Read Biatah Bidayuh 2 KRONIKEL 2 Bible Online

2 KRONIKEL 2 - Biatah Bidayuh bible

2 KRONIKEL 2

¹Raja Solomon natu adŭp-i an pijog ramin yŭn nyambah TUHAN, ka pijog gŭh istana yŭn adŭp-i.

²Ayŭh bada 70,000 naan daya tukang muat preka piramin, ka 80,000 naan daya tukang kapŭg batuh. Ka 3,600 naan adi bŭkŭn adi jadi mandor.

³Solomon pait pinganang ka Raja Hiram di Tyre; “Ndai kraja dagang ngga aku mun kuu muko ndai ngga sama ku, Raja David, kan kuu jua kayuh sedar ngga pijog istana-i.

⁴Aku pijog ndi ramin ngga stabi di TUHAN adi Tapa ku. Anŭ re tarun yŭn adi kudus di yŭn ku ngga daya ku nyambah Ayŭh buang badang kimanyan adi buuh ramak, di yŭn ami re ari jugan ruti kudus, ka yŭn ami jugan sadis badang barang isan isan ngga singumi andu, samŭn di andu Sabbath, di andu gawai Anak Buran, ka di andu adi bās adi bŭkŭn ngga stabi di TUHAN adi Tapa ami. Ayŭh mbŭh pesan Israel bada adu adu ndai simŭnŭ.

⁵Aku mbŭh bisatur an pijog ndi ramin adi bās, sabab Tapa ami inŭh bās dŭ so tapa adi bŭkŭn.

⁶ Pak mating daya sawŭ re tungang pijog ramin yŭn Tapa, sabab sopŭrŭg rangit dŭh gŭh re sadang yŭn pinyirŭŭ-I. Simuki meh aku re dapŭd pijog anŭ adi rabis so adi bisa aku yŭn badang kimanyan ka Tapa?

⁷Madin pait ka aku daya adi sukup pandai mŭŭt, di kraja mas, pirak, timaga, ka basi, ka di kraja ndai banang adi biru, bēng, bireh. Ayŭh re nyiraja ngga bara tukang so Judah ngga Jerusalem adi sama ku David mbŭh mien.

⁸Aku puan munki masam pandai tukang tukang kayuh mu, ka pait meh ka aku kayuh sedar, kayuh sipres, kayuh junipa so Lebanon. Aku mbŭh sidia an pait bara daya bada turung kuu

⁹sidia bagŭ betang kayuh, sabab Ramin TUHAN adi re ku pijog inŭh bayah buang grua.

¹⁰Ndu biranja ngara, aku re pait ka kuu duwŭh ribu tan gandom, duwŭh ribu tan jeri, pat ratus ribu lita wain, ka pat ratus ribu lita inyo kanā.”

¹¹Raja Hiram pait surat ngga nam Solomon. Ayŭh nuris, “Sabab TUHAN rindu daya-I, Ayŭh mbŭh bada kuu jadi raja ngara.

¹²Puji ka TUHAN adi Tapa Israel, Pinapa rangit ngga ong! Ayŭh mbŭh nggen di Raja David anak adi bijak, puno ngga atin mirati ka pimandai, adi madin bisatur an pijog ramin yŭn TUHAN ka istana yŭn adŭp-i.

¹³Aku pait ka yŭn mu ndi naan tukang adi bijak buang sukup pandai dŭn Huram.

¹⁴Sindŭ-i inŭh ndi naan so tibaran-asar Dan ka sama-i daya asar kupo tyre. Ayŭh pandai ndai kayuh so mas, pirak, timaga, basi, batuh, ka kayuh. Ayŭh pandai ndai banang biru, bēng, ka bireh, samŭn banang linen. Ayŭh pandai ndai bagŭ masam butik ka dapŭd ndai tadŭ mun butik adi dog kidaan di ayŭh. Bada ayŭh nyiraja ngga bara tukang mu ka ngga ngara adi ko nyiraja ngga sama mu, Raja David.

¹⁵Ka pait meh gandom, jeri, wain, ka inyo kanā anŭ adi kuu mbŭh janji.

¹⁶Di darŭd Lebanon kieh re tabŭng tŭngŭn sedar yŭn mu, mŭtŭs-i bada jadi rating, ka paman-i di rawŭt ndŭg Joppa. So nŭ kuu bisa taban-i ka Jerusalem.”

¹⁷Raja Solomon ndai pimirang yŭn sopŭrŭg daya tami adi rŭŭ di tana Israel, brimun ngga pimirang adi sama-i David mbŭh ndai. Agi 153,600 naan daya tami adi rŭŭ tatap diginŭ.

¹⁸Ayŭh tijuan 70,000 naan ngara bada muat preka piramin ka 80,000 naan tukang kapŭg batuh di darŭd, ka tijuan 3,600 naan mandor bada kingat kraja ndŭg jadi.