Read Biatah Bidayuh 2 KRONIKEL 18 Bible Online

2 KRONIKEL 18 - Biatah Bidayuh bible

2 KRONIKEL 18

¹Kan Jehoshaphat adi raja Judah jadi kaya buang timagah, ayŭh ndai pambit ngga Ahab adi raja Israel pakai gaya banan sawan.

²Kudu kudu sawa ripas anŭ Jehoshaphat di ka kupo Samaria di dapŭd Ahab. Yŭn stabi di Jehoshaphat ngga ngara adi ayō ayŭh, Ahab simareh mua kiang biri ngga sapi ngga bigawai. Ayŭh suba mujuk Jehoshaphat sua ngga adŭp-i nyerang kupo Ramoth di Gilead.

³Ayŭh siken, “An kuu sua ngga aku nyerang Ramoth?” Jehoshaphat nam, “Aku sidia an sua ngga kuu, ka simŭnŭ gŭh bara tibaran soldadu ku. Kieh bisa samah matak ngga kuu.”

⁴Komŭnŭ ayŭh nang dinge, “Pak diŭ so kayuh bŭkŭn, ata an bisiken ngga TUHAN.”

⁵Jadi Ahab bagan bara nabi, agi 400 naan ngara, ka siken ngara, “Bisa kah dŭh aku matak di nyerang Ramoth?” “Nyerang nŭh,” ngara nam. “Tapa re nggen di kuu pimanang.”

⁶Pak Jehoshaphat siken, “Agi kah nabi adi bŭkŭn adi so ta bisa bisiken ngga TUHAN?”

⁷Ahab nam, “Agi adi bŭkŭn, Micaiah anak Imlah. Pak aku tiru di ayŭh sabab ayŭh bŭn minyu-binabi pasar kayuh kana yŭn aku; siraru-i kayuh adi arap.” “Kuu dŭh bisa nang sakanŭ!” Jehoshaphat nam.

⁸Jadi Raja Ahab bagan pinurung istana ka kidaan di ayŭh bada di tambit Micaiah jam anŭ gŭh.

⁹Duwŭh naan raja anŭ, nēn piraka raja, guru di takta ngara di tarun yŭn ngiik di sapa tiban-bās kupo Samaria, ka sopŭrŭg nabi minyu-binabi di sirung jawin ngara.

¹⁰Ndi naan so ngara, Zedekiah anak Chenaanah, ndai tanduk tanduk basi ka nang di Ahab, “Ati inŭh kayuh adi TUHAN nang, ‘Ngga tanduk tanduk basi ati kuu re rawan daya Syria ndŭg ka ngara batur batur arah.’ ”

¹¹Sopŭrŭg nabi adi bŭkŭn nang sakanŭ gŭh. “Matak meh di nyerang Ramoth ka kuu re manang,” ngara nang. “TUHAN re nggen di kuu pimanang.”

¹²Sitadŭn anŭ, pinurung adi matak di tambit Micaiah nang di Micaiah, “Sopŭrŭg nabi adi bŭkŭn mbŭh minyu-binabi nang raja re manang, ka kuu patut gŭh nang sakanŭ.”

¹³Pak Micaiah nam, “Ngga adŭn TUHAN, aku re nang kayuh adi Tapa ku bada aku nang!”

¹⁴Kan ayŭh mbŭh di sirung jawin Raja Ahab, raja siken ayŭh, “Micaiah, bisa kah dŭh kieh duwŭh Raja Jehoshaphat matak di nyerang Ramoth?” “Nyerang nŭh!” Micaiah nam. “Kuu taŭn re manang. TUHAN re nggen di kuu pimanang.”

¹⁵Pak Ahab nam, “Kan kuu minyu ngga aku ngga adŭn TUHAN, kidaan di aku kayuh adi sawŭ! Pikudu kari aku mbŭh nang sakanŭ di kuu?”

