Read Biatah Bidayuh 2 KRONIKEL 19 Bible Online

2 KRONIKEL 19 - Biatah Bidayuh bible

2 KRONIKEL 19

¹Jehoshaphat, adi raja Judah, pari ngga siramat ka istana-i di Jerusalem.

²Ndi naan nabi, Jehu anak Hanani, di ka yŭn raja ka nang di ayŭh, “Patut kah kuu turung daya adi ginaka ka tambit parad ngara adi tiru di TUHAN? Kayuh adi kuu mbŭh ndai mbŭh bada TUHAN baji di kuu.

³Pak sunggu mŭnŭ, agi kana mu. Kuu mbŭh kadi sopŭrŭg tandā pinatŭng tapa Asherah adi daya nyambah, ka kuu mbŭh suba tunda pinyiraan Tapa.”

⁴Sunggu Raja Jehoshaphat rŭŭ di Jerusalem, ayŭh ari panu tudu bara daya-i, so Beersheba di tura ka siratan jeh ndŭg rais tarun tana sandah Ephraim di tura ka utara, amai raan bada daya pari ka TUHAN adi Tapa tayung-babuk ngara.

⁵Ayŭh tijuan akim di barang kupo adi bikuta di Judah

⁶ka pitayan ngara: “An nakit nakit darŭm angān miratak ukum di daya; kayuh adi angān ndai dŭh-i so manusia, pak so kuasa TUHAN; Ayŭh agi ngga angān darŭm angān nggen ukum.

⁷Stabi di TUHAN ka ndai kraja ngan ngga nakit, sabab TUHAN adi Tapa ta abah di pingandai tipu, pingandai marad di pingatur yŭn daya, puan kah trima suap.”

⁸Di Jerusalem Jehoshaphat tijuan daya Levi, imam imam, ka kada so daya bās ayŭh bada jadi akim di har miranggar Ukum-adat TUHAN, puan kah har kaii di dupan daya kupo.[23]

⁹Ayŭh nggen di ngara pinyitayan ati: “Angān dŭh siŭn dŭh ndai kraja ngan ngga taru di TUHAN, tŭtŭd tunda pinganang-I di barang masam kayuh ndai ngan.

¹⁰Kan dingan ngan adi samah bangsa so tadŭ tadŭ kupo taban ka angān har siŭ daya, puan kah tadŭ tadŭ kraja pingandai adi miranggar ukum-adat puan kah Pinyipesan, angān dŭh siŭn dŭh ngajar ngara ngga nakit munki ngara ngga adŭp-i di tika bisara, isa ngara dŭh bidosa di sirung jawin TUHAN. Kambŭi dŭh, angān ngga dingan ngan adi samah bangsa re kinyam baji TUHAN. Pak kambŭi angān ndai kraja ngan nanyam patut, angān dŭh re sarah.

¹¹Amariah adi Imam Bās re biyŭn puno kuasa di har adat, ka Zebadiah anak Ishmael adi gabenor Judah, re biyŭn puno kuasa di sopŭrŭg har daya. Bara daya Levi biyŭn kuasa ngga tingga pimatŭd itong dog pimanu di yŭn bisara. Dŭhnyah taru pak tunda pinyitayan ati, ka isa-i TUHAN agi ngga daya adi batur!”