Read Biatah Bidayuh 2 KRONIKEL 20 Bible Online

2 KRONIKEL 20 - Biatah Bidayuh bible

2 KRONIKEL 20

¹Mua tian ripas anŭ bara tibaran soldadu Moab ngga Ammon, samah ngga pambit ngara, daya Meun,[24] nyerang Judah.

²Kada pinyisung mandŭg ka kidaan di Raja Jehoshaphat: “Agi tibaran bara soldadu adi raru bagŭ so Edom mbŭh mandŭg so pah mandi Rawŭt Pide an nyerang kaam. Ngara mbŭh sirabut Hazazon Tamar.” (Anŭ inŭh dŭn adi bŭkŭn yŭn Engedi.)

³Jehoshaphat mbŭh taru ka bidua ka TUHAN mite Ayŭh turung kidaan ani patut-i ndai. Komŭnŭ ayŭh nggen ukum bada sopŭrŭg daya bipusa di ndi tarun tana rais.

⁴So barang kupo di Judah daya bigaut di ka Jerusalem mite turung so TUHAN,

⁵ka ngara ngga bara daya Jerusalem tikuruk di badag bauh Ramin TUHAN. Raja Jehoshaphat mijog nura ngara

⁶ka bidua bana, “O TUHAN adi Tapa tayung-babuk ami, Kaam mritah so shorga sopŭrŭg bangsa di ong. Kaam adi bikuasa ka bake, ka mating daya tungang rawan Kaam.

⁷ Kaam inŭh Tapa ami. Kan daya Mai Israel bipindah ka tarun tana ati, Kaam pibu daya adi rŭŭ digiti ka nggen tarun tana ati di bara sesang Abraham, adi dingan Mai, bada-i jadi tung ngara ndŭg situi tui.

⁸Ngara mbŭh rŭŭ digiti ka mbŭh pijog ndi ramin yŭn nyambah Kaam, puan

⁹nang kambŭi tadŭ tadŭ pinyirusag dog ngara ngga ngukum ngara -- perang,[25] sesak-andam, puan kah apag -- ngara re mandŭg ka mijog di jawin ramin ati di yŭn Kaam dog nyambah. Ngara bisa bidua ka Kaam kan ngara dog pinyusah, ka Kaam re dingah ngara ka nyiramat ngara.

¹⁰ “Madin daya Ammon, Moab, ngga Edom mbŭh nyerang kieh. Di andu tayung-babuk ami ruah so Egypt, Kaam kijaman ngara mŭrŭt tarun tana anŭ, ngapŭi tayung-babuk ami batur-i nandan adŭ ngara ka dŭh siŭ ngara.

¹¹Simuti inŭh ngara maras kieh -- ngara mandŭg an pibu kieh so tarun tana adi Kaam mbŭh nggen di kieh.

¹²Kaam adi Tapa ami! Ngukum ngara, amai kieh mbŭh dŭh bigaya di sirung jawin tibaran bara soldadu adi raru bagŭ anŭ adi nyerang kieh. Kieh dŭh puan ani re ami ndai, pak kieh nyigura ka Kaam mite turung.”

¹³Sopŭrŭg daya Judah, ngga sawŭn ngara ngga anak ngara, mijog diginŭ di Ramin TUHAN.

¹⁴Roh TUHAN mandŭg ka ndi naan daya Levi adi agi di dupan daya bagŭ. Dŭn-i inŭh Jahaziel anak Zechariah; ayŭh ndi naan so manak Asaph ka sesang Asaph so Mattaniah, Jeiel, ngga Benaiah.

¹⁵ Jahaziel nang, “Tuan Raja ngga sopŭrŭg daya Judah ngga Jerusalem, TUHAN nang angān dŭh siŭn susah puan kah taru nura tibaran bara soldadu adi raru bagŭ anŭ. Perang inŭh darŭm tangan Tapa, dŭh darŭm tangan ngan.

¹⁶Nyerang ngara sipagi darŭm ngara maad ateng di Ziz. Angān re dapŭd ngara di tŭbŭn rubān adi nuju tarun tana-pajam sindŭk Jeruel.

¹⁷ Dŭhsah angān biperang. Kaŭs angān mbit ndi tarun yŭn ka kajŭn diginŭ; angān re kiris TUHAN nggen pimanang di angān. Daya Judah ngga Jerusalem, dŭhnyah ramah bait taru. Matak di biperang; TUHAN re agi ngga angān!”

