŭh Jehozabad ngga 180,000 naan soldadu, adi mbŭh sukup bisinyata.

¹⁹Ngara anŭ bituan di raja di Jerusalem; ripas so anŭ dinge ayŭh na bara soldadu adi bŭkŭn di kupo kupo adi bŭkŭn adi bikuta di ndi tarun tana Judah.