Read Biatah Bidayuh 2 KRONIKEL 21 Bible Online

2 KRONIKEL 21 - Biatah Bidayuh bible

2 KRONIKEL 21

¹Jehoshaphat kabŭs ka dog kubur di kubur raja di kupo David ka anak-i Jehoram gati ayŭh jadi raja.

²Jehoram anak Jehoshaphat raja Judah biyŭn nŭm madis jurud dari: Azariah, Jehiel, Zechariah, Azariahu, Michael, ka Shephatiah.

³Sama ngara nggen di ngara mua kiang mas, pirak, ka buat-rata adi brega, ka bada barang naan ngara biraku jaga barang kupo adi bikuta di Judah. Pak sabab Jehoram anak pinuai, Jehoshaphat bada ayŭh gati adŭp-i.

⁴Kan Jehoram mbŭh tatap guru di takta sama-i, ayŭh bada sopŭrŭg jurud dari-i dog siŭ, samŭn kada pingubak daya Israel.

⁵Jehoram jadi raja kan umbur-i 32 sawa, ka ayŭh mritah di Jerusalem sitian mai sawa.

⁶Ayŭh tunda suto udip ginaka Raja Ahab ka raja raja Israel adi bŭkŭn, sabab ayŭh mbŭh sawŭn ndi naan so anak dayung Ahab. Ayŭh mbŭh bidosa rawan TUHAN,

⁷ pak TUHAN dŭh raan pirusak taris asar pinyipritah David, sabab Ayŭh mbŭh bipayu ngga David ka bijanji nang bara sesang-i re adu adu mritah.

⁸ Di jaman pinyipritah Jehoram, daya Edom rawan pritah Judah ka pijog pritah adŭp ngara.

⁹Jadi Jehoram ngga pingubak pingubak soldadu-i matak ngga krita krita kuda ka nyerang Edom. Diginŭ bara tibaran soldadu daya Edom nyikapung ngara, pak singarŭm ngara tungang pirupas adŭp ngara ka bu.

¹⁰Edom mbŭh biyŭn pritah adŭp-i sadi ka dŭh tia di ribo[28] Judah so nganŭ. Di darŭm tipuh anŭ gŭh, kupo Libnah gŭh rawan pritah, sabab Jehoram mbŭh tagan TUHAN, adi Tapa tayung babuk-i.

¹¹Ayŭh pijog tarun yŭn bisambah adat karŭm di tarun tana darŭd rais Judea ka taban daya Judah ngga daya Jerusalem bidosa rawan TUHAN.

¹²Nabi Elijah pait surat ka Jehoram, ka isi-i agi sakati: “TUHAN, adi Tapa babuk mu David, ngukum kuu, sabab kuu dŭh tunda suto danding sama mu, Raja Jehoshaphat, bait babai mu, Raja Asa.

¹³Tibarik-i kuu mbŭh tunda suto adi arap so raja raja Israel ka mbŭh taban daya Judah ngga daya Jerusalem dŭh tŭtŭd di Tapa, nimun Ahab ngga raja raja adi ripas ayŭh bada Israel dŭh tia tŭtŭd di Tapa. Kuu mbŭh siŭ jurud adŭp mu, adi kana dŭ so kuu.

¹⁴Sabab anŭ meh, TUHAN re bandar bandar ngukum daya mu, bara anak mu, ka bara sawŭn mu, ka re pirabur buat-rata mu.

¹⁵Adŭp mu re naman andam kuboi adi raru mandam ka adi re bitambah arap barang andu.”

¹⁶Agi kada daya Philistine ngga daya Arab rŭŭ sindŭk tarun yŭn kada daya Ethiopia rŭŭ arong bŭngŭn rawŭt. TUHAN kiruyok atin ngara bada nyerang Jehoram.

¹⁷Ngara nyerang Judah, sirapas sopŭrŭg kayuh adi darŭm istana raja, ka taban ngga bu sopŭrŭg sawŭn raja ngga anak anak raja, adŭ-i Ahaziah, adi anak sibusu-i.

¹⁸Komŭnŭ ripas sopŭrŭg anŭ, TUHAN bada raja dog andam kuboi adi raru mandam.

¹⁹Sindŭk duwŭh sawa andam anŭ dŭ dŭ bitambah arap ka pinŭbŭn-i raja kabŭs darŭm sangsara. Bara rayat-i mating ndai apui tabun ngga muās ayŭh nimun adi mbŭh dog ndai yŭn tayung babuk-i.

²⁰Jehoram jadi raja kan umbur-i 32 sawa ka mritah di Jerusalem sitian mai sawa. Mating daya nyibara ayŭh. Ngara kubur ayŭh darŭm kupo David pak dŭh di kubur raja.