¹⁶ Micaiah nam, “Aku tungang kiris bara tibaran soldadu Israel mingare di sandah mun biri dŭh biyŭn pingingat. Ka TUHAN nang, ‘Ngara ati dŭh biyŭn pinguru; tandah ngara mari ngga siramat.’ ”

¹⁷Ahab nang di Jehoshaphat, “Aku kidaan di kuu, ayŭh bŭn minyu-binabi pasar kayuh kana yŭn ku; siraru-i kayuh adi arap!”

¹⁸Micaiah minyu dinge, “Madin dingah kayuh adi TUHAN nang! Aku kiris TUHAN guru di takta-I di shorga, ngga sopŭrŭg malaikat-I mijog maning Ayŭh.

¹⁹TUHAN siken, ‘Asi re mujuk Ahab isa ayŭh matak ka dog siŭ di Ramoth?’ Kada so bara malaikat anŭ nang ndi masam kayuh, ka adi bŭkŭn nang kayuh bŭkŭn,

²⁰ndŭg ka ndi naan roh di ka jawin, tudu TUHAN, ka nang, ‘Aku re mujuk ayŭh.’ ‘Munki?’ TUHAN siken.

²¹Roh anŭ nam, ‘Aku re di ka bada sopŭrŭg nabi Ahab kadong.’ TUHAN nang, ‘Panu kuu ka mujuk ayŭh. Tungang kuu mujuk ayŭh.’ ”

²²Ngga kubo pinganang-i Micaiah nang, “Ati inŭh kayuh adi mbŭh jadi. TUHAN mbŭh bada bara nabi mu kadong kuu. Pak adŭp-I mbŭh natu nang kuu re dog nyatŭk pinyirusag!”

²³Komŭnŭ nabi Zedekiah tudu Micaiah, napar jawin-i, ka siken, “So sinde roh TUHAN bu so aku ka minyu di kuu?”

²⁴“Kuu re puan di andu kuu bu ka bisukan di ndi birit tura ka punok,” Micaiah nam.

²⁵Komŭnŭ Raja Ahab nggen ukum bada ndi naan so bara pingubak-i, “Nakap ayŭh ka taban ayŭh ka yŭn Amon adi gabenor kupo, ka komŭnŭ ka yŭn Joash adi anak-raja.

²⁶Kidaan di ngara bada taran ayŭh ka darŭm jer ka paan ayŭh ngga ruti ka piin adŭ ndŭg ka aku mbŭh pari ngga siramat.”

²⁷“Kambŭi kuu pari ngga siramat,” Micaiah nang, “rati-i TUHAN mating minyu so aku!” Ka-i nang dinge, “Dingah, barang naan angān, kayuh adi mbŭh ku nang!”

²⁸Komŭnŭ Ahab raja Israel ngga Jehoshaphat raja Judah matak di nyerang kupo Ramoth di Gilead.

²⁹Ahab nang di Jehoshaphat, “Darŭm ata matak biperang, aku re nyibabā adŭp ku, pak kuu nēn piraka raja mu.” Jadi raja Israel nyibabā adŭp-i darŭm-i matak di biperang.

³⁰Raja so Syria muko nggen ukum bada bara pingubak krita krita kuda-i nyerang kaŭs-i raja Israel.

³¹Jadi kan ngara kiris Raja Jehoshaphat, ngara pikir ayŭh raja Israel, ka ngara nyerang ayŭh. Pak Jehoshaphat nyirais, ka TUHAN Tapa nyiramat ayŭh ka pijo ngara so ayŭh.

³²Bara pingubak krita kuda anŭ kiris ayŭh dŭh raja Israel, ngara dŭh tia tadak ayŭh.

³³Ndi naan soldadu daya Syria tipia nimbak reja-panah ka dog Raja Ahab, tambus asah tubu piraka perang-i. “Aku biragan!” ayŭh nang di sianŭ adi tukang pimanu krita kuda-i. “Biruit ka bu so yŭn biperang ati!”

³⁴Atan bisaad anŭ, Raja Ahab babŭ di krita kuda-i, nura bara soldadu daya Syria. Ngga arong singumi andu ayŭh kabŭs.