¹⁸Komŭnŭ Raja Jehoshaphat mutu rapat ubak-i, buang raŭn-i dog tana, ka sopŭrŭg daya mutu ngga ayŭh ka nyambah TUHAN.

¹⁹Bara so manak Kohath ngga Korah adi daya Levi mijog ka ngga sirŭŭn bana nyirais muji TUHAN, adi Tapa Israel.

²⁰Awar isan isan andu jawa ndi bara daya ruah di ka tarun tana-pajam sindŭk Tekoa. Darŭm ngara matak, Jehoshaphat minyu di ngara ngga pinganang sakati: “Daya Judah ngga Jerusalem! Na pinyabah ngan di TUHAN adi Tapa ngan, ka Ayŭh re turung angān. Sabah kayuh adi bara nabi-I mbŭh kidaan di angān, ka angān re mujur di pingandai ngan.”

²¹Ripas ko birundeng ngga bara daya, raja mritah kada bara pimain musik bada kasŭk jipo-ambu adi ngara nēn di tika kraja pingandai adat ka baris diŭ so bara tibaran soldadu, biragu: “Puji ka TUHAN! Pinyirindu-I inŭh tan adu adu!”

²²Kan ngara piguru biragu, TUHAN bada bara tibaran soldadu adi nyerang jadi kandang-kandŭ.

²³Bara daya Ammon ngga daya Moab nyerang bara tibaran soldadu daya Edom ka kubo siŭ ngara, ka komŭnŭ ngara bisaad dupan adŭp ngara.

²⁴Kan bara tibaran soldadu Judah mbŭh ndŭg tawā adi di tarun tana-pajam, ngara tingga parad pinganyu ka kiris ngara mbŭh abo prigure di tana, kabŭs. Ndi naan mating gŭh udip.

²⁵Jehoshaphat di sirapas rata ngga barang ngara, ka ngara dapŭd sapi,[26] pinguman, piraka, ka kayuh kayuh adi bŭkŭn adi grua. Taruh andu ngara sun kayuh sirapas anŭ, pak mbŭh raru bagŭ ka ngara dŭh nyawa tambit sopŭrŭg-i.

²⁶Di andu adi pat ngara tikuruk di Rubān Beracah ka muji TUHAN amai sopŭrŭg adi mbŭh-I ndai. Ngapŭi rubān anŭ dog kadŭn “Beracah”.[27]

²⁷Jehoshaphat taban bara soldadu-i pari ka Jerusalem ngga pimanang, sabab TUHAN mbŭh ngarah pinganyu ngara.

²⁸Kan ngara mbŭh ndŭg kupo, ngara baris ka Ramin TUHAN, ngga jawŭn kachapi ka trompet.

²⁹Sopŭrŭg bangsa adi dingah munki TUHAN mbŭh ngarah pinganyu Israel mbŭh raru taru,

³⁰jadi Jehoshaphat mritah darŭm damai, ka Tapa bada ndi tarun tana rais-i pagŭng.

³¹Jehoshaphat jadi raja Judah so umbur-i 35 sawa ka mritah Jerusalem 25 sawa. Sindŭ-i inŭh Azubah, anak Shilhi.

³²Mun sama-i Asa adi diŭ so ayŭh, ayŭh ndai kayuh adi batur di batŭh TUHAN;

³³pak tarun yŭn bisambah adat karŭm dŭh dog nyirubuh. Daya gibayuh pari ngga siabo atin ngara nyambah Tapa tayung-babuk ngara.

³⁴Sopŭrŭg kayuh adi bŭkŭn adi Jehoshaphat ndai, so sibungas pinyipritah-i ndŭg pinŭbŭn-i agi dog nuris darŭm Surat Dundan Anak Hanani, adi kada so Surat Dundan bara Raja Israel.

³⁵Agi ndi sidah, Jehoshaphat raja Judah ndai pambit ngga Ahaziah raja Israel, adi mbŭh ndai bagŭ pingandai ginaka.

³⁶Di pinyigŭn Eziongeber ngara ndai kapar baga.

³⁷Pak Eliezer anak Dodavahu, so kupo Mareshah, bakan Jehoshaphat, “Sabab kuu mbŭh ndai pambit ngga Ahaziah, TUHAN re pirusak kayuh adi angān mbŭh ndai.” Ka kapar kapar anŭ rusak ka dŭh dapŭd birayar.